11
Manusio berontak lagi dengen mbangón Menara Babel
1 Na, waktu tu, slóró wong di bumi cuman punyo sikok baso jugo kato-kato yang samo. 2 Pas dio wong ngelakuke pejalanan ke ara timur, dio wong nemuke sikok tempat yang luas di Tana Sineara trós tinggal di sano.
3 Dio wong saléng ngomong cak ini, “Payó kito mbékén batu bata trós nununyo sampe keras.” Batu bata tu dio wong pakek jadi pengganti batu, sementaro aspal jadi pengganti lemnyo. 4 Dio wong jugo ngomong cak ini, “Payó kito mbangón sikok kota dengen sikok menara yang ójóngnyo sampe ke langét,b supayo kito pacak mbékén namo kito ni jadi tekenal,* trós kito idak beserak'an di slóró bumi.”
5 Na, Allahyhwh tórón óntók nyingok'i kota jugo menara yang lagi dibangón ole anak-anak manusio tu. 6 Ngomongla Allahyhwh cak ini, “Jingokla! Dio wong ni sikok bangso, trós baso dio wong jugo sikok. Apolagi, ini ni baru awal dari usaha dio wong. Sekarang dio wong bakal sanggóp ngelakuke apo bae yang dio wong kendak'i. 7 Payó Kito tórón trós ngacauke baso dio wong, supayo dio wong idak pacak ngerti baso maséng-maséng.”
8 Jadi, cak itula Allahyhwh nyerakke dio wong dari sano ke slóró bumi, trós dio wong brenti mbangón kota tu. 9 Na, itula sebabnyo kota tu dinamoi Babel,c karno di sanola Allahyhwh ngacauke baso slóró bumi, trós dari sanola Allahyhwh nyerakke dio wong ke slóró bumi.
Daptar Ketórónan Semd
10 Inila riwayat ketórónan Sem.
Pas Sem beómór 100 taón, Arpaksad laér óntók dio, itu tu duo taón seabés banjér besak. 11 Seabés Arpaksad laér, Sem masé édóp 500 taón lagi. Dio punyo anak lanang betino laénnyo.
12 Pas Arpaksad beómór 35 taón, Selah laér óntók dio.e 13 Seabés Selah laér, Arpaksad masé édóp 403 taón lagi. Dio punyo anak lanang betino laénnyo.
14 Pas Selah beómór 30 taón, Eber laér óntók dio. 15 Seabés Eber laér, Selah masé édóp 403 taón lagi. Dio punyo anak lanang betino laénnyo.
16 Pas Eber beómór 34 taón, Peleg laér óntók dio. 17 Seabés Peleg laér, Eber masé édóp 430 taón lagi. Dio punyo anak lanang betino laénnyo.
18 Pas Peleg beómór 30 taón, Rehu laér óntók dio. 19 Seabés Rehu laér, Peleg masé édóp 209 taón lagi. Dio punyo anak lanang betino laénnyo.
20 Pas Rehu beómór 32 taón, Serug laér óntók dio. 21 Seabés Serug laér, Rehu masé édóp 207 taón lagi. Dio punyo anak lanang betino laénnyo.
22 Pas Serug beómór 30 taón, Nahor laér óntók dio. 23 Seabés Nahor laér, Serug masé édóp 200 taón lagi. Dio punyo anak lanang betino laénnyo.
24 Pas Nahor beómór 29 taón, Tera laér óntók dio. 25 Seabés Tera laér, Nahor masé édóp 119 taón lagi. Dio punyo anak lanang betino laénnyo.
26 Pas Tera beómór 70 taón, Abram, Nahor, samo Haran laér óntók dio.
Riwayat Ibrahém
Daptar ketórónan Tera
27 Inila riwayat ketórónan Tera.
Tera iola abanyo Abram, Nahor, jugo Haran. Haran punyo anak lanang, Lot. 28 Haran mati di tana kelaérannyo, di Kota Ur, yang iola daera wong Kasdim, pas abanyo masé édóp. 29 Abram samo Nahor ni bebini. Namo bini Abram iola Sarai, trós namo bini Nahor iola Milka, anaknyo Haran. Haran ni iola abanyo Milka samo Yiska jugo. 30 Na, tapi, Sarai ni mandól, dio ni katek anak.
31 Tera gawak Abram, anaknyo; samo Lot, cócóngnyo, yang iola anaknyo Haran; jugo Sarai, mantunyo, yang iola bininyo Abram. Dio wong metu besamo-samo dari Kota Ur, yang iola daera wong Kasdim, nak pegi ke Tana Kanaan. Tapi, pas dio wong sampe di Kota Haran, dio wong tinggal di sano.
32 Jadi, Tera édóp selamo 205 taón, trós dio mati di Haran.