3
Pesiapan óntók pelayanan Yesus
Yahya nyiapke jalan-Nyo Almasi
(Matius 3:1-12; Markós 1:1-8; Yahya 1:19-28)
1 Di taón yang ke-15 dari pemeréntoan Kaisar Tiberius, Pontius Pilatus iola penguaso di daera Yudea, Herodes iola penguaso di Wilaya Galilea, Pilipus dólórnyo Herodes iola penguaso di daera Iturea jugo Trakonitis, Lisanias iola penguaso di daera Abilene, 2 trós Hanas samo Kayapas iola imam besak. Waktu tu, Allah ngomong ke Yahya, anak dari Jakaria, di padang górón. 3 Laju Yahya ni dateng ke slóró daera Sungi Yordan. Dio becerama pasal baptésan yang nónjókke petobatan óntók pengampónan duso. 4 Kejadian ni pecak yang ado tetólés dalem kitab Nabi Yesaya,
“Ado suaro wong yang mekék-mekék di padang górón:
‘Siapkela jalan óntók kedatengan Allah‡,
lóróskela jalan óntók-Nyo.
5 Setiap lemba bakal ditémbón
trós setiap gónóng jugo bókét bakal diratoke,
yang bebelok-belok bakal dilóróske,
yang dak alós bakal dialóske,
6 trós slóró wong bakal nyingok keselametan yang dari Allah.’”a
7 Jadi dio ngomong samo wong banyak yang ndatengi dio óntók dibaptés cak ini, “Ói kamu anak ulo!b Siapo yang ngingetke kamu supayo ngelarike diri dari kemarahan Allah yang bakal dateng pas ari pengakéman? 8 Jadi asélkela bua-bua yang sesuai dengen petobatan, trós janganla mulai ngomong di jeró ati kamu, ‘Ibrahém iola nenek moyang kami.’c Soalnyo, aku ngomong ke kamu, dari batu-batu ni Allah pacak jadike anak-anak óntók Ibrahém!” 9 Uji Yahya lagi, “Kapak la ditarok di parak akar pohon. Trós setiap pohon yang idak ngasélke bua yang bagós bakal ditebang trós dibuang ke dalem api.”
10 Laju, banyak wong betanyo samo dio, “Amen cak itu, apo yang harós kami lakuke?”
11 Uji Yahya ke dio wong, “Siapo bae yang punyo duo ikok baju harós mbagékenyo samo yang dak punyo. Trós siapo bae yang punyo pajóan harós ngelakuke cak itu jugo.”
12 Na, abés tu datengla jugo penagé-penagé pajak óntók dibaptés. Dio wong betanyo samo Yahya cak ini, “Guru, apo yang harós kami lakuke?”
13 Ujinyo ke dio wong, “Jangan nagé lebé banyak dari yang la ditentuke óntók kau.”
14 Abés tu, tentra-tentra jugo betanyo ke dio cak ini, “Amen kami? Apo yang harós kami lakuke?”
Jawab Yahya ke dio wong, “Jangan ngerampas jugo jangan meres. Trós cókópkela diri kamu dengen upa kamu.”
15 Tapi karno banyak wong lagi nungguke jugo ngarepke Almasi, laju galo-galo wong tu betanyo di jeró atinyo pasal Yahya, móngkén bae dio nila Wong Yang Dilanték tu.
16 Uji Yahya ke galo-galo wong tu, “Aku mbaptés kamu dengen banyu, tapi yang lebé bekuaso dari aku bakal dateng. Mbukak tali selop-Nyo bae aku dak pantes. Dio bakal mbaptés kamu dengen Ro Suci jugo dengen api.d 17 Alat penampi la di tangan-Nyo óntók mberséke tempat penggéléngan, trós óntók ngómpólke gendóm ke jeró lómbóng-Nyo. Tapi, debu jerami tu bakal ditunu-Nyo dalem api yang dak mati-mati.”
18 Yahya nasehati jugo mbritoke Kabar Baék ke wong banyak tu. 19 Tapi, pas Herodes, penguaso daera tu, ditegor ole Yahya pasal dio ngawéni Herodias, bini dólórnyo, samo pasal kejahatan yang la dibékénnyo, 20 Herodes ni mala nambai kejahatannyo dengen masókke Yahya ke jeró penjaro.
Yesus, Anak-Nyo Allah, dibaptés ole Yahya
21 Pas slóró wong banyak tu lagi dibaptés, Yesus jugo dibaptés. Na, pas Yesus lagi bedoa, langét tebukak. 22 Trós, Ro Suci tórón dalem bentók bóróng daro ke pócók-Nyo. Na, tedengerla suaro dari langét cak ini, “Kaula Anak Aku yang Aku kaséhi, samo Kaula Aku seneng.”
Daptar nenek moyang Yesus
23 Pas Yesus mulai pelayanan-Nyo, Dio beómór kiro-kiro 30 taón. Nórót anggepan wong, Yesus ni iola anak Yósóp,
Yósóp anak Eli,
24 Eli anak Matat,
Matat anak Lewi,
Lewi anak Malki,
Malki anak Yanai,
Yanai anak Yósóp,
25 Yósóp anak Matika,
Matika anak Amos,
Amos anak Nahum,
Nahum anak Hesli,
Hesli anak Nagai,
26 Nagai anak Maat,
Maat anak Matika,
Matika anak Simei,
Simei anak Yosek,
Yosek anak Yoda,
27 Yoda anak Yohanan,
Yohanan anak Resa,
Resa anak Jerubabel,
Jerubabel anak Sealtiel,
Sealtiel anak Neri,
28 Neri anak Malki,
Malki anak Adi,
Adi anak Kosam,
Kosam anak Elmadam,
Elmadam anak Er,
29 Er anak Yesua,
Yesua anak Eliejer,
Eliejer anak Yorim,
Yorim anak Matat,
Matat anak Lewi,
30 Lewi anak Simeon,
Simeon anak Yehuda,
Yehuda anak Yósóp,
Yósóp anak Yonam,
Yonam anak Elyakim,
31 Elyakim anak Melea,
Melea anak Mina,
Mina anak Matata,
Matata anak Natan,
Natan anak Daód,
32 Daód anak Isai,
Isai anak Obed,
Obed anak Boas,
Boas anak Salmon,
Salmon anak Nahason,
33 Nahason anak Aminadab,
Aminadab anak Admin,
Admin anak Arni,
Arni anak Hesron,
Hesron anak Peres,
Peres anak Yehuda,
34 Yehuda anak Yakób,
Yakób anak Ishak,
Ishak anak Ibrahém,
Ibrahém anak Tera,
Tera anak Nahor,
35 Nahor anak Serug,
Serug anak Rehu,
Rehu anak Peleg,
Peleg anak Eber,
Eber anak Salmon,
36 Salmon anak Kenan,
Kenan anak Arpaksad,
Arpaksad anak Sem,
Sem anak Nuh,
Nuh anak Lamek,
37 Lamek anak Metusael,
Metusael anak Henok,
Henok anak Yared,
Yared anak Mahalalel,
Mahalalel anak Kenan,
38 Kenan anak Enos,
Enos anak Set,
Set anak Adam,
Adam anak Allah.