Allahyhwh - Setiap kali tejingok kato ni (óróp besak galo), artinyo yang tetólés di teks aslinyo bukan kato Allah, tapi namo YHWH. Mangko, kato ALLAH yang ditólés makek óróp besak galo idak samo dengen kato Allah yang ditólés makek óróp besak di awal bae. YHWH tu iola namonyo Allah yang diwahyuke-Nyo ke Nabi Musa di Gónóng Horeb (Pembebasan 3:15). Namo YHWH tu móngkén diucapke “Yahwe” trós artinyo ‘Yang Kekal’. Tapi ado tradisi lamo yang dak nyebótke namo YHWH soalnyo takót dianggep ngotori namo tu. Jadi banyak wong makek kato pengganti, contonyo Allah apo Tuhan.

Almasi - Arti istila ni iola ‘wong yang dilanték’ , samo pecak kato “Kristus” jugo “Mesias”. Dalem Pejanjian Lamo, Allah bekali-kali janjike amen sikok Wong Yang Dilanték bakal dateng óntók jadi Rajo Penyelamet óntók umat Allah.

Anak Manusio - Ini ni gelar yang Yesus pakek óntók diri-Nyo dewek yang diambék dari Danil 7:13-14. Istila ni idak bemaksód óntók negeske amen Yesus iola manusio, tapi nónjókke amen Diola rajo dunio yang dateng dari Allah trós punyo hak óntók merénto selamo-lamonyo.

Anak-Nyo Allah - Ini ni sebótan óntók Yesus. Nórót Alkitab, cuman ado sikok Tuhan (iola Allah), tapi Tuhan tu ado tigo pribadi: Aba, Anak, samo Ro Suci. Ketigo pribadi tu iola Allah dari mulonyo, trós tiap pribadi tu punyo hóbóngan kósós dengen yang laénnyo.

Betania - Betania iola dósón yang ado di sebela timur Bókét Jaitun. Letaknyo kiro-kiro tigo kilometer dari Yerusalem.

Betsaida - Betsaida iola kampóng halaman Andreas, Petrus, jugo Pilipus. Kota ni letaknyo di timur laót Danau Galilea. Yesus nyembóke sikok wong buto di sini trós ngenjók pajóan ke 5.000 wong di daera yang parak kota ni.

Danau Galilea - Danau besak (11 km x 22 km) yang letaknyo di Wilaya Galilea trós jugo disebót “Danau Geneseret”. Danau ni dikeléléngi gónóng trós seréng diliwati angin besak. Danau ni jugo iola sumber iwak óntók daera tu. Sungi Yordan ngalér dari ójóng selatannyo.

Danau Geneseret - Jingokla “Danau Galilea”.

Daód - Dio ni rajo yang paléng penténg jugo yang paléng dicintoi di sejara bangso Israel. Keédópan Rajo Daód diceritoke di 1 Samuel 16–31, 2 Samuel 1–24, 1 Rajo-Rajo 1–2, jugo 1 Riwayat 11–29. Sebagéan dari saér nyanyian di kitab Saér Nyanyian ditólés ole Nabi Daód.

Dekapolis - Namo ni dalem baso Yunani maksódnyo ‘sepóló kota’ trós nónjókke sekelompok kota yang ado di sebela timur dari Danau Galilea jugo Sungi Yordan. Kota-kota ni iola kota pedagangan samo dunio luar jugo jadi pusat budayo Yunani di antaro Israel. Ini ni ngasélke kekayoan óntók kota-kota ni, tapi jugo nyebabke wong-wong Dekapolis dianggep pecak wong luar ole banyak wong Israel laén.

