9
Allah mbékén pejanjian dengen manusio
1 Allah mberkahi Nuh jugo anak-anaknyo, trós ngomong ke dio wong cak ini, “Beranak cócóngla jugo betamba banyakla, trós penuila bumi. 2 Slóró binatang di bumi, slóró bóróng di udara, slóró yang ngerayap di tana, jugo slóró iwak di laót bakal takót nian samo kamu. Galo-galonyo tu Aku serake dalem tangan kamu. 3 Segalo yang begerak, iola yang édóp, bakal jadi pajóan kamu. Pecak Aku ngenjókke tómbóan ijo samo kamu, sekarang Aku ngenjókke galo-galonyo tu samo kamu.
4 Tapi, kamu jangan makan dagéng yang masé benyawo, iola dagéng yang masé ado daranyo.a 5 Aku pasti nóntót bales pasal dara kamu, yang iola nyawo kamu. Dari setiap binatang yang mbunu manusio Aku bakal nóntót bales. Trós, dari setiap tangan manusio, Aku bakal nóntót bales pasal nyawo sesamo manusio.
6 Siapo bae yang numpake dara manusio,
daranyo bakal ditumpake jugo ole manusio,
soalnyo pecak gambar-Nyo dewek,b
Allah mbékén manusio tu.
7 Tapi kamu, beranak cócóngla jugo betamba banyakla. Kerómónila bumi. Iyo, betamba banyakla di dalemnyo.”
8 Allah ngomong lagi ke Nuh jugo ke anak-anaknyo yang ado besamo dio, cak ini, 9 “Na, jingokla! Sekarang Aku netepke pejanjian Akuc dengen kamu, dengen ketórónan kamu kageknyo, 10 jugo dengen slóró mahlók édóp yang ado besamo kamu, yang iola bóróng-bóróng, binatang ternak, jugo slóró binatang liar yang ado besamo kamu, iyo, dengen slóró yang metu dari kapal besak tu, yang iola slóró binatang yang ado di bumi. 11 Aku netepke pejanjian Aku dengen kamu. Slóró mahlók yang édóp idak bakal lagi dibinasoke ole banjér besak. Trós, idak bakal ado lagi banjér besak yang musnake bumi.”
12 Allah jugo ngomong cak ini, “Inila tando pejanjian yang Aku békén antaro Aku samo kamu, jugo slóró mahlók édóp yang ado besamo kamu. Pejanjian ni tórón-temórón óntók selamo-lamonyo. 13 Aku narokke bósór* Aku di langét,* itula yang bakal jadi tando pejanjian antaro Aku samo bumi. 14 Jadi, tiap kali Aku ndatengke awan di pócók bumi trós bósór tu tejingok di langét, 15 Aku bakal nginget pejanjian antaro Aku samo kamu jugo samo slóró mahlók édóp, segalo yang benyawo. Idak bakal perna lagi banyu jadi banjér besak óntók musnake slóró mahlók édóp. 16 Na, tiap kali bósór tu ado di langét, Aku bakal nyingoknyo trós nginget pejanjian yang selamo-lamonyo antaro Allah samo slóró mahlók édóp, segalo yang benyawo yang édóp di bumi.”
17 Jadi, Allah ngomong samo Nuh cak ini, “Itula tando pejanjian yang la Aku tetepke antaro Aku dengen slóró mahlók édóp yang ado di bumi.”
Nuh ngótók sala sikok anak lanangnyo trós mberkahi anak-anak lanangnyo yang laén
18 Anak-anak Nuh yang metu dari kapal besak tu iola Sem, Ham, samo Yapet. Ham ni iola abanyo Kanaan. 19 Ketigo wong ni iola anak-anaknyo Nuh, trós dari dio wong inila slóró manusio tesebar di bumi.
20 Nuh jadi petani. Dio nila yang awalnyo mbékén kebon anggór. 21 Na, waktu tu, seabés minum-minum anggór, dio ni mabok trós bególéng telanjang di jeró kemahnyo. 22 Ham, bapaknyo Kanaan ni, nyingok abanyo telanjang. Trós, diceritokenyo samo keduo kakaknyo yang ado di jabo. 23 Abés tu, Sem samo Yapet ni ngambék sikok juba trós mbentangkenyo di bahu dio wong. Dio wong bejalan móndór trós nótópi aurat abanyo. Rai dio wong ni ngadep ke ara yang belawanan, jadi dio wong idak nyingok aurat abanyo.
24 Na, pas Nuh sadar dari maboknyo, dio tau apo yang la dilakuke ole anak bungsunyod ke dio. 25 Jadi, dio ngomong cak ini,
“Tekótókla Kanaan!
Biarla dio jadi babu yang paléng hino
óntók kakak-kakaknyo.”
26 Ujinyo lagi,
“Pujila Allahyhwh, Tuhannyo Sem!
Biarla Kanaan jadi babunyo Sem!
27 Biarla Allah ngelapangke tempat tinggal Yapet!
Biarla Yapet tinggal dalem kemah-kemah Sem,
trós biarla Kanaan jadi babunyo Yapet!”