1 Allahyhwh ngomong ke Nuh cak ini, “Masókla ke jeró kapal besak tu, kau samo seisi ruma kau, karno kaula yang Aku jingok bener di adepan Aku di antaro wong-wong jaman ni. 2 Dari segalo binatang yang halal ambékla tójó pasang, lanang samo betino, trós dari binatang yang haram^a ambékla sepasang, lanang samo betino. 3 Cak itu jugo dari bóróng-bóróng di udara ambékla tójó pasang, lanang samo betino, supayo ketórónan binatang-binatang tu tetep édóp di slóró bumi ni. 4 Soalnyo, tójó ari lagi Aku bakal nórónke ujan ke bumi selamo 40 ari 40 malem. Aku bakal musnake segalo mahlók édóp yang la Aku ciptoke tu dari bumi ni.”

5 Jadi, Nuh ngelakuke galo-galo yang la dipréntoke Allahyhwh ke dio.

6 Na, Nuh beómór 600 taón pas banjér besak nerjang bumi. 7 Nuh besamo anak-anaknyo, bininyo, jugo mantu-mantunyo masók ke jeró kapal besak tadi karno banjér besak tu. 8-9 Na, datengla ke Nuh sepasang lanang betino dari tiap jenis binatang najés jugo idak najés, dari tiap jenis bóróng, jugo dari tiap jenis mahlók yang édóp di darat. Slórónyo masók ke jeró kapal besak tu, pecak yang la dipréntoke Allah ke Nuh. 10 Seabés ketójó ari tu la liwat, tejadila banjér besak nerjang bumi.

11 Na, pas ómór Nuh 600 taón, di bulan ke-2,^b tanggal 17 bulan itu, di ari itula slóró mato banyu yang ado di laótan luas peca galo, trós slóró lawang banyu di langét tebukak. 12 Ujan lebet tórón ke bumi selamo 40 ari 40 malem.

13 Pas ari di mano ujan mulai tórón, Nuh besamo anak-anaknyo, yang iola Sem, Ham, jugo Yapet, jugo bini Nuh samo ketigo mantu betinonyo masók ke jeró kapal besak tu. 14 Iyo, dio wong masók besamo dengen tiap macem binatang liar, tiap macem binatang ternak, tiap macem binatang melata yang ngerayap di bumi, samo tiap macem binatang yang terbang, yang iola galo-galo bóróng jugo galo-galo binatang yang besayap laénnyo. 15 Segalonyo tu dateng ke Nuh trós masók ke jeró kapal besak tadi, sepasang dari slóró mahlók yang benyawo. 16 Binatang-binatang yang masók iola lanang samo betino dari slóró mahlók édóp. Mahlók-mahlók tu masók pecak yang la dipréntoke Allah ke Nuh. Ahérnyo, Allahyhwh nótóp lawang kapal tu seabés Nuh masók.

17 Banjér besak tu la belangsóng selamo 40 ari di bumi. Banyunyo makén betamba banyak sampe ngangkat kapal besak tu ngambang di pócók bumi. 18 Na, pas banyu makén tinggi jugo betamba banyak di bumi, kapal tu jadi ngambang di banyu. 19 Banyu makén betamba banyak nian di bumi sampe slóró gónóng tinggi yang ado di bawa langét tetótóp. 20 Banyu tu betamba 7 meter^* lebé tinggi, trós gónóng-gónóng tetótóp. 21 Jadi, matila slóró mahlók yang begerak di bumi, mugola itu bóróng-bóróng, binatang ternak, binatang liar, slóró binatang ngerayap yang bekerómónan di bumi, jugo manusio. 22 Slóró yang ado napas keédópan dalem édóngnyo, iola slóró mahlók yang ado di darat, mati galo. 23 Cak itula caro Allah musnake slóró mahlók édóp yang ado di bumi ni, yang iola manusio, binatang ternak, binatang liar, samo bóróng-bóróng di udara. Slórónyo tu dimusnake dari bumi ni. Cuman Nuh yang édóp, samo slóró yang ado besamo dio di jeró kapal besak tu.

24 Ahérnyo, banyu tu nguasoi bumi selamo 150 ari.