Elias - Wong Israel nganggep amen Nabi Elias ni sala sikok nabi yang tebesak. Dio édóp kiro-kiro 850 taón sebelóm jaman Yesus. Waktu tu, Dio ngelawan Rajo Ahab jugo bininyo soalnyo dio wong mémpén Israel óntók nyemba patóng. Dio idak mati, tapi diangkat ke surgo (2 Rajo-Rajo 2:1-18 ). Cerito pasal keédópan jugo pelayanan Nabi Elias pacak dibaco di kitab 1 Rajo-Rajo 17–22 jugo kitab 2 Rajo-Rajo 1–2. Wong-wong Israel nganggep amen Nabi Elias ni bakal dateng lagi (jingok Maleaki 4:5).

Galilea - Ini ni sala sikok dari tigo Propinsi Israel pas jaman Yesus. (Yang laénnyo iola Samaria jugo Yudea.) Letaknyo di bagéan utara Palestina. Kota Kapernaum samo Dósón Najaret temasók di dalemnyo. Sebagéan besak pelayanan Yesus tejadi di Galilea, trós ke-12 móréd-Nyo asalnyo dari situ jugo.

Harón - Dio ni dólór Musa. Allah mélé Harón samo slóró ketórónan lanangnyo jadi imam. Jadi Harón ni iola imam besak yang petamo. Jingokla jugo kato kónci “imam”.

Herodes - Dalem Pejanjian Baru ado empat rajo yang benamo Herodes:

Hókóm Taurat - Istila ni óntók nónjókke ajaran-ajaran jugo hókóm-hókóm yang dienjók dalem kelimo kitab yang ditólés Nabi Musa: Asal Mulo Dunio, Pembebasan, Imamat, Kelóyóran di Górón, jugo Ulangan.

Hókóm Musa - Istila ni samo dengen Hókóm Taurat.

Ibrahém - Dio ni sikok wong yang édóp kiro-kiro 2 ribu taón sebelóm Yesus. Allah mélé Ibrahém óntók jadi nenek moyang sikok bangso yang bakal jadi umat péléan-Nyo trós óntók jadi berkah yang ngarake slóró dunio ke Allah (Asal Mulo Dunio 12:1-3). Secaro pisik, Ibrahém iola nenek moyang bangso Israel. Secaro rohani, Ibrahém dianggep nenek moyang slóró wong yang pecayo jugo yang nóróti Allah (Galatia 3:7-9,29). Keédópan Ibrahém diceritoke di Asal Mulo Dunio 11:27–25:11.

Israel - Ini ni namo bangso di daera Palestina yang mano galo-galo ketórónannyo dari cócóng Ibrahém yang benamo Yakób. Yakób ni jugo disebót Israel. (Jingokla jugo “Yakób” di kamus ni.) Bangso Israel dibagé jadi 12 suku sesuai dengen ketórónan ke-12 anak lanang Yakób. Di Pejanjian Lamo, bangso Israel dipélé Allah óntók jadi umat-Nyo trós óntók jadi berkah yang ngarake slóró dunio ke Allah. Wong Israel disebót jugo wong Ibrani apo dak tu wong Yahudi, tegantóng dengen penggunoannyo. Ketigo istila ni ampér samo.

Kapernaum Ini ni sikok kota kecik di daera Galilea, di barat laót dari Danau Galilea. Kota ni jadi pusat pelayanan Yesus.

Kelóyóran di Górón - Namo kitab Bilangan dalem TBP.

Kemah Petemuan - Pas Allah mémpén wong Israel metu dari Mesir, Dio ngongkon Nabi Musa óntók mbangón Kemah Petemuan (Pembebasan 25:1-9) óntók jadi tempat petemuan antaro Allah samo wong Israel. Hadérat Allah menui Kemah Petemuan tu, trós Dio tinggal di sano di antaro wong Israel ratósan taón. Kageknyo, Kemah Petemuan tu digenti dengen Ruma Agóng Allah yang dibangón ole Rajo Suleiman (2 Samuel 7:10-13; 1 Rajo-Rajo 5:1-5). Jingokla jugo kato kónci “Ruma Agóng Allah”.

