Kitab ini nyeritoke pasal sikok gadés ketórónan Israel yang benamo Ester. Ester ni diangkat jadi ratu Persia, trós dengen berani dio nyelametke bangsonyo dari rencano jahat Haman yang nak mbinasoke slóró wong Israel yang ado di Kerajaan Persia. Cerito ni tejadi kiro-kiro di taón 483–473 SM di Kota Susan, Kerajaan Persia. Cerito ini jugo nyelaske asal-ósól sala sikok ari rayo wong Israel, yang disebót Purim.

Pas jaman tu, banyak wong Israel yang idak tinggal di tana Israel lagi karno sebelómnyo dio wong kala perang dengen Kerajaan Babel. Jadi, sebagéan besak wong Israel digawak jadi tahanan ke Babel. Masa ini disebót masa pembuangan Israel. Sebenernyo, pembuangan ni iola caro Allah ngókóm wong Israel karno keidaksetioan dio wong samo Allah. Dak lamo seabés tu, Kerajaan Babel dikalake pulok ole Kerajaan Persia. Laju, slóró tahanan Babel diambék ole Persia, teko wong Israel. Mangkonyo, pas waktu cerito ni tejadi, wong Israel banyak tinggal di Kerajaan Persia.

Yang luar biaso dari kitab ni iola namo Allah dak perna nian disebótke. Tapi liwat serentetan kejadian, kito pacak nyingok amen Allah betindak di belakang layar óntók nyelametke umatnyo. Tangan Allah ado di belakang tiap kejadian yang pecak “kebetólan” tejadi di cerito ni, malahan tindakan wong yang jahat digunoke Allah óntók menui tójóan-Nyo yang mulyo óntók wong Israel. Liwat kitab ini, kito pacak belajar amen kuaso Allah memang idak tebates. Dio pacak nolong umat-Nyo mugola dalem pembuangan.

Selaén tu, cerito di kitab Ester ni jugo nyelesaike cerito di kitab 1 Samuel 15 di mano Rajo Saól diprénto Allah óntók ngancórke bangso Amalek samo slóró hartonyo. Allah mréntoke itu óntók mbales kejahatan yang dilakuke bangso Amalek ke bangso Israel di kitab Pembebasan 17:8-16 (jingokla jugo kitab Ulangan 25:17-19). Tapi bukannyo ngancórke bangso Amalek, Rajo Saól mala ngerampasi slóró hartonyo trós nyelametke Agag, rajo bangso Amalek tu. Ole karno tu, Rajo Saól ditolak ole Allah, trós Allah ngangkat Daód óntók gantikenyo. Di kitab Ester ni, Mordekai digambarke jadi ketórónan Saól, trós Haman digambarke jadi ketórónan Agag (jingokla catetan sekel di Ester 2:5 samo 3:1). Idak pecak Rajo Saól yang gagal nóróti prénto Allah, Mordekai berasél. Dengen petolongan Allah, Mordekai musnake ketórónan Agag yang jahat tu. Dengen cak itu, Allah nepati janji yang diomongke-Nyo di kitab Pembebasan 17:14.