Yunus ni iola sikok nabi dari Israel yang édóp pas jamannyo Rajo Yerobeam II (793–753 SM). Yunus dikongkon Allah pegi ke Kota Niniwe óntók ngenjóktauke wong-wong di sano amen kota tu bakal diancórke karno kejahatan dio wong dewek.

Niniwe ni iola kota yang jaraknyo 900 km ke ara timur laót dari Yerusalem, di daera yang sekarang iola bagéan utara Irak. Kageknyo jadi ibu Kota Asyur. Asyur ni tekenal galak békén kekerasan samo kekejeman.

Niniwe tu kota yang besak nian trós banyak wong yang tinggal di sano. Asyur ni bemósóan samo Israel, trós baru bae ngancórke banyak kerajaan di sekitar Israel. Pas jamannyo Yunus, Israel lagi bedamai samo Asyur, tapi dio wong masé ngeraso takót dengen kekejeman Asyur tu. Jadi Yunus dak galak nóróti prénto Allah óntók pegi ke Kota Niniwe. Tapi Allah tetep bae ngérém Yunus ke sano.

Kitab Yunus ni nónjókke kito pasal kasé, kesabaran, jugo rahmat Allah óntók slóró wong, temasók nabi, wong jahat, jugo siapo bae yang belóm perna denger namo-Nyo.