Kerajaan Allah - Kerajaan Allah iola di mano bae Allah diakui ole umat-Nyo jadi Rajo dio wong, sampe-sampe dio wong melok'i jalan-Nyo Allah dengen sempurno. Asélnyo iola kerajaan yang penu kebaék'an jugo damai sentosa. Kerajaan Allah tu idak tebates cuman di surgo apo di maso depan bae. Yesus gawak kabar baék amen Kerajaan Allah yang la lamo dijanjike tu mulai jadi nyato dikit-dikit kósósnyo di antaro wong-wong yang nerimo ati yang baru dari Allah trós mélé óntók édóp nórót prénto Allah di dunio ni. Mugola la mulai nyato, Kerajaan Allah tu dak bakal hadér sepenunyo sampe disempurnoke Allah di ahér jaman.

Mahkama Agama - Mahkama Agama ni iola kelompok pemémpén bangso Israel pas jaman Yesus. Imam Besak iola ketuo dari Mahkama Agama tu. Tapi ado jugo anggota-anggota laénnyo pecak 22 imam, 22 wong yang dituoke, samo 22 ahli Kitab Suci. Dio wong mémpén bangso Israel tapi kuaso Mahkama Agama ni tebates (Yahya 18:21) soalnyo dio wong masé di bawa kuaso Gubernór Romawi.

Musa, Nabi - Nabi Musa ni ketórónan Lewi, trós Musa dianggep nabi yang tebesak di Israel. Diola yang dipakek Allah óntók mbebaske umat Israel dari perbudakan di Mesir, trós dienjók Prénto Allah pas di Gónóng Sinai (pasal ni diceritoke di kitab Pembebasan). Nabi Musa jugola yang mémpén umat Israel pas dio wong bekelóyóran di padang górón selamo 40 taón (pasal ni diceritoke di kitab Kelóyóran di Górón). Sebelóm dio mati, Nabi Musa ngelanték Nabi Yosua óntók gantike dirinyo mémpén Israel masók ke Tana Pejanjian. Nabi Musa jugo dianggep penólés kitab Asal Mulo Dunio, kitab Pembebasan, kitab Imamat, kitab Kelóyóran di Górón, jugo kitab Ulangan.

Najaret - Sikok kota yang letaknyo di bagéan timur daera Galilea. Dósón kecik ni iola tempat tinggal Yósóp samo Mariam pas dio wong dienjók tau amen Yesus bakal laér. Dio wong balék lagi ke sano pas Yesus masé kecik (Lukas 2:39, 40, 51), jadi Najaret jugo iola kampóng-Nyo Yesus.

Parisi - Ini ni partai agama wong Israel yang cókóp begaéra pasal Prénto Allah. Dio wong jugo pecayo samo slóró kitab suci wong Israel trós seréng dipelajarinyo. Selaén kitab suci, dio wong jugo pecayo samo “tradisi lelóhór” yang dianggepnyo samo penténg pecak kitab-kitab suci. Pasal ni seréng nyebabke pedebatan antaro dio wong samo Yesus. Wong Parisi jugo ngargoi nian upacara samo adat wong Israel, sampe-sampe banyak wong Parisi diséndér ole Yesus karno lebé ngargoi upacara samo adat dibandéngke ketólósan ati, yang sebenernyo lebé penténg.

Paska - Beda dari ari rayo wong Kristen, kato Paska di Alkitab nónjókke ari rayo wong Ibrani. Paska iola ari petamo dari perayoan tójó ari yang disebót Roti Dak Beragi. Pas jaman Yesus, wong-wong Israel ngerayoke Paska di Yerusalem, dengen makan domba sembeléhan jugo roti dak beragi. (Jingok Pembebasan 13:3-10 jugo Ulangan 16:1-8.)

Pembebasan - Namo kitab Keluaran dalem TBP.

Peta Cerito Rosul-Rosul 9-11

Peta Pejalanan Paólós

Peta Pejalanan Paólós ke Roma

Pilatus - Pontius Pilatus iola wong Romawi yang ditónjók jadi Gubernór Propinsi Yudea dari 26M sampe 36M. Dio ni yang nyetujui tóntótan pemémpén-pemémpén Israel óntók ngókóm mati Yesus.

