1 Pasal tu ngeselke ati Yunus nian, jadi marala dio. 2 Dio bedoa ke Allahyhwh, cak ini, “Ya Allahyhwh, bukannyo la aku omongke pas aku masé di negara aku? Itula mangkonyo aku dulu ngelarike diri ke Tarsis. Soalnyo, aku tau Kau tu Tuhan yang bemura ati jugo bebelas kesian. Kau idak gancang mara, trós kasé stio Kau dak abés-abés. Trós Kau galak ngoba niat pasal bencano yang nak Kau datengke.^a 3 Jadi, ya Allahyhwh, cabót bae nyawo aku ni, soalnyo lemak aku mati bae daripado édóp.”^b

4 Uji Allahyhwh, “Semara itu nian apo kau? Pantes dak?”^*

5 Yunus metu dari kota tu trós pegi ke sebela timurnyo. Dio békén pondok óntók dirinyo dewek. Dio dódók betedó di bawa pondok tu, óntók nyingok apo yang bakal tejadi dengen kota tu.

6 Tuhan Allahyhwh ngérém taneman yang tómbó ngelebéi Yunus óntók nedói palaknyo, mangko dio tehébór dari pendritoannyo. Yunus seneng nian karno taneman tu. 7 Na, pas sóbó, Allah ngérém sikok ulet yang grogoti taneman tu sampe layu. 8 Pas matoari móncól, Allah ngérém angin yang panas bedengkang yang betiup dari ara timur. Palak Yunus tekeno sinar matoari sampe-sampe dio nak pingsan. Dio ngarep supayo mati bae, ujinyo, “Lemak aku mati bae daripado édóp.”

9 Uji Allah ke Yunus, “Semara itu nian apo kau karno taneman tu? Pantes dak?”

Jawab Yunus, “Aku ni mara nian sampe nak mati. Pantes bae!”^*

10 Ahérnyo, Allahyhwh ngomong cak ini, “Kau sayang samo taneman tu, awak kau idak nómbóke samo miaronyo. Taneman ni cuman tómbó semalem bae trós mati dalem semalem pulok. 11 Na, madak'i Aku dak sayang samo Niniwe, kota yang besak tu? Ado lebé dari 120.000 wong yang tinggal di sano, yang belóm pacak mbedake tangan kanan samo tangan kiri,^c trós binatangnyo jugo banyak.”