1 Awal mulonyo Allah nyiptoke bumi samo alam semesto. 2 Waktu tu, bumi masé kacau balau. Kegelepan nótópi banyu yang luas, trós Ro Allah melayang-layang di pócók banyu tu.

3 Allah ngomong, “Jadila terang!” Laju, terang tu jadi. 4 Allah nyingok amen terang tu baék, trós Dio misake terang dari gelep. 5 Na, Allah namoi terang tu “siang”, gelep tu “malem”. Jadila petang, jadila pagi, itula ari petamo.

6 Allah ngomong, “Jadila lengkóngan di antaro banyu, yang jadi pemisa di antaro banyu dengen banyu!” 7 Allah mbékén lengkóngan tu, trós misake banyu yang ado di bawa lengkóngan tu dari banyu yang ado di pócóknyo. Laju, jadila cak itu. 8 Na, Allah namoi lengkóngan tu “langét”. Jadila petang, jadila pagi, itula ari keduo.

9 Allah ngomong, “Biarla banyu yang ado di bawa langét bekómpól di sikok tempat, trós biarla kejingok'an tempat yang keréng!” Laju, jadila cak itu. 10 Na, Allah namoi tempat yang keréng tu “darat”, sementaro kómpólan banyu tu dinamoi-Nyo “laót”. Allah nyingok amen galo-galonyo tu baék.

11 Allah ngomong, “Biarla darat nómbóke tómbó-tómbóan, itu tu taneman yang ngasélke biji jugo segalo macem batang bua-buahan yang ngasélke bua bebiji di bumi!” Laju, jadila cak itu. 12 Na, darat metuke tómbó-tómbóan, itu tu segalo macem taneman yang ngasélke biji jugo segalo macem batang yang ngasélke bua bebiji. Allah nyingok amen galo-galonyo tu baék. 13 Jadila petang, jadila pagi, itula ari ketigo.

14 Allah ngomong, “Biarla ado penerang di langét óntók misake siang dari malem! Biarla galo-galonyo tu jadi tando óntók tanggal yang ditentuke, jugo óntók ari samo taón! 15 Biarla galo-galonyo tu jadi penerang di langét óntók nerangi bumi!” Laju, jadila cak itu. 16 Allah mbékén duo penerang yang besak. Penerang yang lebé becahayo tu óntók nguasoi siang, trós penerang yang kurang becahayo tu óntók nguasoi malem. Dio jugo mbékén bintang-bintang. 17 Na, Allah nempatke galo-galo penerang tadi di langét óntók nerangi bumi, 18 óntók nguasoi siang jugo malem, jugo óntók misake terang dari gelep. Allah nyingok amen galo-galonyo tu baék. 19 Jadila petang, jadila pagi, itula ari keempat.

20 Allah ngomong, “Biarla banyu dikerómóni dengen mahlók-mahlók édóp, trós biarla bóróng-bóróng beterbangan di langét di pócók bumi!” 21 Allah nyiptoke binatang-binatang laót yang besak, trós segalo macem mahlók édóp yang begerak jugo bekerómón di dalem banyu, cak itu jugo segalo macem bóróng besayap. Allah nyingok amen galo-galonyo tu baék. 22 Na, Allah mberkahi galo-galonyo tu, uji-Nyo, “Beranakla trós betamba banyakla! Penuila banyu di laótan. Biarla bóróng-bóróng betamba banyak di bumi!” 23 Jadila petang, jadila pagi, itula ari kelimo.

24 Allah ngomong, “Biarla bumi metuke segalo macem mahlók édóp, iola binatang ternak, binatang ngerayap, jugo segalo macem binatang liar!” Laju, jadila cak itu. 25 Allah mbékén segalo macem binatang liar, segalo macem binatang ternak, jugo segalo macem binatang yang ngerayap di tana. Allah nyingok amen galo-galonyo tu baék.

26 ^aAhérnyo, Allah ngomong, “Payó Kito mbékén manusio pecak gambar Kito, pecak rupo Kito dewek! Biarla dio wong nguasoi iwak-iwak di laót, bóróng-bóróng di udara, binatang-binatang ternak, jugo slóró bumi, trós nguasoi slóró binatang melata yang ngerayap di bumi!”

29 Allah ngomong lagi cak ini, “Jingokla! Aku ngenjókke samo kamu slóró tómbóan yang ngasélke biji yang ado di slóró bumi ni, jugo slóró batang yang buanyo bebiji. Itula yang bakal jadi pajóan kamu.^b 30 Ke slóró binatang di bumi, slóró bóróng di udara, samo ke slóró binatang yang ngerayap di bumi, yang galo-galonyo tu benyawo, Aku enjókke galo-galo tómbóan ijo óntók jadi pajóannyo.” Laju, jadila cak itu.

31 Allah nyingok segalo yang la dibékén-Nyo, trós alangke baék nian galo-galonyo tu! Jadila petang, jadila pagi, itula ari keenem.