Propinsi Asia Asia ni bukan benua tapi sikok daera kekuasoan Romawi yang mak ini ari ado di Turki. Kota Epesus ado di propinsi ni.

Prénto Allah - Istila ni pacak ado tigo makno bedasarke penggunoannyo: (1) slóró Pejanjian Lamo, (2) kelimo kitab petamo Pejanjian Lamo, amen dak tu (3) cuman prénto-prénto, petónjók-petónjók, jugo hókóm-hókóm yang dienjókke ke bangso Israel di kelimo kitab petamo tu.

Rabi - Kato ni dari baso Ibrani/Aram yang artinyo ‘guru’. Rabi ni iola gelar yang dipakek wong Israel óntók nónjókke raso hormat samo guru-guru agama dio wong yang paléng hebat.

Ro Suci - Pas jaman Pejanjian Lamo sampe jaman-Nyo Yesus, Ro Suci kadang-kadang menui wong. Dio ngenjók kuaso cuman sementaro bae óntók nyalanke tójóan dari Allah. Tapi mak ini ari, sejak Ro Suci dienjók abés Yesus balék ke surgo (Cerito Rosul-Rosul 2), Ro Suci tu menui wong yang pecayo samo Yesus. Wong-wong ni dipenui secaro permanen, bukan sementaro bae. Ke wong yang pecayo samo Yesus, Ro Suci ngenjók kuaso óntók nolak duso jugo óntók édóp sesuai dengen kendak Allah. Dikit-dikit, Ro Suci ngoba wong yang pecayo óntók jadi wong suci pecak Yesus.

Ruma Agóng Allah - Ini ni bukan ruma ibada biaso, malahan sikok-sikoknyo tempat di dunio di mano hadérat Allah tinggal pas jaman tu. Tempatnyo ado di Kota Yerusalem, trós wong Israel nyemba Allah di tempat tu. Mak ini ari, Ruma tu dak katek lagi karno la diancórke ole tentra Roma pas taón 70 M.

Sabat - Ini ni ari óntók istirahat jugo ibada. Dalem agama wong Israel, wong dak bole gaweke apo bae dari Jumat magréb sampe Sabtu magréb. Prénto ni dienjókke ole Allah ke Israel di Pembebasan 20:8-11. Pasal ni bedasarke Asal Mulo Dunio 2:1-3 di mano Allah istirahat pas ari ketójó, seari abés Dio nyelesaike penciptoan dunio.

Saduki - Saduki iola namo sikok kelompok wong dalem agama wong Israel yang bekuaso pasal agama jugo politik. Kebanyak'an imam besak jugo anggota Mahkama Agama iola wong Saduki. Wong-wong ni dak pecayo amen ado kebangkétan pasal wong mati jugo keédópan seabés ari kiamat. Dio wong jugo idak pecayo amen Almasi bakal dateng, trós dio wong ni jugo cuman pecayo samo kitab yang ditólés ole Musa.

Samaria - Dalem Pejanjian Lamo, Samaria iola namo kota yang jadi ibu Kota Kerajaan Israel Utara. Dalem Pejanjian Baru, Samaria iola namo propinsi yang letaknyo di utara dari Propinsi Yudea jugo selatan dari Wilaya Galilea. Pas jaman Yesus, wong Samaria dibenci nian ole wong Israel karno banyak alesan, temasók:

Sion - Sion ni nónjókke tempat hadérat Allah di bumi, iola Kota Yerusalem jugo Ruma Agóng Allah yang ado di dalemnyo. Karno Yerusalem ado di pócók bókét, seréng disebót Bókét Sion.

