1 Beberapo taón seabés kejadian-kejadian tu, Rajo Ahasweros ngenjók kekuasoan ke Haman anaknyo Hamedata, wong Agag.^a Rajo naékke pangkat Haman jugo netepke kedódók'annyo jadi yang paléng tinggi dari slóró pejabat yang ado di adepan rajo. 2 Slóró hamba rajo yang ado di lawang gerbang istana besójód, trós ngenjók hormat ke Haman, karno cak itula prénto rajo pasal dio. Tapi, Mordekai idak besójód jugo idak ngenjók hormat ke Haman.

3 Hamba-hamba rajo yang ado di lawang gerbang istana ngomong ke Mordekai cak ini, “Ngapo kau ngelanggar prénto rajo?” 4 Dio wong negor Mordekai beari-ari, tapi dio masé bae idak galak ndengerkenyo. Jadi, hamba-hamba tu ngenjóktauke pasal tu ke Haman óntók nyingok amen sikap Mordekai bakal betahan apo idak. Soalnyo, Mordekai la ngenjók tau dio wong amen dio tu wong Israel.

5 Na, pas Haman nyingok amen Mordekai idak besójód jugo idak ngenjók hormat samo dio, Haman jadi mara nian. 6 Tapi, Haman mandang alangke hinonyo amen dio cuman nak ngabési Mordekai bae, soalnyo wong-wong la ngenjóktauke kebangsoannyo Mordekai ke Haman. Ahérnyo, Haman berencano óntók musnake wong-wong yang sebangso dengen Mordekai, yang iola galo-galo wong Israel yang ado di slóró kerajaan Ahasweros.

7 Pas bulan petamo, yang iola bulan Nisan,^b di taón ke-12 kekuasoan Rajo Ahasweros, diuntalkela undi, yang disebót Pur.^c Undi tu diuntalke di adepan Haman óntók nentuke ari jugo bulan pelaksanaannyo. Asél dari undi tu nyampak di bulan ke-12, yang iola bulan Adar.^d

8 Haman ngomong ke Rajo Ahasweros cak ini, “Ado sikok bangso yang tepisa-pisa jugo tesebar di antaro bangso-bangso di slóró propinsi kerajaan Rajo. Undang-undang dio wong dak samo dengen undang-undang segalo bangso laén trós dio wong jugo idak nóróti undang-undang Rajo. Karno tu, idak pantes amen Rajo mbiarke dio wong. 9 Amen baék nórót Rajo, biarla dimetuke surat prénto óntók mbinasoke dio wong. Aku bakal mbayar 330 ton perak^e ke pejabat-pejabat yang besangkótan supayo dio wong masókke perak tu ke dalem kas kerajaan Rajo.”

10 Jadi, rajo ngelepaske céncén materai dari tangannyo, trós dienjókkenyo ke Haman anaknyo Hamedata, wong Agag, mósó wong Israel tu. 11 Rajo ngomong ke Haman cak ini, “Simpenla perak kau tu,^f trós bangso tu aku enjókke samo kau. Lakukela apo yang nórót kau baék.”

12 Pas ari ke-13 di bulan ke-1, iola bulan Nisan, tukang-tukang tólés rajo dipanggél Haman. Dio wong tu nóléske slóró yang dipréntoke Haman ke wakél-wakél rajo, jugo ke gubernór-gubernór yang njabat di tiap-tiap propinsi, jugo ke pejabat-pejabat tiap bangso. Surat tu ditóléske ke tiap-tiap propinsi nórót tólésannyo, trós ke tiap-tiap bangso nórót baso dio wong, makek namo Rajo Ahasweros jugo dimateraike makek céncén materai rajo.

13 Slóró surat tu dikérém liwat ótósan-ótósan ke slóró propinsi kerajaan. Isi surat tu iola prénto óntók ngancórke, mbunu, jugo mbinasoke slóró wong Israel dalem seari, dari yang mudo sampe yang tuo, budak-budak kecik jugo betino-betino. Surat tu jugo beisi prénto óntók ngerampas harto kepunyoan dio wong. Itu tu di ari ke-13 bulan ke-12, pas bulan Adar. 14 Salénan surat prénto tu dijadike undang-undang di tiap-tiap propinsi, trós diómómke ke slóró bangso supayo dio wong la siap pas ari tu dateng.

15 Ótósan-ótósan tu begancang pegi karno prénto rajo. Undang-undang tu jugo dimetuke di Benteng Susan. Rajo samo Haman dódók sambél minum-minum, sementaro Kota Susan geger!