1 Tigo ari seabés Pestus sampe di Propinsi Yudea óntók njabat jadi gubernór di daera tu, dio pegi dari Kota Kaisarea ke Kota Yerusalem. 2 Ketuo-ketuo imam samo wong-wong penténg Israel nyampeke tódóan dio wong ngelawan Paólós, trós mintak Pestus 3 supayo bebaék ati ke dio wong óntók mindake Paólós ke Kota Yerusalem. Wong-wong yang nódó Paólós ni la ngerencanoke óntók nyegat jugo mbunu dio di tenga jalan. 4 Tapi, Pestus ngomong amen Paólós ni bakal tetep dipenjaro di Kota Kaisarea, soalnyo dio jugo denget lagi nak berangkat ke sano. 5 Ujinyo lagi, “Biarla wong-wong yang bekuaso di antaro kamu melok aku ke sano, trós amen wong ni ado sala, dio wong pacak ngajuke tódóan ke dio.”

6 Pestus tinggal dengen dio wong idak lebé dari lapan apo sepóló ari, abés tu dio balék ke Kota Kaisarea. Seari abés dio sampe, dio dódók di korsi pengadélan trós ngenjók prénto supayo Paólós digawak ke adepannyo. 7 Na, pas Paólós sampe, wong-wong yang dateng dari Yerusalem ni tegak ngelélénginyo. Dio wong nyampeke banyak tódóan yang berat ke Paólós, yang idak pacak dio wong buktike. 8 Tapi Paólós ni mbela dirinyo dengen ngomong cak ini, “Aku ni katek sala apo-apo samo hókóm agama wong Israel, samo Ruma Agóng Allah, jugo samo Kaisar.”

9 Tapi karno Pestus ni nak ngambék ati wong-wong Israel, dio nyawab Paólós cak ini, “Apo kau galak ke Yerusalem trós diadéli di sano di adepan aku pasal tódóan-tódóan ni?”

10 Uji Paólós, “Aku ni sekarang lagi tegak di adepan korsi pengadélan Kaisar,^a tempat yang memang seharósnyo aku diadéli. Bapak Gubernór tau nian amen aku katek sala samo wong-wong Israel. 11 Jadi, amen aku sala jugo ngelakuke yang pantes óntók dihókóm mati, aku dak bakal ngindar dari hókóman mati tu. Tapi amen tódóan wong-wong ni idak katek yang bener, mangko dak katek siapo bae yang pacak nyerake aku ke dio wong. Aku nak mintak naék bandéng ke Kaisar.”^b

12 Seabés Pestus ni beróndéng samo wong-wong pengadélan, Pestus nyawab Paólós cak ini, “Kau mintak naék bandéng samo Kaisar, jadi kau harós pegi ngadep Kaisar.”

13 Pas la beberapo ari, Rajo Agripa samo adék betinonyo yang benamo Bernike sampe di Kota Kaisarea óntók ngucapke selamet ke Pestus. 14 Pas dio wong beduo tu tinggal di sano selamo beberapo ari, Pestus nyelaske pasal Paólós ke Rajo Agripa, ujinyo, “Di sini ado sikok tahanan yang ditinggalke ole mantan Gubernór Peliks. 15 Na, pas aku ado di Yerusalem, ketuo-ketuo imam samo pemémpén-pemémpén Israel nyampeke tódóannyo pasal Paólós trós mintak supayo dio dihókóm. 16 Aku ngenjók tau dio wong amen kebiasoan wong Romawi idak mboleke wong diserake sampe dio dienjók kesempetan óntók mbékén pembelaan di depan wong-wong yang nódónyo tu. 17 Jadi pas dio wong dateng bekómpól di sini, aku idak nunggu lamo-lamo. Besoknyo aku ngadoke sidang pengadélan trós mréntoke supayo wong tu digawak ngadep aku. 18 Tapi pas wong-wong yang nódó Paólós ni tegak óntók nyampeke tódóan-tódóannyo, dio wong ni idak nódó Paólós ngelakuke kejahatan yang berat pecak yang aku sangko. 19 Tapi, dio wong ni cuman beda pendapet pasal agama dio wong dewek, jugo pasal sikok wong yang benamo Yesus yang la mati, tapi yang diakui Paólós amen Dio tu édóp lagi. 20 Karno aku bingung cakmano caro merikso galo-galo ni, aku betanyo apo dio galak pegi ke Yerusalem trós diadéli di sano pasal kasós ni. 21 Tapi Paólós mintak naék bandéng óntók ditahan sambél nunggu kepótósan Kaisar Yang Mulyo. Laju aku mréntoke supayo dio ditahan sampe aku ngérém dio ke Kaisar.”

22 Uji Agripa ke Pestus, “Aku jugo penasaran nak denger dari wong tu langsóng.”

Uji Pestus, “Besok, Rajo bakal ndengernyo.”

23 Jadi besoknyo, Agripa samo Bernike dateng dengen diéréngi upacara yang besak. Dio wong masók ke aula besamo kepalak-kepalak pasókan militer jugo wong-wong penténg kota tu. Abés tu, Pestus ngenjók prénto supayo Paólós digawak masók. 24 Uji Pestus, “Ya Rajo Agripa jugo slóró wong yang ado besamo kami di sini, jingokla wong ini! Slóró wong Israel yang ado di Yerusalem jugo yang ado di sini la dateng ke aku ngadu pasal dio trós mekék-mekék amen wong ini seharósnyo idak bole dibiarke édóp. 25 Tapi, aku nemuke amen dio idak ngelakuke apo-apo yang békén dio pantes dihókóm mati. Pas dio naék bandéng ke Kaisar, aku mótóske óntók ngérém dio ke Kaisar. 26 Tapi aku idak yakén dengen apo yang harós aku tóléske óntók Kaisar pasal dio. Karno itula, aku gawak dio ni ngadep kamu, kósósnyo ke kau Rajo Agripa, supayo abés pemeriksoan ni, aku tau apo yang harós aku tólés. 27 Soalnyo, nórót aku, idak masók akal amen ngérém sikok tahanan tapi idak nyelaske apo bae kesalahan-kesalahan yang ditódóke samo dio.”