1 Sebelóm ari rayo Paska, Yesus tau amen la tibo waktu-Nyo óntók ninggalke dunio ni trós balék ke Aba. Dio ngaséhi wong-wong kepunyoan-Nyo di dunio ni. Iyo, Dio ngaséhi wong-wong tu sampe ahér.

2 Na, waktu tu, Yesus samo móréd-móréd-Nyo lagi makan malem. Éblés la berasél ngolok'i Yudas, anak Simon Iskariot,^a supayo dio ngianati Yesus. 3 Yesus tau amen galo-galonyo la diserake Aba-Nyo ke tangan Dio, jugo amen Dio ni dateng dari Allah, trós bakal balék lagi ke Allah. 4 Pas dio wong lagi makan, Yesus tegak trós ngelepaske juba-Nyo. Dio ngambék sikok kaén trós dikebetkenyo di pinggang-Nyo. 5 Abés tu, Yesus nuangke banyu ke jeró kendi. Dio mulai mbasó sekel móréd-móréd-Nyo trós Dio ngelapnyo makek kaén yang la dikebet di pinggang-Nyo.

6 Jadi, Yesus ndatengi Simon Petrus, trós Petrus ngomong cak ini, “Tuan, apo Kau nak mbasó sekel aku jugo?”

7 Jawab Yesus ke dio cak ini, “Apo yang Aku lakuke sekarang ni kau tu idak tau, tapi kageknyo kau bakal ngerti seabés pasal-pasal ni.”

8 Uji Petrus, “Kau dak bakal perna mbasó sekel aku sampe selamo-lamonyo!”

Jawab Yesus, “Amen Aku idak mbasó sekel kau, kau idak bakal dapet bagéan besamo Aku.”

9 Uji Simon Petrus ke Yesus, “Tuan, amen cak itu jangan cuman sekel aku bae, tapi tangan samo palak aku jugo!”

10 Uji Yesus ke dio, “Wong yang la mandi cuman perlu mbasó sekelnyo bae karno galo-galonyo la bersé. Kamu tu la bersé, tapi idak galo-galonyo dari kamu bersé.” 11 Soalnyo, Yesus tau siapo yang bakal ngianati-Nyo. Mangkonyo Dio ngomong, “Idak galo-galo dari kamu bersé.”

12 Jadi, seabés Yesus mbasó sekel móréd-móréd-Nyo, Dio makek juba-Nyo, trós balék dódók lagi. Abés tu, Yesus ngomong ke dio wong cak ini, “Ngerti dak kamu dengen apo yang la Aku lakuke samo kamu tadi? 13 Kamu nyebót Aku ‘Guru’ jugo ‘Tuan’, trós apo yang kamu katoke tu memang bener nian, soalnyo Akula Guru jugo Tuan tu. 14 Jadi, amen Aku, yang iola Tuan jugo Guru, la mbasó sekel kamu, mangkonyo kamu jugo harós saléng mbasó sekel. 15 Soalnyo, Aku la ngenjók conto supayo kamu jugo ngelakuke pecak yang la Aku lakuke samo kamu. 16 Aku enjók tau kamu nian, kacóng idak lebé besak dari tuannyo, pecak itu jugo ótósan idak lebé besak dari yang ngótósnyo. 17 Na, karno kamu la tau pasal-pasal ni, senengla kamu amen kamu ngelakukenyo jugo.

18 Apo yang Aku omongke ni bukan pasal kamu galo, soalnyo Aku tau pecak apo wong yang Aku pélé tu. Tapi, apo yang tetólés di jeró Kitab Suci harós tegenepi, ‘Wong yang makan roti samo-samo Aku,^b ngangkat sekelnyo ngelawan Aku^@.’^c 19 Aku enjók tau kamu sekarang, sebelóm pasal tu tejadi, supayo pas pasal tu tejadi kamu pecayo amen Akula Dio.^d 20 Aku enjók tau kamu nian, tiap wong yang nerimo wong yang Aku ótós, bearti nerimo Aku. Trós wong yang nerimo Aku, bearti wong tu nerimo Aba yang ngótós Aku.”^e

21 Na, seabés Yesus ngomong pecak itu, ati-Nyo jadi bingsal, trós Dio besaksi jugo ngomong cak ini, “Aku ngomong nian samo kamu, sala sikok dari kamu bakal ngianati Aku.”

22 Laju, móréd-móréd-Nyo mulai saléng nyingok trós bingung nian siapo yang dimaksód Yesus tu. 23 Na, ado sala sikok dari móréd-móréd Yesus, iola móréd yang dikaséhi-Nyo,^f lagi besender ke Yesus. 24 Laju, Simon Petrus ngenjók tando ke dio óntók nanyoke pasal siapo nian yang dimaksód Yesus tu.

25 Jadi, móréd yang besender di Yesus tu ngomong cak ini, “Tuan, siapo nian wong tu?”

26 Jawab Yesus, “Wong yang Aku enjók setetak roti pas Aku nyelópke roti tu ke jeró mangkók, itula wongnyo!” Laju, roti tu dicelópke trós diambek-Nyo, abés tu dienjókke-Nyo ke Yudas, anak Simon Iskariot. 27 Na, seabés Yudas nerimo setetak roti tu, masókla Éblés ke jeró dio.

Jadi, Yesus ngomong ke Yudas cak ini, “Apo yang nak kau lakuke, lakukela dengen gancang.” 28 Tapi, dak katek sikok wong bae dari dio wong yang lagi dódók makan di situ yang ngerti maksód omongan Yesus ke Yudas tu. 29 Beberapo di antaro dio wong nyangko amen Yesus ngongkon Yudas óntók mbeli beberapo barang perayoan apo dak tu dikongkon óntók ngenjók sedeka ke wong méskén, soalnyo Yudas ni kan bendahara yang megang dóét kas. 30 Jadi, pas dio la nerimo setetak roti tu, dio langsóng metu. Waktu tu ari la malem.

31 Seabés Yudas metu, Yesus ngomong cak ini, “Sekarang Anak Manusio la dimulyoke, trós Allah la dimulyoke di dalem Dio. 32 Karno Allah la dimulyoke dalem Dio,^* Allah dewek jugo bakal mulyoke Dio. Iyo! Allah bakal langsóng mulyoke Dio.

33 Ói budak-budak yang Aku kaséhi, waktu Aku besamo dengen kamu bakal dak lamo lagi! Kamu bakal nyari Aku, tapi pecak yang Aku omongke samo pemémpén-pemémpén Israel,^* pecak itu jugo yang Aku omongke samo kamu sekarang ni. Ke mano Aku pegi, kamu idak pacak ndatenginyo.

34 Aku ngenjók prénto baru samo kamu supayo kamu saléng ngaséhi. Pecak Aku la ngaséhi kamu, pecak itu jugo kamu harós saléng ngaséhi. 35 Galo-galo wong bakal tau kamu tu iola móréd-móréd Aku amen kamu saléng ngaséhi.”

36 Simon Petrus betanyo samo Yesus cak ini, “Tuan, ke mano Kau bakal pegi?”

Jawab Yesus, “Ke mano Aku pegi, kau idak pacak melok sekarang, tapi kageknyo kau bakal melok.”

37 Petrus betanyo lagi samo Dio cak ini, “Tuan, ngapo aku idak pacak melók Kau sekarang? Aku rela mati óntók Kau!”

38 Jawab Yesus, “Iyo nian apo kau rela mati óntók Aku? Aku enjók tau kau nian, sebelóm ayam jagók bekokok besok pagi, kau la tigo kali nyangkal Aku.”