TBP - Alkitab Tejemahan Baso Plembang

Wong Yang Dilanték - Istila ni samo dengen Almasi, Mesias, jugo Kristus. Dalem Pejanjian Lamo, Allah bekali-kali janjike amen sikok Wong Yang Dilanték bakal dateng óntók jadi Rajo Penyelamet óntók umat Allah. Jingokla jugo kato “lanték”.

Yahya Pembaptés - Namo Yahya iola namo umum pas jaman tu. Ado beberapo wong dalem Alkitab yang benamo Yahya, pecak Yahya móréd Yesus, Yahya Pembaptés, abanyo Petrus, jugo beberapo penólés surat-surat Yahya jugo kitab Wahyu. Yahya Pembaptés iola nabi yang nyiapke wong-wong Israel óntók kedatengan Almasi, yang iola Yesus. Dio manggél wong-wong Israel tu óntók betobat trós dibaptés (Lukas 3:1-20 , jingok jugo baptés). Sebelóm Yesus mulai pelayanan-Nyo, Dio jugo dibaptés ole Nabi Yahya (Lukas 3:21-22). Nabi Yahya ditolak ole pemémpén-pemémpén Israel (Lukas 20:3-7 ) trós ahérnyo dibunu ole Rajo Herodes (Markós 6:14-29). Tapi, Nabi Yahya ni bukan sala sikok dari penólés Kitab Suci.

Yakób - Yakób iola cócóng Ibrahém. Ishak iola abanyo. Allah mberkahi Yakób trós ngenjók namo baru ke dio, iola namo Israel (jingokla Asal Mulo Dunio 32:28; 35:10). Selaén namo pribadi, namo Yakób kadang-kadang dipakek óntók nónjókke slóró ketórónannyo, yang iola bangso Israel. Ke-12 anak lanang Yakób yang jadi kepalak ke-12 suku bangso Israel.

Yehuda - Ini ni sala sikok suku bangso Israel. Aba lelóhór suku ni iola Yehuda, anaknyo Yakób. Daera Yehuda di jaman Alkitab ado di bagéan selatan Israel. Yehuda itu iola daera penténg karno Kota Yerusalem jugo Ruma Agóng Allah ado di jerónyo, trós Rajo Daód samo Yesus Almasi beasal dari suku ni. Pas bangso Israel dibagé jadi duo kerajaan, Yehuda jadi Kerajaan Selatan.

Yerusalem - Ini ni ibu kota kuno bangso Israel samo tempat pusat budayo jugo agama wong Israel. Rajo Daód yang mbékénnyo jadi ibu kota pas dio ngalakenyo dari wong-wong Yebus. Di sano Ruma Agóng Allah dibangón. Letaknyo di pócók bókét besak di daera Timur Tenga, trós masé ado mak ini ari. Jingokla jugo kato kónci “Sion” samo “Ruma Agóng Allah”.

Yudea - Pas jaman Yesus, namo ni pacak nónjókke slóró daera Palestina, amen dak tu bagéan selatan bae. Yerusalem tetep temasók di dalemnyo.

ahli Hókóm Musa - Kato ni nónjókke sekelompok wong yang samo dengen ahli kitab suci. Istila ni dipakek amen penólés cuman nak musatke Hókóm Musa bae, iola prénto-prénto Allah di Pejanjian Lamo.

ahli Kitab Suci - Kato teks asli yang ditejemake “ahli Kitab Suci” artinyo ‘ahli tólés’. Dalem agama wong Israel, dio wong betugas óntók nyalén naska-naska Kitab Suci sesuai dengen caro yang kósós. Dio wong jugo pacak jadi guru agama yang tugasnyo iola melajari kitab-kitab suci trós ngajarkenyo. Ini ni iola arti yang biaso dalem Alkitab.

baptés - Kato ni dipinjem dari baso Yunani (kato asli: baptizo). Makno kato ni iola ‘pencelópan’, biasonyo pencelópan kaén óntók dienjók warno. Maknonyo dalem agama wong Israel iola pencelópan wong supayo disucike. Cak itula baptésan dari Yahya. Kageknyo, óntók wong-wong yang melok'i Yesus abés kebangkétan-Nyo, upacara ni jadi gambaran cakmano wong yang betobat la nerimo keédópan baru dalem Yesus.

