Matius
1
Cerito masa kecik Yesus
Daptar nenek moyang Yesus Almasi
1 Inila daptar nenek moyang Yesus Almasi, yang iola ketórónan Daód, jugo ketórónan Ibrahéma.
2 Ibrahém iola abanyo Ishak,
Ishak iola abanyo Yakób.
Yakób iola abanyo Yehuda samo dólór-dólórnyo.b
3 Yehuda iola abanyo Peres samo Jera, emak dio wong ni benamo Tamar.
Peres iola abanyo Hesron.
Hesron iola abanyo Ram.
4 Ram iola abanyo Aminadab.
Aminadab iola abanyo Nahason.
Nahason iola abanyo Salmon.
5 Salmon iola abanyo Boas, emaknyo benamo Rahab.
Boas iola abanyo Obed, emaknyo benamo Rut.
Obed iola abanyo Isai.
6 Isai iola abanyo Rajo Daód.
Rajo Daód iola abanyo Suleiman, emaknyo ni iola bekas bininyo Uria.c
7 Suleiman iola abanyo Rehabeam.
Rehabeam iola abanyo Abia.
Abia iola abanyo Asa.
8 Asa iola abanyo Yosapat.
Yosapat iola abanyo Yoram.
Yoram iola abanyo Ujia.
9 Ujia iola abanyo Yotam.
Yotam iola abanyo Ahas.
Ahas iola abanyo Hiskia.
10 Hiskia iola abanyo Manasye.
Manasye iola abanyo Amon.
Amon iola abanyo Yosia.
11 Yosia iola abanyo Yekonya samo dólór-dólórnyo, pas jaman wong Israel dibuang ke Babel.d
12 Seabés jaman pembuangan ke Babel:
Yekonya iola abanyo Sealtiel,
Sealtiel iola abanyo Jerubabel.
13 Jerubabel iola abanyo Abihud.
Abihud iola abanyo Elyakém.
Elyakém iola abanyo Ajor.
14 Ajor iola abanyo Jadok.
Jadok iola abanyo Akém.
Akém iola abanyo Eliud.
15 Eliud iola abanyo Eliajar.
Eliajar iola abanyo Matan.
Matan iola abanyo Yakób.
16 Yakób iola abanyo Yósóp, yang iola lakinyo Mariam. Dari Mariam inila laér Yesus, yang iola Almasi.
17 Jadi, dari Ibrahém sampe Daód, slórónyo ado 14 ketórónan, trós dari Daód sampe jaman pembuangan ke Babel jugo ado 14 ketórónan. Cak itu jugo dari jaman pembuangan ke Babel sampe Almasi ado 14 ketórónan.
Kelaéran Yesus samo masa kecik-Nyo
Kelaéran Yesus Almasi
18 Inila riwayat kelaéran Yesus Almasi. Pas Mariam, emak Yesus, masé betunangan samo Yósóp, sebelóm dio wong édóp besamo pecak laki bini, ternyato Mariam la bónténg karno kuaso Ro Suci. 19 Yósóp, tunangannyo ni, iola wong yang bener di mato Allah trós idak galak maluke Mariam. Karno itu, dio bemaksód nak mótóske hóbóngannyo samo Mariam secaro diem-diem. 20 Tapi, pas dio lagi mékérke pasal tu, tibo-tibo malekat Allah‡ nónjókke diri ke dio dalem mimpi. Malekat tu ngomong cak ini, “Ói Yósóp, anak Daód,e janganla kau takót nerimo Mariam jadi bini kau, karno Kupek yang ado di jeró perótnyo tu beasal dari Ro Suci. 21 Dio bakal ngelaérke sikok Kupek Lanang trós kau harós namoi Dio Yesusf, karno Diola yang bakal nyelametke umat-Nyo dari duso-duso dio wong.”
22 Galo-galo tu tejadi supayo ditepatila apo yang diomongke Allah‡ liwat nabi-Nyo,
23 “Jingokla! Sikok gadés bakal bónténg trós ngelaérke sikok Kupek Lanang. Wong-wong bakal nyebót Dio Imanuel,”gh