1 Seabés kejadian-kejadian tu, pas Rajo Ahasweros la idak mara lagi, rajo teinget dengen Wasti, apo yang la Wasti lakuke, jugo pasal yang la dipótóske óntóknyo. 2 Laju, ngomongla pelayan-pelayan rajo cak ini, “Biarla dicarike óntók Rajo gadés-gadés yang cindó. 3 Biarla Rajo ngangkat beberapo wakél di tiap propinsi kerajaan ni óntók ngómpólke slóró gadés yang cindó ke jeró Benteng Susan di balai góndék rajo, yang diawasi ole Hegai, iola kasém rajo yang betugas nyago betino-betino tu. Abés tu, biarla dio wong dienjók lólóran. 4 Kageknyo, gadés yang paléng disenengi di mato Rajo tu bakal jadi ratu óntók gantike Wasti.” Ósólan tu nyenengke ati rajo, jadi rajo ngelakukenyo.

5 Waktu tu ado sikok wong Israel benamo Mordekai yang tinggal di Benteng Susan. Dio ni anaknyo Yaér, ketórónan Simei, ketórónan Kis, dari suku Benyamin,^a 6 yang digawak dari Yerusalem ole Nebukadnejar, rajo Babel,^b dalem rombongan wong-wong yang dibuang besamo Yekonya, rajo Yehuda. 7 Mordekai ni ngasó anak betino mamangnyo yang benamo Ester, yang namo Ibraninyo iola Hadasa, soalnyo budak tu yatém piatu. Dio ni cindó jugo bagós badannyo. Pas aba samo emaknyo mati, dio diangkat anak ole Mordekai.

8 Seabés prénto jugo undang-undang rajo diómómke, banyak gadés dikómpólke ke jeró Benteng Susan trós diserake ke tangan Hegai. Ester jugo digawak masók ke jeró istana kerajaan. Dio ni jugo diawasi ole Hegai yang betugas ngórósi betino-betino tu. 9 Ester ni kejingok'an cindó nian di mato Hegai trós ndapet kebaék'an atinyo. Jadi, Hegai begancang ngenjók dio lólóran jugo pajóan kósós. Dio jugo ngenjókke tójó dayang péléan dari istana kerajaan óntók ngelayani Ester. Dio mindake Ester samo ketójó dayang-dayang tu ke tempat yang paléng bagós di balai góndék rajo.

10 Ester idak ngenjóktauke pasal kebangsoan jugo asal ósólnyo, soalnyo Mordekai la bepesen cak itu ke dio. 11 Tiap ari Mordekai bejalan-jalan di depan halaman balai góndék rajo óntók nyari tau keadaan Ester trós apo yang bakal tejadi dengen dio.

12 Sesuai dengen peratóran, tiap gadés tu dirawat selamo setaón sebelóm dapet géléran masók ngadep Rajo Ahasweros. Enem bulan petamo dio wong harós dirawat makek minyak damar wangi. Enem bulan selanjótnyo dio wong dirawat makek rempa-rempa jugo lólóran kósós betino. 13 Na, pas sikok gadés masók ngadep rajo, apo bae yang dio mintak óntók digawak dari balai góndék rajo ke jeró istana rajo harós dienjókke ke dio. 14 Gadés tu bakal masók pas ari mulai gelep. Besok paginyo dio bakal balék ke balai góndék rajo, tapi sekali ini ke dalem balai góndék rajo yang keduo. Balai tu diawasi ole Saasgas, yang iola kasém rajo yang betugas ngórósi góndék-góndék. Selanjótnyo, gadés tu dak bakal masók ngadep rajo lagi. Tapi, amen rajo galak samo dio jugo nyebótke namonyo, gadés tu baru pacak ngadep rajo lagi.

15 Tibola géléran Ester anaknyo Abihail, yang iola mamangnyo Mordekai, yang ngangkat Ester jadi anaknyo, óntók pegi ngadep rajo. Ester idak mintak apo-apo kecuali yang disaranke Hegai, kasém rajo yang ngórósi betino-betino tu. Ester ni disenengi di mato tiap wong yang nyingoknyo. 16 Ahérnyo dio digawak ngadep Rajo Ahasweros ke jeró istana rajo pas bulan ke-10, yang iola bulan Tebet,^c di taón ketójó pemeréntoan rajo tu.

17 Cinto rajo ke Ester ngelebéi cintonyo ke betino-betino laénnyo. Ester ni disenengi jugo ndapet kebaék'an rajo lebé dari gadés-gadés laénnyo. Jadi, rajo makekke mahkota kerajaan di palak Ester trós ngelanték dio jadi ratu gantike Wasti. 18 Abés tu, rajo ngadoke pesta besak óntók slóró pejabat jugo hambanyo, yang iola pesta besak óntók ngerayoke tepélényo Ester. Rajo ngómómke ari lébór di slóró propinsi kerajaan. Dio jugo mbagéke hadia ke wong-wong nórót kebaék'an atinyo.

19 Pas waktu gadés-gadés dikómpólke óntók yang keduo kalinyo, Mordekai dódók di lawang gerbang istana rajo. 20 Ester ni belóm ngenjóktauke asal ósól jugo kebangsoannyo, pecak yang la dipesenke Mordekai ke dio. Dio tetep nóróti prénto Mordekai pecak waktu Ester masé dalem asóannyo.

21 Waktu tu, pas Mordekai dódók di lawang gerbang istana rajo, duo kasém rajo jugo ado di sano. Keduo kasém tu benamo Bigtan samo Teres, yang gaweannyo nyago lawang gerbang istana rajo. Dio wong ni dendem nian samo rajo, trós berencano óntók ngabésinyo. 22 Na, pasal tu diketaui ole Mordekai. Dio ngenjóktaukenyo ke Ratu Ester. Ratu Ester langsóng ngelaporke ke rajo, ngewakéli Mordekai. 23 Pas pasal tu diselédék'i, ternyato bener nian. Ahérnyo, keduo kasém tu dicócókke di cagak kayu.^d Kejadian tu ditólés dalem kitab catetan sejara di adepan rajo.