imam - Tugas imam dalem agama wong Israel pas jaman tu beda nian dengen tugas pendeta apo imam mak ini ari. Tugas utamo imam dalem agama wong Israel bukan becerama, tapi ngenjókke kórban bakaran ke Allah jugo jadi penenga antaro Allah samo manusio. Slóró imam Israel iola ketórónan Harón. Dio wong ngelayani di Ruma Agóng Allah di Yerusalem secaro begéléran, bukan di ruma ibada biaso, karno dalem agama wong Israel kórban sembeléhan cuman bole dienjók di Ruma Allah tu.

imam besak - Imam ni punyo jabatan paléng tinggi dari slóró imam-imam yang ado di agama wong Israel. Dio jugo jadi ketuo Mahkama Agama wong Israel, tapi katek kuaso dalem pemeréntoan Roma.

kabar baék - Kabar baéknyo iola, sangkéng Allah ngaséhi manusio mangkonyo Dio bebuat keselametan óntók umat-Nyo liwat Yesus, sampe-sampe duso dio wong pacak diapóske trós hóbóngan dio wong dengen Allah pacak dibeneri. Jadi siapo bae yang dateng ke Yesus dengen ati yang betobat bakal nerimo idak cuman pengapósan duso dio tempo dulu, tapi jugo ati yang baru supayo dio pacak mélé óntók nyalanke édóp sesuai kendak Allah.

kaisar - Sebótan óntók penguaso yang mrénto di kerajaan Romawi. Pas jaman Yesus, kerajaan Romawi nyaja bangso Israel.

kórban bakaran : Kórban bakaran di sini iola binatang yang dibakar slórónyo dengen api. Katek sikok bagéan yang dari binatang tu yang idak tebakar, jadi katek bagéan yang pacak dimakan. Mbakar binatang di mesba iola sala sikok caro óntók ngormati Allah. Tapi pacak jugo jadi caro óntók nebós duso pas jaman tu.

lanték - Dalem tradisi wong Ibrani, sikok wong dilanték dengen caro nuangke minyak yang wangi ke pócók palaknyo. Upacara ini iola tando amen wong tu la nerimo gawean kósós dari Allah. Dalem budayo Ibrani, rajo (2 Samuel 5:3; 1 Rajo-Rajo 1:39), imam (Pembebasan 30:22-33; Imamat 8:12-13), jugo nabi (1 Rajo-Rajo 19:16) iola jabatan yang dilanték pakek caro ni.

malekat - Dio ni mahlók surgawi yang diciptoke Allah óntók jadi pelayan-Nyo sebelóm alam semesto diciptoke. Dalem baso asli, malekat maksódnyo ‘ótósan’. Dio diótós Allah óntók gaweke tójóan-Nyo di dunio.

mesba - Ini ni tempat di mano kórban sembeléhan ditunu óntók Allah. Sebelóm Nabi Musa, mesba dibékén dari batu di mano bae, ole siapo bae. Tapi abés Kemah Petemuan dibékén, slóró pesembahan tu disembake liwat imam, trós mesba cuman ado di Kemah Petemuan. Kageknyo, pas Ruma Agóng Allah la dibangón, mesba ado di situ.

móréd - Dalem budayo wong Israel, amen wong nak jadi móréd sikok rabi (iola guru agama wong Israel), wong tu bakal melok'i rabi tu ke mano bae dio pegi sampe dio dewek siap óntók jadi rabi jugo. Dio bakal melok'i slóró kegiatan rabi tu sampe-sampe ninggalke slóró yang dio punyo trós tinggal samo rabinyo. Dio bakal nyonto gurunyo, idak cuman nyerep ilmunyo bae.

