1 Na, tapi Allah nginget Nuh samo slóró binatang liar jugo slóró binatang ternak yang ado besamo dengen dio di jeró kapal besak tu. Jadi, Allah mbékén angin betiup di bumi, trós banyu mulai sórót. 2 Slóró mato banyu yang ado di laótan luas jugo lawang-lawang banyu di langét ditótóp. Trós, ujan lebet yang tórón dari langét jugo brenti. 3 Banyu tu dikit-dikit mulai sórót dari bumi. Iyo, seabés 150 ari banyu la bekurang. 4 Na, di bulan ke-7^*, tanggal 17 bulan tu, kapal tu tekandas di Pegónóngan Ararat.^a 5 Banyu tu makén namba sórót sampe bulan ke-10. Ahérnyo, pas bulan ke-10, tanggal 1 di bulan tu, kejingok'anla puncak-puncak gónóng.

6 Seabés 40 ari, Nuh mbukak jendelo kapal besak yang dibékénnyo tu, 7 trós dio ngelepaske sikok bóróng gagak. Bóróng tu terbang bolak-balék sampe banyu tu keréng dari bumi. 8 Dak lamo abés tu, dio jugo ngelepaske sikok bóróng daro óntók nyingok kalu-kalu bae banyu la sórót dari tana. 9 Tapi, bóróng daro tu idak nemuke tempat óntók betengger, laju bóróng tu balék ke Nuh, yang ado di kapal, karno slóró bumi masé penu dengen banyu. Nuh ngólórke tangannyo, nangkep bóróng tu, trós gawak bóróng tu masók ke jeró kapal. 10 Nuh nunggu 7 ari lagi, trós dio ngelepaske bóróng daro tu lagi dari kapal. 11 Laju, bóróng daro tu balék ke Nuh pas sore. Na, jingokla! Ado selembar daón jaitun seger di paruhnyo. Jadi, Nuh ni tau amen banyu la sórót dari bumi. 12 Dio nunggu 7 ari lagi, trós bóróng daro tu dilepaskenyo lagi, tapi sekali ni bóróng tu idak balék lagi ke dio.

13 Na, ahérnyo, pas ómór Nuh 601 taón, di bulan ke-1, tanggal 1 bulan tu, banyu la keréng dari pócók bumi. Pas Nuh mbukak penótóp kapal besak tu, dio nyingok sekeléléngnyo, ternyato tana la keréng. 14 Pas bulan ke-2, tanggal 27 di bulan tu, bumi la keréng nian.

15 Allah ngomong ke Nuh cak ini, 16 “Metula dari kapal tu, kau, bini kau, anak-anak kau, jugo mantu-mantu kau. 17 Gawakla metu segalo binatang-binatang yang benyawo yang ado besamo dengen kau tu, iola bóróng-bóróng, binatang laénnyo, jugo slóró yang ngerayap di bumi. Biarla binatang-binatang tu bekerómón di bumi, beranak, jugo betamba banyak^b di bumi.”

18 Jadi, metula Nuh besamo anak-anaknyo, bininyo, jugo mantu-mantunyo. 19 Setiap jenis dari binatang ternak, binatang liar, jugo bóróng-bóróng, iola slóró yang begerak di bumi, metu dari kapal besak tu.

20 Nuh mbangón sikok mesba óntók Allahyhwh. Dio ngambék beberapo ikok dari setiap macem binatang yang halal, jugo beberapo ikok dari setiap bóróng yang halal. Abés tu, dio ngenjók kórban bakaran di pócók mesba tu. 21 Na, pas Allahyhwh nyium bauk pesembahan yang haróm tu, Allahyhwh ngomong di jeró ati-Nyo cak ini, “Aku idak bakal lagi ngótók bumi ni karno manusio, mugola niat ati manusio tu jahat dari waktu dio wong masé budak kecik. Aku idak bakal lagi mbinasoke segalo yang édóp pecak yang baru bae Aku lakuke tu.