21
Nyanyian sókór karno rajo diberkahi Allah
1 Catetan óntók pemémpén pujian: Saér nyanyian ni dari Daód.
2 Ya Allahyhwh, dalem kekuatan Kau rajo beseneng;
dalem keselametan Kau dio besorak nian!
3 Kau la ngenjók ke dio kendak atinyo,
trós Kau idak nahan pintak'an bébérnyo. Selah
4 Iyo, Kau nyambót dio dengen berkah-berkah yang baék;
Kau masangke mahkota emas murni di pócók palaknyo.
5 Dio mintak keédópan dari Kau,
trós Kau ngenjók ke dio ómór panjang sampe selamo-lamonyo.
6 Besak kemulyoannyo karno keselametan dari Kau;
kehormatan jugo keagóngan, Kau karunioke samo dio.
7 Iyo, Kau ngarunioke berkah ke dio óntók selamonyo,
trós Kau mbékén dio besorak kesenengan karno hadérat Kau.
8 Soalnyo rajo pecayo samo Allahyhwh,
trós ole karno kasé stio dari Yang Maha Besak,
dio dak bakal goya.
9 Tangan kaua bakal nangkep slóró mósó kau,
tangan kanan kau bakal nangkep wong-wong yang mbenci kau.
10 Kau bakal mbékén dio wong pecak tungku api pas kau móncól.
Allahyhwh bakal negok dio wong dalem kemarahan-Nyo,
trós api bakal matike dio wong.
11 Kau bakal mbinasoke ketórónan dio wong dari bumi,
jugo penerós dio wong dari antaro anak-anak manusio.
12 Mugola dio wong nyiapke kejahatan óntók ngelawan kau,
mugola dio wong beniat bórók,
dio wong dak bakal berasél.
13 Iyo! Kau bakal mbékén dio wong lari balék
pas kau ngarake tali-tali bósór kau ke dio wong.
14 Ya Allahyhwh, ditinggikela Kau dalem kekuatan Kau!
Kami bakal nyanyi trós muji pasal kuaso Kau.