<<    <     Matius     3     >    >> 
3
Awal mulo Yesus ngelayani
Kedatengan Yahya Pembaptés
(Markós 1:1-8; Lukas 3:3-9, 15-17; Yahya 1:19-28)
1 Pas ari-ari tu datengla Yahya Pembaptés becerama di padang górón Yudea, ujinyo, 2 “Betobatla, karno Kerajaan Surgo la parak!” 3 Yahya inila wong yang dimaksódke ole Nabi Yesaya pas dio ngomong cak ini,
“Tedengerla suaro wong yang mekék-mekék di padang górón,
‘Siapkela jalan óntók kedatengan Allah‡,
lóróskela jalan óntók-Nyo!’”a
4 Baju Yahya ni tebuat dari bulu unto trós iket pinggangnyo dari kólét. Pajóannyo iola belalang samo madu liar.
5 Laju, wong-wong dari Yerusalem, dari slóró wilaya Yudea, jugo dari slóró daera sekitar Sungi Yordan bedatengan ke dio. 6 Trós seabés dio wong ngakui dusonyo maséng-maséng, wong-wong itu dibaptés ole Yahya di Sungi Yordan.
7 Na, pas Yahya nyingok banyak wong Parisi samo wong Saduki jugo dateng óntók dibaptés, dio ngomong ke wong-wong tu cak ini, “Ói kamu anak ulo!b Siapo nian yang ngenjók tau kamu amen kamu pacak lari dari kemarahan Allah yang bakal dateng? 8 Ole karno tu, asélkela bua yang mbuktike petobatan kamu. 9 Jangan kiro kamu pacak ngomong di jeró ati, ‘Ibrahém iola nenek moyang kami.’c Soalnyo, aku omongke samo kamu amen Allah pacak nyadike ketórónan óntók Ibrahém dari batu-batu ni. 10 Sekarang kapak la ado di akar batang. Setiap batang yang idak ngasélke bua yang baék bakal ditebang trós dibuang ke dalem api.
11 “Aku mbaptés kamu dengen banyu yang jadi tando petobatan, tapi seabés aku bakal dateng Almasi. Dio tu iola Wong yang lebé bekuaso dari aku. Óntók gawak selop-Nyo bae aku dak pantes. Dio bakal mbaptés kamu dengen Ro Suci, jugo dengen api.d 12 Alat tampi la ado di tangan-Nyo. Dengen itula Dio bakal misake gendóm dari kólétnyo di tempat penampian. Abés tu, Dio bakal ngómpólke gendóm-Nyo ke jeró lómbóng, tapi kólét gendóm tu bakal ditunu-Nyo ke jeró api yang dak perna mati.”e
Yesus dibaptés ole Yahya Pembaptés
(Markós 1:9-11; Lukas 3:21-22; Yahya 1:32-34)
13 Abés tu, datengla Yesus dari Galilea ke Sungi Yordan nemui Yahya óntók dibaptés olenyo. 14 Tapi, Yahya beusaha nolak pintak'an Yesus tu dengen ngomong cak ini, “Sebenernyo akula yang perlu dibaptés ole Kau, tapi ngapo justru Kau yang dateng ke aku?”
15 Uji Yesus ke dio, “Biarla pasal tu tejadi, karno kito harós menui slóró kendak Allah.” Laju Yahya nóróti pintak'an Yesus tu.
16 Seabés dibaptés, Yesus langsóng metu dari banyu. Pas itu jugo, tibo-tibo tebukakla langét, trós Dio nyingok Ro Allah tórón pecak bóróng daro ke pócók-Nyo. 17 Tibo-tibo tedengerla suaro dari surgo yang ngomong cak ini, “Inila Anak Aku yang Aku kaséhi. Diola yang nyenengke ati Aku.”