12
Rajo Herodes Agripa mbunu Yakób trós nangkep Petrus
1 Kiro-kiro waktu tu, Rajo Herodesa nangkep beberapo anggota jemaah óntók dianiayo. 2 Dio mbunu Yakób, dólórnyo Yahya,b makek pedang. 3 Pas Herodes nyingok amen pasal tu nyenengke ati wong Israel, dio ngelanjótke dengen nangkep Petrus pulok. Na, kejadian tu tejadi pas ari rayo Roti Dak Beragi. 4 Seabés dio nangkep Petrus, Herodes masókke dio ke jeró penjaro. Dio diserake samo empat kelompok prajórét óntók jago Petrus. Setiap kelompok ado empat prajórét. Herodes bemaksód ngadéli dio di adepan wong banyak seabés Paska.
5 Sementaro Petrus ditahan di jeró penjaro, jemaah-jemaah bedoa nian ke Allah pasal Petrus.
Allah nyelametke Petrus
6 Na, pas malem tu, sebelóm Herodes nak gawak Petrus metu ke adepan wong banyak, Petrus ni lagi tédók di antaro duo prajórét sambél tekebet duo rante. Jugo, di depan lawang ado prajórét-prajórét yang jago lawang penjaro tu. 7 Tibo-tibo sikok malekat Allah‡ tegak di parak Petrus. Ado cahayo besinar di sel penjaro tu. Laju malekat tu nepók sebela badan Petrus óntók mbangónkenyo, sambél ngomong cak ini, “Bangónla gancang!” Rante-rante tadi telepas dari tangannyo.
8 Uji malekat tu samo Petrus, “Iketla pinggang kau. Pakekla selop kau.” Jadi, Petrus ni nóróti apo yang diomongke ole malekat tu. Uji malekat tu lagi, “Pakekla juba kau. Melokla aku.” 9 Jadi, Petrus ni metu trós melok'i malekat tu. Tapi, Petrus dak tau amen apo yang dilakuke ole malekat tu nian-nian tejadi. Petrus ni nyangko amen dio lagi nyingok penjingok'an. 10 Pas Malekat tu samo Petrus la ngeliwati prajórét petamo jugo keduo, dio wong sampe di gerbang besi yang nuju ke kota. Gerbang tu tebukak dewek óntók dio wong. Ahérnyo, dio wong metu trós bejalan ngeliwati sikok lorong. Na, tibo-tibo malekat tadi ninggalke Petrus.
11 Na, pas Petrus nyadari apo yang tejadi dengen dirinyo, dio ngomong cak ini, “Sekarang, aku tau nian amen Allah‡ ngótós malekat-Nyo, trós nyelametke aku dari tangan Herodes jugo slóró yang diarepke ole wong-wong Israel.”
12 Seabés Petrus nyadarinyo, dio pegi ke ruma Mariam, emaknyo Yahya yang jugo disebót Markós. Di situ banyak wong lagi bekómpól jugo bedoa. 13 Pas Petrus ngetok gerbang tu, sikok babu betino benamo Rode dateng óntók mbukaknyo. 14 Na, pas dio nyireni amen itu suaro Petrus, dio kesenengan nian. Bukannyo mbukak'i pintu, malahan dio lari ke buri ngenjóktauke amen Petrus lagi tegak di depan gerbang tu.
15 Uji dio wong ke Rode, “Kau ni gilo!” Tapi, Rode ni terós-terósan bae ngomongi amen itu memang Petrus nian. Wong-wong tu ngomong, “Itu tu malekatnyo.”c
16 Tapi Petrus ni terós-terósan ngetok. Ahérnyo, dio wong mbukak gerbang. Pas nyingok Petrus, dio wong tekejót nian. 17 Petrus ngenjók tando dengen tangannyo supayo dio wong diem. Dio nyeritoke samo dio wong cakmano Allah gawak dio metu dari penjaro. Laju, Petrus ngomong cak ini, “Enjók taukela pasal-pasal ni ke Yakóbd jugo ke dólór-dólór kito yang laén.” Abés tu, Petrus metu pegi ke tempat yang laén.
18 Pas paginyo, kekacauan yang besak tejadi di antaro prajórét-prajórét, pasal apo yang la tejadi samo Petrus.
19 Na, pas Herodes nyari Petrus tapi idak nemukenyo, dio merikso prajórét-prajórét tu, trós ngenjók prénto supayo dio wong dibunu. Ahérnyo, Herodes pegi dari Yudea ke Kaisarea trós tinggal cókóp lamo di sano.
Rajo Herodes Agripa mati
20 Waktu tu, la lamo Herodes Agripa ni mara nian samo wong-wong Tirus jugo Sidon. Jadi, wong-wong tu seati sepékér pegi ngadep dio. Petamo-tamo dio wong mbójók Blastus óntók bepiak ke dio wong. Dio ni iola kepalak istana Herodes. Dio wong mintak óntók bedamai, soalnyo pajóan óntók negri dio wong ni begantóng samo daera kekuasoan Rajo Herodes.
21 Pas ari yang la ditentuke, Herodes makek baju kerajaan dódók di korsi kekuasoan, abés tu bepidato ke dio wong. 22 Wong-wong yang ndengerke dio mekék, “Ini ni suaro dewo, bukan suaro manusio!” 23 Langsóng bae Herodes ditampar ole malekat Allah‡ karno dio idak mulyoke Allah. Jadi Herodes ni mati dimakani cacéng.
Barnabas samo Saólós balék ke Antiokia