penagé pajak - Dio ni wong yang dianggep penghianat jugo wong beduso ole sesamo wong Israel. Alesannyo karno dio tu begawe óntók pemerénto Romawi yang lagi nyaja wong Israel pas jaman tu, jugo karno dio tu galak nage pajak lebé dari yang seharósnyo.

perwira - Istila teks asli nónjókke tentra Romawi yang mémpén 80 prajórét. Sikok legion iola pasókan militer Romawi yang ado kiro-kiro 5.250-6.000 tentra. Dalem sikok legion ado kiro-kiro 60 perwira yang dipémpén ole sikok kepalak legion yang disebót legatus legionis.

peti pejanjian - Peti ni iola tempat hadérat jugo kuaso Allah di bumi pas jaman dulu. Peti ni disimpen di jeró tempat maha suci di Kemah Petemuan. Pas Kemah Petemuan tu diganti dengen Ruma Agóng Allah, mangko peti tu ditarok di situ.. Namonyo peti pejanjian karno di jerónyo ado duo kepéng batu betóléske Sepóló Prénto Allah yang dienjókke samo Nabi Musa pas Allah békén pejanjian samo bangso Israel di Gónóng Sinai, yang jugo disebót Gónóng Horeb. (jingok Pembebasan 25:10). Pecaknyo peti pejanjian ni ilang pas pembuangan bangso Israel ke Babel, kiro-kiro 600 taón sebelóm pelayanan Yesus.

rosul - Istila ni artinyo ‘wong yang diótós’. Di Alkitab, istila ni biasonyo dipakek óntók nónjók ke-12 móréd Yesus samo beberapo wong laén, pecak Paólós, yang diótós Allah óntók nyampeke pesen yang kósós.

selah - Ini ni kato baso Ibrani, yang iola baso asli kitab ni. Makno kato ni dak pulok jelas. Kemóngkénan selah tu digunoke jadi petónjók musik.

setan - Mahlók surgawi yang diciptoke Allah. Setan-setan iola malekat yang melok samo Éblés pas dio diósér dari surgo ole Allah. Dio wong tu jadi sóróan Éblés yang nolong dio godai manusio. Setan-setan jugo yang mbékén manusio kesórópan.

tato caro penyucian - Sebelóm beibada, wong Israel harós nyucike dirinyo dóken supayo dio pacak diterimo samo Allah jugo pacak nyentu barang-barang suci. Bedasarke Hókóm Musa, wong Israel pacak jadi najés amen dio wong punyo penyakét kusta, nyekel mayat, makan pajóan yang haram pecak babi apo jenis iwak tetentu, behóbóngan badan, apo dak tu ngelaérke kupek (jingok Imamat 11–18). Amen wong tu jadi najés, wong tu harós nyalanke upacara penyucian pecak baso baju, mandi, nyókór rambótnyo jugo ngenjók kórban pesembahan supayo dio pacak bersé lagi (jingok Imamat 14:8; 10). tato caro penyucian).

wong Lewi - Wong-wong Lewi iola wong dari ketórónan Lewi, anak ketigo dari Yakób. Pas jaman Nabi Musa, Allah mélé Harón (kakaknyo Musa) samo ketórónannyo óntók jadi imam. Wong-wong Lewi yang bukan ketórónan Harón dipélé óntók ngelayani Allah di Kemah Suci jugo bantu imam-imam, tapi dak bole nyembake kórban (jingok Kelóyóran di Górón 3:5-9).

zzz - (belóm siap) - kemah - Kemah iola tempat betedó yang tebuat dari kaén tenón apo dak tu kólét binatang. Kemah ni pacak dibongkar trós dipasang lagi di tempat yang beda.

ketuo-ketuo imam: Ketuo-ketuo imam ni ado 71 wong yang dipémpén langsóng ole imam besak di Mahkama Agóng wong Israel yang jugo pacak disebót Sanhedrin. Ketuo-ketuo imam ni temasók imam-imam dari kluargo yang penténg, wong Parisi, jugo wong Saduki. Ketuo-ketuo Imam ni kebanyak'an dari kelompok Saduki. Wong-wong inila yang ngadéli Yesus jugo Paólós (jingok Matius 26:59; Markós 13:9; 15:43; Lukas 22:66; Cerito Rosul-Rosul 5:21; 22:5; 23).

