1 Beberapo waktu seabés tu, Yesus nónjókke diri-Nyo lagi ke móréd-móréd-Nyo di Danau Tiberias.^a Dio nónjókke diri-Nyo dengen caro cak ini: 2 Na, pas di danau tu ado Simon Petrus, Tomas yang dipanggél Didimus, Natanael dari Kota Kana yang ado di Wilaya Galilea, anak-anak Jebedeus^@, jugo duo móréd-Nyo yang laén. 3 Simon Petrus ngomong samo dio wong cak ini, “Aku nak pegi njalo iwak.” Uji dio wong tu ke Petrus cak ini, “Kami ni nak melok jugo samo kau.” Dio wong berangkat trós pegi naék perau, tapi idak dapet asél apo-apo malem tu.

4 Pas ari la pajar, Yesus tegak di pénggér danau. Tapi, móréd-móréd-Nyo tu idak tau amen Dio tu Yesus.

5 Laju, Yesus ngomong samo dio wong cak ini, “Ói Nak, dapet iwak dak?” Uji wong-wong tu, “Idak.”

6 Yesus ngomong ke dio wong cak ini, “Untalkela jalo kamu ke sebela kanan perau, mangko kamu bakal ndapetkenyo.” Laju, dio wong nguntalke jalo tu, tapi sangkéng banyaknyo iwak tu dio wong dak kuat narék jalonyo.

7 Jadi, móréd yang dikaséhi Yesus^b tu ngomong ke Petrus cak ini, “Dio tu Tuan kito!” Laju, pas Simon Petrus denger amen itu tu Tuan Yesus, dio ngibetke jubanyo karno dio cuman makek kaos dalem bae, trós terjón ke danau. 8 Móréd-móréd yang laén jugo dateng dengen perau sambél narék jalo yang penu dengen iwak tu karno dio wong idak jaó dari darat, kiro-kiro jaraknyo 100 meter^* bae. 9 Pas sampe di darat, dio wong nyingok la ado roti jugo baro areng yang di pócóknyo ado iwak.

10 Yesus ngomong samo dio wong cak ini, “Gawakla beberapo iwak yang baru bae kamu tangkep tu.” 11 Laju, Simon Petrus naék ke perau trós narék jalo tu sampe ke darat. Jalo tu penu dengen 153 iwak yang besak-besak. Mugola iwaknyo banyak, jalo tu idak koyak. 12 Yesus ngomong samo dio wong cak ini, “Payó, makan dóken.” Tapi, dak katek di antaro móréd-móréd tu yang berani betanyo samo Dio, “Siapo nian Kau tu?” karno dio wong tau amen Dio tu Tuan Yesus. 13 Yesus maju ngambék roti, abés tu dienjókke-Nyo ke dio wong. Pecak itu jugo dengen iwak tu. 14 Itula yang ketigo kalinyo Yesus nónjókke diri ke móréd-móréd-Nyo seabés Dio dibangkétke dari antaro wong-wong mati.

15 Seabés dio wong makan, Yesus ngomong samo Simon Petrus cak ini, “Simon, anaknyo Yahya, apo kau ngaséhi Aku lebé dari galo-galonyo ni?”^c

Uji Petrus, “Iyo Tuan, Kau tau amen aku ni sayang samo Kau.”

Uji Yesus, “Piarola anak-anak domba Aku.”

16 Yesus ngomong samo Petrus óntók keduo kalinyo cak ini, “Simon, anaknyo Yahya, apo kau ngaséhi Aku?”

Uji Petrus ke Yesus, “Iyo Tuan, Kau tau amen aku ni sayang samo Kau.”

Uji Yesus, “Jagoi domba-domba Aku.”

17 Yesus ngomong samo Petrus óntók ketigo kalinyo cak ini, “Simon, anaknyo Yahya, apo kau sayang samo Aku?”

Petrus jadi sedé karno Yesus ngomong óntók ketigo kalinyo, “Apo kau sayang samo Aku?” Trós dio ngomong samo Yesus cak ini, “Tuan, Kau tu tau segalonyo, Kau tu tau amen aku ni sayang samo Kau.”

Uji Yesus, “Piarola domba-domba Aku. 18 Aku ngomong nian samo kau, pas kau masé mudo, kau ngebet pinggang kau dewek, trós kau bejalan ke mano bae yang kau kendak'i, tapi pas kau la tuo, kau bakal ngenjókke tangan^d kau trós wong laén bakal ngebet pinggang kau, jugo gawak kau ke tempat yang idak kau kendak'i.” 19 Pasal ni diomongke Yesus óntók nónjókke cakmano caro Petrus mati kageknyo óntók mulyoke Allah. Seabés ngomong cak itu, Dio ngomong samo Petrus cak ini, “Melokla Aku.”

20 Pas Petrus nole, dio nyingok móréd yang dikaséhi Yesus tu lagi melok'i dio wong. Dio nila móréd yang besender ke Yesus pas dio wong lagi makan malem trós ngomong, “Tuan, siapo nian yang bakal nyerake Kau?”^e 21 Na, pas Petrus nyingok móréd tu, dio ngomong ke Yesus cak ini, “Tuan, cakmano dengen móréd tu?”

22 Uji Yesus ke Petrus cak ini, “Amen Aku galak móréd ni tetep édóp sampe Aku dateng, itu tu bukan órósan kau. Kau tu melokla Aku.” 23 Laju, tesebarla kabar di antaro dólór-dólór yang pecayo Yesus amen móréd tu dak bakal mati, tapi Yesus idak ngomong ke Petrus amen móréd tu idak bakal mati, tapi “Amen Aku galak móréd ni tetep édóp sampe Aku dateng, itu tu bukan órósan kau.”

24 Dio nila móréd yang ngenjók kesaksian pasal galo-galonyo tu. Dio jugola yang la nóléskenyo trós kito tau amen kesaksiannyo tu bener.

25 Masé banyak lagi pasal-pasal yang dilakuke Yesus, tapi amen galo-galonyo tu ditóléske sikok-sikok, aku pékér dunio ni dak bakal muat amen galo-galonyo tu dibukuke.