4
Yesus dicoboi Éblés
(Markós 1:12-13; Lukas 4:1-13)
1 Abés tu, Yesus dipémpén ole Ro Allah ke padang górón óntók dicoboi ole Éblés. 2 Seabés Dio bepuaso selamo 40 ari 40 malem, ahérnyo laperla Dio. 3 Laju Éblés dateng, trós ngomong ke Dio cak ini, “Karno Kau Anak-Nyo Allah, kongkonla batu-batu ni jadi roti.”
4 Tapi uji Yesus, “Ado tetólés, ‘Manusio édóp bukan dari roti bae, tapi dari setiap pirman yang metu dari mólót Allah.’”a
5 Abés tu, Éblés gawak Yesus ke kota suci,b trós nempatke-Nyo di pócók atep yang paléng tinggi di Ruma Agóng Allah. 6 Uji Éblés ke Dio, “Karno Kau Anak Allah, campakkela diri Kau ke bawa. Soalnyo, ado tetólés,
‘Allah bakal mrénto malekat-malekat-Nyo óntók ngeléndóngi Kau.
Di tangannyo, dio wong bakal ngangkat Kau
supayo sekel Kau idak kesantók batu.’”c
7 Uji Yesus ke dio cak ini, “Ado tetólés jugo, ‘Janganla kau nyoboi Allah‡, Tuan kau.’”d
8 Sekali lagi, Éblés gawak Yesus ke pócók gónóng yang tinggi nian, trós mamerke slóró kerajaan dunio teko kemulyoan kerajaan-kerajaan tu ke Dio. 9 Uji Éblés ke Dio, “Galo-galonyo ni bakal aku enjókke samo Kau, amen Kau sójód nyemba aku.”
10 Laju, Yesus ngomong samo dio cak ini, “Ói Éblés, pegila! Soalnyo ado tetólés, ‘Sembala Allah‡, Tuan kau, trós cuman Dio bae yang kau layani!’”e
11 Ahérnyo Éblés tu pegi dari adepan Yesus, trós tibo-tibo malekat-malekat dateng óntók ngelayani Dio.
Yesus ngelayani di Galilea
Awal Yesus ngelayani
Yesus mulai pelayanan-Nyo di Galilea
(Markós 1:14-15; Lukas 4:14-15)
12 Pas Yesus ndenger Yahya la ditangkep, laju pegila Dio ke Wilaya Galilea.f 13 Dio ninggalke Kota Najaret, trós tinggal di Kota Kapernaum yang ado di pénggér pantai, di daera Jebulon samo Naptali.g 14 Pasal ni tejadi supayo ditepatila apo yang diomongi ole Nabi Yesaya,
15 “Ói tana Jebulon samo tana Naptali,
iola jalan ke laót, yang di sebrang Sungi Yordan,
Wilaya Galilea yang ditempati wong-wong yang bukan dari Israel!
16 Bangso yang tinggal dalem kegelepan
la nyingok terang yang besak.
Óntók wong yang tinggal di tana yang surem,
terang la besinar.”h
17 Sejak itula Yesus mulai becerama, “Betobatla, karno Kerajaan Surgo la parak!”i
Yesus manggél móréd-móréd-Nyo yang petamo
(Markós 1:16-20; Lukas 5:1-11)
18 Pas Yesus bejalan di pénggér Danau Galilea, Dio nyingok duo penjalo iwak yang lagi mbentangke jaréng iwaknyo di danau tu. Dio wong ni duo beradék. Namo dio wong iola Simon, yang namonyo digenti jadi Petrus, trós Andreas dólórnyo. 19 Yesus ngomong samo dio wong cak ini, “Payó melok Aku. Aku bakal nyadike kamu penjalo manusio.” 20 Dio wong langsóng ninggalke jaréng iwaknyo trós melok'i Yesus.
21 Abés tu, Yesus neróske pejalanan-Nyo trós Dio nyingok duo beradék laénnyo yang benamo Yakób samo Yahya di jeró perau. Waktu tu dio wong lagi mbeneri jaréng iwak besamo Jebedeus, aba dio wong. Yesus manggél Yakób samo Yahya tu, 22 laju dio wong langsóng ninggalke perau jugo abanyo, trós melok'i Yesus.
Yesus ngajar samo nyembóke wong banyak
23 Yesus bekeléléng ke slóró daera di Galilea. Dio ngajar di jeró ruma-ruma ibada, mbritoke Kabar Baék pasal Kerajaan Surgo, trós nyembóke segalo macem sakét penyakét di antaro dio wong.j 24 Brito pasal Dio ni tesebar di slóró daera di Propinsi Siria. Laju, wong-wong yang tekeno macem-macem penyakét samo pendritoan berat, yang kemasók'an setan, yang sakét ayan, jugo yang lómpó, digawak ke Dio. Trós Dio nyembóke dio wong galo. 25 Laju banyak wong yang melok'i Dio. Wong-wong tu beasal dari Wilaya Galilea, Dekapolis, Kota Yerusalem, Propinsi Yudea, jugo dari sebrang Sungi Yordan.