1 Kapan ari, Allahyhwh ngomong ke Yunus,^a anaknyo Amitai. Uji-Nyo, 2 “Gancangla pegi ke Niniwe,^@ kota yang besak tu, trós pringetkela dio wong, soalnyo Aku la nyingok kejahatan dio wong.” 3 Laju Yunus ni begancang ngelarike diri ke ara sebaléknyo ke Tarsis,^@ supayo jaó dari adepan Allahyhwh. Dio pegi ke Yapo.^b Dio nemuke kapal yang nak ke Tarsis. Dio bayar ongkosnyo, laju naék kapal tu supayo pacak belayar dengen wong-wong tu ke Tarsis, supayo jaó dari adepan Allahyhwh.

4 Allahyhwh nguntalke angin besak ke laót, trós tejadila badai besak, sampe-sampe kapal tu nak ancór. 5 Awak kapal tu ketakótan. Dio wong mekék-mekék mintak tolong ke dewonyo dewek-dewek. Dio wong nguntalke barang-barang yang ado di jeró kapal tu ke laót óntók ngurangi berat kapal. Tapi Yunus ni mala tórón ke jeró bagéan kapal yang paléng bawa. Dio bególéng di situ, trós tetédók nyenyak. 6 Na, pas kapten kapal nemuke Yunus, dio ngomong cak ini, “Cakmano kau pacak tédók nyenyak dalem keadaan cak ini? Bangónla, bedoala ke dewo kau. Kalu-kalu bae dio bakal kesian samo kito, jadi kito dak mati.”

7 Cak itu jugo wong-wong yang ado di kapal tu saléng ngomong cak ini, “Payó kito koncang undi bae, supayo kito pacak tau lantak siapo kito ditimpo bencano ni.” Jadi dio wong ngoncang undi. Na, Yunusla yang tekeno undi tu. 8 Dio wong betanyo ke Yunus cak ini, “Enjók taukela samo kami: Lantak siapo kito ditimpo bencano ni? Apo gawean kau? Dari mano kau dateng? Apo negri kau? Dari bangso mano kau?”

9 Uji Yunus ke wong-wong tu, “Aku ni wong Ibrani. Aku takót samo Allahyhwh, Tuhan yang di surgo, yang békén laótan samo daratan.”

10 Wong-wong tu ketakótan nian trós ngomong cak ini, “Alangke beraninyo kau ngelakuke itu!”^* Soalnyo, wong-wong tu tau amen dio ngelarike diri dari adepan Allahyhwh, karno la diomongkenyo cak itu samo dio wong. 11 Jadi dio wong nanyo ke Yunus, “Nak kami apoi kau tu supayo laót ni pacak tenang, idak nyerang kami lagi? Soalnyo, laót ni tamba ganas.”

12 Uji Yunus ke dio wong, “Angkatla, untalkela aku ke laót, supayo laót pacak tenang, idak nyerang kamu lagi! Soalnyo, aku tau, lantak aku nila badai ni nimpo kamu.”

13 Dio wong tu ndayóng óntók nyobo balék ke darat, tapi dak pacak, soalnyo laót tu namba ganas nyerang dio wong. 14 Dio wong mekék ke Allahyhwh cak ini, “Ya Allahyhwh, kami mintak nian jangan biarke kami mati gara-gara nyawo wong ni! Janganla Kau tanggóngke samo kami dara wong yang dak beduso! Soalnyo, Kau la mbékén pecak yang Kau kendak'i, ya Allahyhwh.” 15 Ahérnyo dio wong ngangkat Yunus trós nguntalke dio ke laót, laju laót brenti ngamók. 16 Dio wong ketakótan nian samo Allahyhwh. Dio wong ngórbanke kórban sembeléhan óntók Allahyhwh, trós ngucapke najar^c.

17 Na, ahérnyo Allahyhwh ngérém sikok iwak besak óntók negok Yunus. Jadi Yunus ni ado di jeró perót iwak tu selamo tigo ari tigo malem.^d