1 Na, ado sikok wong Parisi benamo Nikodemus, pemémpén agama wong Israel. 2 Nikodemus dateng ke Yesus pas malem ari trós ngomong cak ini, “Guru, kami^* tau amen Kau tu iola guru yang dateng dari Allah. Soalnyo, katek wong yang pacak mbékén tando-tando ajaéb pecak yang Kau lakuke^a amen Allah dak besamo wong tu.”

3 Yesus nyawab cak ini, “Aku enjók tau kau nian, amen wong dak dilaérke lagi,^* dio dak pacak nyingok Kerajaan Allah.”

4 Uji Nikodemus lagi, “Cakmano nian wong yang la tuo pacak dilaérke lagi? Pastila wong dak pacak masók ke rahém emaknyo óntók keduo kalinyo trós dilaérke lagi, kan?”

5 Uji Yesus, “Aku enjók tau kau nian, amen wong idak dilaérke dari banyu jugo idak dari Ro,^b dio idak pacak masók ke jeró Kerajaan Allah. 6 Apo yang dilaérke dari manusio^* iola manusio. Apo yang dilaérke dari Ro iola ro. 7 Dak usa heran karno Aku la ngomong samo kau, ‘Kamu harós dilaérke lagi.’ 8 Pecak angin betiup ke mano bae dio galak, trós kau denger bunyinyo, tapi idak tau dari mano datengnyo jugo ke mano peginyo, pecak itu jugo dengen wong yang dilaérke dari Ro.”

9 Nikodemus nyawab cak ini, “Cakmano pasal tu pacak tejadi?”

10 Uji Yesus, “Kau kan guru besak Israel, madak'i kau dak ngerti pasal-pasal ni? 11 Aku enjók tau kau nian, kami ngomong pasal apo yang kami tau trós ngenjók kesaksian pasal apo yang la kami jingok, tapi kamu idak nerimo kesaksian kami. 12 Amen Aku baru ngomong samo kamu pasal-pasal dari dunio ni, tapi kamu idak pecayo, madak'i kamu pacak pecayo amen Aku ngomong ke kamu pasal-pasal dari surgo. 13 Dak katek sikok wong bae yang perna naék ke surgo kecuali Dio yang tórón dari surgo, iola Anak Manusio. 14 Pecak Musa la perna naékke patóng ulo perunggu^@ di padang górón, pecak itu jugo Anak Manusio harós dinaékke, 15 supayo tiap wong yang pecayo samo Dio pacak nerimo édóp yang óntók selamo-lamonyo.”^*

16 Uji Yesus lagi, “Soalnyo, Allah la ngaséhi dunio dengen caro ni. Dio ngenjók Anak sikok-sikok-Nyo, supayo tiap wong yang pecayo samo Dio idak bakal binaso tapi punyo édóp yang óntók selamo-lamonyo. 17 Soalnyo, Allah idak ngótós Anak-Nyo ke dunio óntók ngakémi dunio, tapi supayo dunio diselametke liwat Dio.^c 18 Wong yang pecayo samo Dio idak bakal dihókóm; tapi wong yang idak pecayo la ado di bawa hókóman karno dio idak pecayo samo Anak Allah sikok-sikok-Nyo. 19 Tiap wong diakémi bedasarke ini: Terang la dateng ke dunio, tapi wong-wong lebé ngaséhi kegelepan daripado terang tu karno pebuatan-pebuatan dio wong jahat. 20 Soalnyo, tiap wong yang bebuat jahat benci terang, trós idak dateng ke terang tu supayo pebuatan-pebuatan dio wong idak ketauan. 21 Tapi, wong yang bebuat bener dateng ke terang tu supayo nyato amen pebuatan-pebuatannyo dilakuke liwat Allah.”

22 Abés tu, Yesus samo pengékót-pengékót-Nyo dateng ke daera Yudea. Di sano Dio ngabéske waktu dengen pengékót-pengékót-Nyo sambél mbaptés wong. 23 Nabi Yahya jugo mbaptés di Dósón Aenon parak Dósón Salém karno di situ banyak banyu. Wong-wong bedatengan ke Yahya trós dibaptés. 24 Pas waktu tu, Nabi Yahya belóm dimasókke ke jeró penjaro.^d

25 Na, laju, tejadila pedebatan di antaro beberapo pengékót Nabi Yahya samo sikok wong Israel yang laén pasal tato caro penyucian. 26 Dio wong dateng ke Nabi Yahya trós ngomong cak ini, “Guru, kau kan perna besaksi pasal Wong yang besamo kau di sebrang Sungi Yordan waktu tu.^e Jingokla, sekarang Dio jugo mbaptés, trós galo-galo wong dateng ke Dio!”

27 Nyawabla Nabi Yahya cak ini, “Dak katek wong yang pacak nerimo apo bae amen pasal tu idak dienjókke samo dio dari surgo. 28 Kamu dewek pacak ngenjók kesaksian pasal aku amen aku perna ngomong cak ini, ‘Aku ni bukan Almasi,’^f tapi ‘Aku diótós óntók ndului-Nyo.’ 29 Almasi tu pecak pengantén lanang, trós aku ni pecak kawannyo pengantén lanang tu. Wong yang punyo pengantén betino iola pengantén lanang. Kawan dari pengantén lanang, yang tegak trós ndengerke dio, seneng nian pas dio ndenger suaro pengantén lanang tu. Ole karno tu, kesenengan aku ni la penu. 30 Dio harós makén penténg, tapi aku harós makén dak penténg.”

31 Uji Yahya lagi, “Wong yang dateng dari pócók iola di pócók segalonyo. Wong yang beasal dari bumi iola dari bumi trós ngomongi pasal-pasal yang ado di bumi. Wong yang beasal dari surgo iola di pócók segalonyo.^* 32 Wong tu besaksi pasal apo yang la Dio jingok jugo denger di surgo, tapi kesaksian-Nyo tu ampér dak katek sikok wong bae yang nerimo. 33 Tapi, wong yang nerimo kesaksian-Nyo, dio ngakui dengen teges amen Allah tu bener. 34 Soalnyo, Wong yang diótós Allah nyampeke pirman Allah, karno Allah ngenjók Ro-Nyo dengen idak tebates samo Dio. 35 Aba ngaséhi Anak-Nyo trós la ngenjók segalonyo ke dalem tangan-Nyo.^g 36 Wong yang pecayo samo Anak punyo édóp yang óntók selamo-lamonyo. Wong yang idak pecayo samo Anak idak bakal nyingok keédópan tu, tapi kemarahan Allah masé tetep ado samo dio.”^h