20
Doa mintak kemenangan óntók rajo Israel
1 Catetan óntók pemémpén pujian: Saér nyanyian ni dari Daód.
2 Kironyo Allahyhwh nyawab kaua pas ari kesaroan;
kironyo namo Tuhannyo Yakób ngeléndóngi kau.
3 Kironyo Dio ngenjók petolongan dari tempat suci,
trós nopang kau dari Sion.
4 Kironyo Dio nginget slóró pesembahan kau,
trós seneng samo kórban bakaran kau. Selah
5 Kironyo Dio ngarunioke samo kau sesuai dengen kendak ati kau,
trós mbékén slóró rencano kau berasél.
6 Kami bakal besorak karno kemenangan kau,
trós ngangkat bendera-bendera dalem namo Tuhan kito.
Kironyo Allahyhwh ngabólke slóró pintak'an kau.
7 Sekarang aku tau amen Allahyhwh bakal nyelametke
wong yang dilanték-Nyo.
Dio bakal nyawab dari surgo-Nyo yang suci
dengen kuaso keselametan dari tangan kanan-Nyo.
8 Ado wong yang ngandalke kreto-kreto perangnyo,
ado jugo yang ngandalke kudo-kudonyo,
tapi kito ngandalke namo Allahyhwh, Tuhan kito.
9 Dio wong bakal betekók lótót trós nyampak,
tapi kito bangkét trós tegak dengen tegó.
10 Ya Allahyhwh, selametkela rajo!
Jawabla kami pas waktu kami bejerét!