4
Duso manusio petamo ditórónke samo anak-anaknyo
Anaknyo Adam mbunu adéknyo
1 Abés tu, lanang tu behóbóngan badan dengen Hawa, bininyo, laju bininyo tu bónténg trós ngelaérke Kaén.a Uji betino tu, “Aku la ndapetke sikok anak lanang karno petolongan Allahyhwh.” 2 Hawa ni jugo ngelaérke Habel, adéknyo Kaén. Habel jadi penjago kambéng domba, sedengke Kaén jadi petani.
3 Beberapo lamo abés tu, Kaén gawak sebagéan dari asél tananyo óntók jadi pesembahan ke Allahyhwh. 4 Habel ni jugo gawak beberapo anak kambéng domba petamo dari kawanan kambéng dombanyo teko gajéh-gajéhnyo.@ Allahyhwh seneng samo Habel jugo pesembahannyo, 5 tapi samo Kaén jugo pesembahannyo, Allahyhwh idak seneng. Jadi, Kaén ni panas ati nian trós rainyo jadi masem.
6 Allahyhwh ngomong ke Kaén cak ini, “Ngapo kau panas ati? Ngapo rai kau masem? 7 Amen kau bebuat baék, bukannyo bakal diterimo? Tapi amen kau idak bebuat baék, duso la nunggu di depan lawang kau. Dio benapsu nak nguasoi kau, tapi kau harós ngalakenyo.”
8 Kaén ngomong ke Habel, adéknyo, cak ini, “Payó kito pegi ke ladang.”* Pas dio wong ado di ladang, tibo-tibo Kaén nyerang Habel, adéknyo, trós mbununyo.
9 Allahyhwh ngomong ke Kaén cak ini, “Di mano Habel, adék kau tu?”
Uji Kaén, “Aku dak tau! Memangnyo aku ni penjago adék aku?”
10 Uji Allah lagi, “Apo yang la kau lakuke? Dara adék kau tu bejerét ke Aku dari tana! 11 Sekarang, tekótókla kau, tebuang jaó dari tana yang la mbukak mólótnyo óntók nerimo dara adék kau pas kau numpakenyo. 12 Amen kau gaweke tana tu, mangko tana tu idak bakal ngenjókke asél lagi óntók kau. Kau bakal jadi pengembaro yang katek tempat tinggal.”
13 Uji Kaén ke Allahyhwh, “Hókóman aku tu lebé berat daripado yang pacak aku tanggóng. 14 Jingokla, ari ni Kau ngósér aku dari tana ni, jadi aku bakal tesingit dari adepan Kau. Aku bakal jadi pengembaro jugo musapér di bumi. Siapo bae yang kagek betemu dengen aku bakal mbunu aku.”
15 Uji Allahyhwh ke dio, “Idak cak itu! Siapo bae yang mbunu kau bakal dibaleske tójó kali lipet.” Jadi, Allahyhwh ngenjók sikok tando ke Kaén supayo dio idak dibunu ole siapo bae yang betemu samo dio. 16 Ahérnyo, Kaén pegi dari adepan Allahyhwh, trós tinggal di Tana Nod,b di ara timur Taman Eden.
Kekejeman manusio mulai betamba banyak
17 Kaén behóbóngan badan samo bininyo, laju bininyo ni bónténg trós ngelaérke Henok. Na, waktu tu, Kaén lagi mbangón sikok kota, trós kota tu dinamoinyo Henok, pecak namo anak lanangnyo tu. 18 Óntók Henok laérla Irad, trós Irad punyo anak benamo Mehuyael. Mehuyael punyo anak benamo Metusael. Metusael punyo anak benamo Lamek.
19 Lamek ni bebini duo. Bini yang petamo benamo Adah, yang keduo benamo Jila. 20 Adah ngelaérke Yabal. Dio nila wong petamo yang tinggal di jeró kemah jugo yang miaro ternak. 21 Namo adéknyo iola Yubal. Dio nila wong petamo yang maénke kecapi jugo sóléng. 22 Jila jugo ngelaérke anak yang benamo Tubal-Kaén. Dio nila tukang yang mbékén slóró perkakas dari tembago jugo besi. Adék betino Tubal-Kaén iola Naama.
23 Lamek ni ngomong ke bini-bininyo cak ini,
“Adah samo Jila, dengerkela suaro aku ni!
Ói bini-bini Lamek, peratikela omongan aku!
Aku perna mbunu wong karno dio ngelukoi aku;
iyo, sikok lanang mudo karno dio nyakéti aku.
24 Amen yang mbunu Kaén dibales 7 kali lipet,c
mangko yang mbunu Lamek bakal dibales 77 kali lipet.”
25 Adam behóbóngan badan dengen bininyo lagi, laju betino tu ngelaérke sikok anak lanang laén. Hawa namoi anak tu Set,d soalnyo dio ngomong cak ini, “Allah la nentuke óntók aku ketórónan yang laén óntók jadi pengganti Habel, karno Kaén la mbununyo.” 26 Abés tu, sikok anak lanang laér óntók Set. Anak tu dinamoinyo Enos. Na, waktu itula, wong-wong mulai muji jugo manggél namo Allahyhwh.