1 Limo ari abés tu, Imam Besak Ananias dateng ke Kaisarea besamo beberapo pemémpén-pemémpén Israel, jugo samo pengacara yang benamo Tertólós. Dio wong ni ngadep gubernór óntók ngajuke tódóan dio wong ke Paólós. 2 Seabés Paólós dipanggél, Tertólós ni mulai nódó dio dengen ngomong cak ini, “Ói Tuan Peliks yang tehormat, karno kau, kami ngalami banyak kedamaian, jugo karno hikmah kau keadaan bangso kami lebé baék. 3 Dengen banyak caro, jugo di mano bae, kami terós-terósan nerimo kebaék'an kau tu dengen raso mokasé nian, Tuan Peliks yang tehormat. 4 Tapi, supayo aku idak ngabéske waktu Tuan, aku mintak nian kebaék'an ati Tuan óntók ndengerke kami denget bae. 5 Soalnyo, kami ndapeti Paólós ni iola pengacau, yang mbékén kerébótan di antaro wong-wong Israel di slóró dunio. Dio nila pemémpén kelompok yang melok'i ajaran wong Najaret tu. 6 Dio ni jugo nyobo ngelanggar kesucian Ruma Agóng Allah, jadi kami nangkepnyo. [Kami nak ngadéli dio sesuai dengen hókóm agama kami. 7 Tapi Lisias, kepalak pasókan tu, dateng trós dengen kekerasan dio ngerebót Paólós dari tangan kami. 8 Abés tu, Lisias ngenjók prénto ke wong-wong yang nódó Paólós óntók dateng ngadep Tuan.]^a Seabés merikso Paólós, Tuan bakal tau dewek dari dio slóró pasal tódóan yang kami tódóke ke dio.” 9 Wong-wong Israel yang ado di situ jugo melok nódó Paólós. Dio wong ngomong amen slóró pasal tu memang bener nian.

10 Laju, gubernór tu ngenjók tando ke Paólós óntók ngomong. Uji Paólós, “Aku tau amen Tuan la betaón-taón jadi hakém óntók bangso ni, jadi dengen seneng ati aku mbela diri. 11 Na, pecak yang Tuan tau, idak lebé dari 12 ari yang liwat aku pegi ke Yerusalem óntók beibada. 12 Wong-wong Israel dak perna mergok'i aku bedebat dengen siapo bae, apo dak tu ngasót kerómónan wong-wong mugola itu di Ruma Agóng Allah, ruma-ruma ibada, jugo di tempat-tempat laén dalem kota. 13 Dio wong jugo idak pacak buktike samo Tuan pekaro-pekaro yang baru bae dio wong tódóke samo aku ni. 14 Tapi, aku ngaku ke Tuan amen aku ni nyemba Allah, Tuhan nenek moyang kami, dengen nóróti Jalan Yesus yang dio wong sebót aléran agama. Tapi, aku tetep pecayo samo slóró yang sesuai Hókóm Musa, jugo yang tetólés di kitab nabi-nabi. 15 Aku jugo narok arepan ke Allah, arepan yang samo pecak yang dio wong tungguke, amen bakal ado kebangkétan wong mati, mugola itu wong bener apo wong idak bener. 16 Dalem pasal ni aku terós beusaha óntók édóp dengen ati nurani yang bener di adepan Allah jugo di adepan manusio.

17 Pas la beberapo taón, aku dateng ke Yerusalem óntók gawak sedeka^b ke wong-wong méskén di bangso Aku, jugo ngenjókke pesembahan-pesembahan. 18 Na, pas aku ngelakuke pasal tu, beberapo wong Israel dari Asia nyingok aku lagi di Ruma Agóng Allah seabés aku ngelakuke upacara penyucian.^c Dak katek kómpólan wong apo kerébótan yang tejadi. 19 Jadi wong-wong Israel yang dari Asia itula yang seharósnyo dateng ke adepan Tuan óntók nyampeke tódóannyo samo aku, amen dio wong punyo masala dengen aku. 20 Apo dak tu, biarla wong-wong yang ado di sini yang ngenjók tau pelanggaran apo yang dio wong temuke pas aku tegak di adepan Mahkama Agama. 21 Dak katek yang dio wong temuke selaén sikok pasal yang aku sampeke pas aku diadéli di adepan dio wong, trós ngomong cak ini, ‘Aku diadéli di adepan kamu ari ni karno aku pecayo amen Allah bakal mbangkétke wong-wong yang la mati.’ ”

22 Tapi, Peliks yang memang tau nian pasal Jalan Yesus, nunda pekaro tu. Ujinyo, “Amen Lisias, kepalak pasókan tu la dateng, aku bakal mótóske pekaro kau ni.” 23 Jadi, Peliks mrénto sikok perwira supayo Paólós tetep ditahan, tapi dengen ngenjókke beberapo kemudahan, jugo idak ngelarang kawan-kawannyo dateng óntók ngórós kebótóannyo.

24 Na, pas la beberapo ari, Peliks dateng besamo Drusila, bininyo. Dio ni betino Israel. Dio manggél Paólós trós ndengerke dio ngomong pasal kepecayoan ke Yesus Almasi. 25 Tapi, Paólós ni ngomong pasal kebeneran, pasal ngendalike diri, jugo pasal pengakéman yang bakal dateng. Laju, Peliks ni jadi takót nian sampe-sampe dio nyawab cak ini, “Óntók sekarang jadila. Kau bole pegi. Kagek amen ado kesempetan, aku bakal manggél kau lagi.” 26 Waktu tu jugo, Peliks ni ngarep amen Paólós bakal ngenjók dóét suap supayo dio dibebaske, jadi Peliks ni seréng manggél Paólós óntók diajak ngomong.

27 Na, pas la liwat duo taón, Peliks digenti ole Perkius Pestus, tapi Peliks tetep mbiarke Paólós tinggal di jeró penjaro supayo dio pacak ngambék ati wong Israel.