33
Puji-pujian óntók Allah, pencipto jugo penguaso dunio
1 Besorak-sorakla karno Allahyhwh, ói wong-wong bener!
Pantesla wong yang lórós naékke puji-pujian.
2 Ngucap sókórla samo Allahyhwh dengen kecapi!
Dengen gambós sepóló senar, maénkela óntók Dio!
3 Nyanyikela nyanyian yang baru óntók Dio!
Maénkela kecapi dengen lihai, trós besorakla!
4 Soalnyo, pirman Allahyhwh tu bener,
jugo galo-galo pebuatan Dio digaweke-Nyo dengen kestioan.
5 Dio cinto kebeneran jugo keadélan;
bumi penu dengen kasé stio Allahyhwh.
6 Dengen omongan Allahyhwh, alam semesto dibékén,
trós dengen napas dari mólót-Nyo dewek, Dio mbékén segalo yang ado di langét.
7 Dio ngómpólke banyu laót pecak bendóngan,
ditarok-Nyo laótan di jeró gudang-Nyo di pócók langét.a
8 Biarla slóró bumi takót samo Allahyhwh,
trós biarla slóró pendódók dunio kagóm samo Dio.
9 Soalnyo, waktu tu Dio ngomong, trós galonyo ado;
Dio mrénto, trós galonyo ditetepke.
10 Allahyhwh ngancórke nasehat bangso-bangso,
trós Dio ngalangi rencano suku-suku bangso.
11 Tapi nasehat Allahyhwh tetep sampe selamo-lamonyo,
trós rencano ati-Nyo sampe tórón-temórón.
12 Senengla bangso yang Tuhannyo tu Allahyhwh;
suku bangso yang la dipélé-Nyo dewek jadi pusako kepunyoan-Nyo.
13 Allahyhwh nyingok dari surgo;
Dio nyingok galo-galo manusio.
14 Dari tempat Dio dódók, Dio masati galo-galo yang tinggal di bumi.
15 Diola yang mbentók ati dio wong galo,
yang meratike segalo pebuatan dio wong.
16 Rajo idak diselametke ole besaknyo pasókan.
Tentra idak dibebaske ole besaknyo kekuatan.
17 Kudo iola arepan yang sio-sio óntók kemenangan.
Mugola kekuatannyo besak, dio dak pacak nyelametke.
18 Jingokla, mato Allahyhwh nuju ke wong-wong yang takót samo Dio,
jugo ke wong-wong yang ngarep kasé stio-Nyo,
19 óntók ngelepaske jiwo dio wong dari maót,
trós óntók miaro nyawo dio wong pas kelaperan.
20 Jiwo kito nunggu-nunggui Allahyhwh.
Diola penolong jugo tameng kito.
21 Soalnyo dalem Dio ati kito seneng
karno kito pecayo samo namo-Nyo yang suci.
22 Ya Allahyhwh, biarla kasé stio Kau tetep samo kami,
pecak kami ngarep samo Kau.