Kitab Cerito Rosul-Rosul diyakéni ditólés ole Lukas, yang jugo nólés kitab Lukas. Dio ni idak cuman nólés bae, tapi jugo jadi saksi mato dari beberapo kejadian pas dio lagi besamo dengen Paólós. Ole karno tu, Lukas seréng makek kato kami pas dio nóléske kejadian tu di kitab ni.

Kitab ni nyeritoke pasal Yesus ngérém Ro Suci óntók mémpén pengékót-pengékót-Nyo, supayo dio wong pegi ke bangso-bangso trós ngajak wong-wong di sano óntók jadi pengékót Yesus jugo. Sebenernyo, pacak dikatoke Ro Suci jadi kónci dari kitab Cerito Rosul-Rosul ni. Liwat Ro Suci inila iman pengékót-pengékót-Nyo betómbó. Ro Suci ngenjók kepacak'an jugo keberanian ke rosul-rosul jugo pengékót-pengékót Yesus óntók békén mujijat-mujijat samo nyebarke Kabar Baék amen Yesus iola Almasi ke slóró wong, mugola ke wong-wong Israel apo ke wong-wong bukan Israel. Pasal tu pecak yang la diomongi Yesus sebelóm Dio teangkat ke surgo amen dio wong bakal jadi saksi-saksi-Nyo di Yerusalem, di slóró Yudea samo Samaria, jugo sampe ke ójóng bumi (1:8).

Di kitab Cerito Rosul-Rosul inila óntók petamo kalinyo pengékót Yesus disebót “Wong Kristen” (11:26). Trós di situ Lukas jugo ngambarke keédópan jemaah yang pecayo samo Yesus jadi pecak Ruma Allah yang baru karno dio wong saléng betolongan (2:43-47, 4:32-37) jugo karno Ro Allah ado di antaro dio wong (5:1-11).

Liwat penyebaran Kabar Baék, Kerajaan Allah mulai dinyatoke di antaro manusio liwat wong-wong yang la nerimo ati baru jugo mélé óntók édóp sesuai prénto Allah. Kitab Cerito Rosul-Rosul jugo nyelaske apo yang harós dilakuke wong yang pecayo óntók jadi anggota Kerajaan Allah (10, 15).

Pacak dikatoke penyebaran gereja mulo-mulo di Yerusalem, Yudea, Samaria dipémpén ole Petrus, Yahya, jugo Pilipus (1–12). Penyebaran gereja di luar Israel dipémpén ole Paólós, sampe ke Kota Roma, yang ngahéri isi dari kitab Cerito Rosul-Rosul ni (13–28).