1 Cak inila cerito yang tejadi pas jamannyo Ahasweros.^a Dio ni yang ngerajoi 127 propinsi, dari India sampe ke Etiopia.^*

2 Waktu tu, pas Rajo Ahasweros dódók di korsi kekuasoannyo di jeró benteng, di Kota Susan,^b 3 di taón ketigo pemeréntoannyo, dio ngadoke pesta besak óntók slóró pejabat kerajaan jugo hambanyo. Tentra Propinsi Media^c jugo tentra Kerajaan Persia, wong-wong ningrat kerajaan jugo pejabat-pejabat propinsi hadér di adepannyo. 4 Rajo Ahasweros ni mamerke kekayoan kerajaannyo yang mulyo jugo kehormatan keagóngannyo yang besinar selamo beari-ari, sampe setenga taón lamonyo.

5 Na, pas ari-ari pesta tu la selesai, rajo ngadoke pesta besak lagi óntók slóró rakyat yang ado di Benteng Susan, dari wong besak sampe wong kecik, selamo tójó ari, di halaman taman istana rajo. 6 Ya cacam! Jingok kaén lenan pótényo jugo kaén ungunyo! Dikebet makek tali alós póté jugo kaén mera ati, trós digantóng di batang perak jugo cagak marmer. Ado jugo bangku-bangku emas samo perak yang bekasór, di lantai batu porpiri, marmer, mutiaro, jugo batu mulyo laénnyo.^* 7 Minuman dihidangke dalem cangkér-cangkér emas yang bentóknyo belaénan. Banyu anggór kerajaan melimpa, sesuai dengen kebaék'an ati rajo. 8 Sesuai atóran rajo, minumnyo idak dibatesi,^* soalnyo rajo la ngenjók prénto ke slóró kepalak pelayan istananyo supayo kendak tiap wong ditóróti.

9 Na, sementaro tu, di istana kerajaan Rajo Ahasweros, Ratu Wasti jugo ngadoke pesta óntók betino-betino.

10 Pas ari ketójó, waktu ati rajo seneng karno minum anggór, dio mréntoke Mehuman, Bista, Harbona, Bigta, Abagta, Jetar, samo Karkas, iola ketójó kasém^d yang ngelayani rajo secaro pribadi. 11 Dio wong dipréntoke óntók gawak Ratu Wasti ngadep rajo makek mahkota kerajaan. Rajo nak mamerke kecindóan ratu ke rakyat jugo pejabat-pejabat karno dio cindó nian. 12 Na, tapi, Ratu Wasti ni nolak óntók dateng nóróti prénto rajo yang disampeke ole kasém-kasém tu. Laju, rajo jadi mara nian sampe-sampe kemarahannyo tu benyalo-nyalo.

13 Jadi, rajo betanyo samo wong-wong bijak yang paham pasal jaman-jaman, karno rajo memang biaso beróndéng ke segalo ahli undang-undang jugo hókóm. 14 Beberapo dari wong bijak tu yang paléng deket dengen rajo iola Karsena, Setar, Admata, Tarsis, Meres, Marsena, jugo Memukan, yang iola ketójó pejabat Persia samo Media yang pacak jingok rai rajo jugo yang punyo kedódók'an paléng penténg di dalem kerajaan.

15 Rajo betanyo cak ini, “Nórót undang-undang, apo yang harós dilakuke samo Ratu Wasti karno dio idak ngelakuke prénto aku yang la disampeke ole kasém-kasém tu?”

16 Sala sikok pejabat yang benamo Memukan nyawab di adepan rajo jugo ke slóró pejabat tu cak ini, “Ratu Wasti idak cuman besala samo Rajo bae, tapi dio jugo besala samo slóró pejabat jugo segalo bangso yang ado di slóró Propinsi Rajo Ahasweros. 17 Soalnyo, kelakuan ratu bakal diketaui slóró betino, sampe-sampe betino-betino bakal mandang renda lakinyo dengen omongan cak ini, ‘Rajo Ahasweros mréntoke supayo Ratu Wasti digawak ngadep dio, tapi ratu dak galak dateng.’ 18 Pas ari ni jugo, bini-bini wong ningrat Kerajaan Persia jugo Media yang la ndenger kelakuan ratu bakal ngomong cak itu pulok ke slóró pejabat rajo, sampe-sampe penghinoan samo kemarahan bakal belarót-larót lamonyo.

19 Jadi, amen baék nórót Rajo, metukela sikok surat prénto supayo Wasti dak pacak ngadep Rajo lagi. Surat prénto tu bakal ditólés dalem undang-undang Persia jugo Media supayo dak pacak dibatalke. Trós, biarla Rajo ngenjókke kedódók'an ratu ke betino laén yang lebé pantes dari dio. 20 Dengen cak itu, pas surat prénto rajo tu diómómke di slóró kerajaannyo yang besak nian ni, laju slóró bini, dari wong besak sampe wong kecik, bakal ngormati lakinyo.” Uji Memukan cak itu.

21 Ósólan tu dianggep baék ole rajo jugo pejabat-pejabatnyo, jadi rajo betindak sesuai dengen ósólan Memukan tu. 22 Ahérnyo, rajo ngérém surat-surat tu ke slóró propinsi daera kerajaannyo, ke tiap propinsi nórót tólésannyo jugo ke tiap bangso nórót basonyo. Surat-surat tu ngómómke amen tiap lanang harós jadi kepalak ruma tanggonyo trós ngomong makek baso dari bangsonyo dewek.