zzz - (belóm siap) - Ketuo-ketuo imam - Ketuo-ketuo imam ni ado 71 wong yang dipémpén langsóng samo imam besak di Mahkama Agóng wong Israel yang jugo pacak disebót Sanhedrin. Ketuo-ketuo imam ni temasók imam-imam dari kluargo yang penténg, wong Parisi, jugo wong Saduki. Ketuo-ketuo imam ni kebanyak'an dari kelompok Saduki. Wong-wong inila yang ngadéli Yesus jugo Paólós (jingok Matius 26:59; Markós 13:9, 15:43; Lukas 22:66; Cerito Rósul-rósul 5:21, 22:5; 23).

zzz - (belóm siap) - kusta - Pas jaman tu, slóró penyakét yang behóbóngan dengen kólét disebót sakét kusta. Nórót Hókóm Taurat (jingok Im 13), penyakét kusta iola penyakét yang najés, siapo bae yang nyentu wong yang keno penyakét kusta bakal jadi najés jugo. Banyak atóran yang dio wong harós lakuke. Atóran-atóran tu iola, idak bole beibada di tempat ibada, harós tinggal jaó dari wong-wong, harós pakek baju koyak, harós botak palaknyo, amen ketemu wong harós mekék “Najés, najés!”, biar wong dak deketi dio. Trós amen sembó, dio harós harós nónjókke dirinyo ke imam supayo imam tu pacak mbuat pengakuan amen dio memang la sembó nian. Abés tu, dio jugo harós ngenjók kórban penyucian di Ruma Agóng Allah di Yerusalem (lihat

zzz - (belóm siap) - ruma ibada - Ruma ibadanyo wong Israel pas jamannyo Yesus disebót Sinagoga. Ruma-ruma ibada ni idak cuman dipakek óntók ibada bae, tapi jugo pacak jadi tempat ngajar Kitab Suci, ngomongi masala politik jugo agama, tempat ngadoke upacara tradisi, tempat kawénan, jugo tempat óntók ngadéli wong yang ngelanggar Hókóm Taurat (jingok Matius 10:17, Cerito Rosul-Rosul 26:11).

zzz - (belóm siap) -Kekaésaran Romawi - Pas jaman Yesus, Israel lagi dijaja ole Kekaésaran Romawi. Pemeréntoan di Israel pas jaman tu ado beberapo tingkatan.

Dengen kekuatan militernyo, Kekaésaran Romawi ngendalike slóró keédópan wong Israel, mugola dalem pemeréntoan apo dalem keédópan masyarakat seari-ari. Wong Israel jugo diwajébke óntók mbayar upeti Kekaésaran Romawi, yang nyebabke keidakpuasan jugo pelawanan di beberapo tempat di Israel.

Éblés - Dio ni sikok mahlók surgawi yang diciptoke Allah trós jadi rajo setan-setan. Éblés ni galak godai manusio supayo dio wong ngelawan Allah (Yahya 13:2; Cerito Rosul-Rosul 5:3; 1 Petrus 5:8) karno dio nak ngancórke ciptoan Allah.

zzz - (belum siap) Pejanjian- Pejanjian iola janji yang dibuat antaro duo piak yang ado syarat jugo ketentuan yang harós dijalani. Pokoknyo keduo piak berjanji óntók saléng stio. Amen dilanggar piak yang ngelanggar pejanjian tu bakal keno hokoman sesuai dengen ketentuan pejanjian. Allah békén beberapo pejanjian samo manusio yang dak bakal… [SEBOTKE contoh pejanjian, Dengen Nuh, Abram, Taurat, Perjanjian yang Baru…]