1 Yesus ngomong lagi cak ini, “Janganla bingsal ati kamu. Pecayola^* samo Allah, pecayo jugola samo Aku. 2 Di ruma Aba Aku ado banyak tempat tinggal. Kalu idak cak itu, apo gunonyo Aku ngomong amen Aku pegi nyiapke tempat óntók kamu?^a 3 Kalu Aku pegi jugo nyiapke tempat óntók kamu, bearti Aku bakal dateng lagi, abés tu Aku bakal gawak kamu ke tempat Aku, supayo di mano Aku ado, di situ jugo kamu ado. 4 Ke mano aku pegi, kamu tau jalannyo.”

5 Uji Tomas ke Yesus cak ini, “Tuan, kami ni dak tau ke mano Kau nak pegi. Jadi, cakmano nian kami pacak tau jalannyo?”

6 Uji Yesus ke dio, “Akula jalan, kebeneran, jugo édóp. Dak katek wong yang pacak dateng ke Aba amen idak liwat Aku. 7 Amen kamu kenal Aku, kamu bakal kenal Aba Aku.^* Mulai sekarang ni kamu kenal Dio trós la nyingok Dio.”

8 Pilipus ngomong ke Yesus cak ini, “Tuan, tónjókkela Aba tu samo kami. Itu la cókóp óntók kami.”

9 Uji Yesus ke dio, “Ói Pilipus, la lamo nian Aku tu besamo kamu, tapi kau ni masé bae idak ngenal Aku? Wong yang nyingok Aku, bearti la nyingok Aba Aku. Jadi, cakmano kau pacak ngomong, ‘Tónjókkela Aba tu samo kami’? 10 Apo kau idak pecayo amen Aku di dalem Aba trós Aba di dalem Aku? Kato-kato yang Aku omongke samo kamu tu idak beasal dari Aku dewek, tapi Aba yang tinggal di dalem Aku nila yang ngelakuke galo-galo gawean-Nyo. 11 Pecayola samo omongan Aku amen Aku di dalem Aba trós Aba di dalem Aku. Apo dak tu paléng idak, pecayola karno gawean-gawean tu dewek.”

12 Uji Yesus lagi, “Aku enjók tau samo kamu nian, wong yang pecayo samo Aku bakal ngelakuke gawean yang Aku lakuke. Dio jugo bakal ngelakuke gawean yang lebé besak daripado ini, karno Aku bakal pegi ke Aba. 13 Apo bae yang kamu mintak dalem namo Aku, Aku bakal ngelakukenyo, supayo Aba dimulyoke di jeró Anak. 14 Iyo nian, kalu kamu mintak apo bae samo Aku dalem namo Aku, Aku bakal ngelakukenyo.”

15 “Amen kamu ngaséhi Aku, kamu bakal nóróti prénto-prénto Aku.^* 16 Aku bakal mintak samo Aba Aku, trós Aba Aku tu bakal ngenjók ke kamu Penolong^b yang laén supayo Penolong tu nyertoi kamu sampe selamo-lamonyo. 17 Penolong tu iola Ro Kebeneran. Wong-wong dunio idak pacak nerimo Ro Kebeneran tu karno wong-wong dunio idak nyingok-Nyo apolagi ngenal-Nyo. Tapi, kamu ngenal Ro Kebeneran tu, karno Dio tinggal samo kamu trós Dio bakal ado dalem kamu.^*

18 Aku idak bakal ninggalke kamu pecak yatém piatu. Aku bakal dateng lagi ke kamu. 19 Denget lagi, dunio dak bakal nyingok Aku lagi. Tapi, kamu bakal nyingok Aku karno Aku édóp, trós kamu jugo bakal édóp.^c 20 Pas ari tu^* kamu bakal tau amen Aku di dalem Aba Aku, kamu di dalem Aku, trós Aku di dalem kamu. 21 Wong yang megang prénto-prénto Aku jugo nórótinyo, diola yang ngaséhi Aku. Wong yang ngaséhi Aku bakal dikaséhi Aba Aku, pecak itu jugo Aku bakal ngaséhi wong tu trós Aku bakal nyatoke diri Aku samo wong tu.”

22 Jadi, Yudas, yang bukan Iskariot, ngomong ke Yesus cak ini, “Tuan, ngapo pulok Kau nyatoke diri Kau samo kami, bukan samo dunio?”

23 Yesus nyawab cak ini, “Amen wong ngaséhi Aku, dio bakal nóróti omongan Aku, trós Aba Aku bakal ngaséhi wong tu. Kami jugo bakal dateng ke wong tu trós bakal mbékén tempat tinggal besamonyo. 24 Wong yang idak ngaséhi Aku, bearti wong tu idak nóróti omongan Aku. Omongan yang kamu denger tu idak beasal dari Aku, tapi dari Aba yang ngótós Aku.

25 Pasal-pasal ni la Aku omongke samo kamu selamo Aku masé tinggal besamo kamu. 26 Tapi, Penolong tu, iola Ro Suci, yang bakal diótós Aba dalem namo Aku, Diola yang bakal ngajari kamu segalonyo. Dio bakal ngingetke kamu segalo yang la Aku omongke samo kamu. 27 Damai sentoso, Aku tinggalke samo kamu. Iyo, damai sentoso Aku, Aku enjókke samo kamu. Yang Aku enjókke samo kamu tu idak pecak yang dunio enjók. Jadi, dak usala ati kamu bingsal apo takót.

28 Kamu la ndenger amen Aku la ngomong samo kamu, ‘Aku bakal pegi’^d trós ‘Aku bakal dateng lagi ke kamu.’ Amen kamu memang nian ngaséhi Aku, kamu bakal seneng amen Aku pegi ke Aba Aku karno Aba Aku lebé besak daripado Aku. 29 Sekarang, Aku omongke samo kamu sebelóm pasal tu tejadi supayo pas pasal tu tejadi kamu bakal pecayo. 30 Aku idak bakal ngomong banyak pasal lagi samo kamu, soalnyo penguaso dunio ni lagi dateng,^e tapi dio samo sekali katek kuaso ke Aku. 31 Tapi, pasal-pasal ni tejadi supayo wong-wong dunio tau amen Aku ngaséhi Aba, jugo amen Aku ngelakuke pecak yang la dipréntoke Aba samo Aku. Bangónla, payó kito pegi dari sini.”^*