1 Pas ari ketigo, Ester makek juba kerajaannyo trós tegakla dio di halaman dalem di istana rajo^a, tepat di adepan ruang tempat dódók rajo. Rajo lagi dódók di korsi kekuasoannyo, di jeró istana kerajaan, beadepan dengen lawang istana rajo. 2 Na, pas dio nyingok Ratu Ester tegak di halaman tu, senengla ati rajo. Jadi, dio ngólórke tongkat emas yang ado di tangannyo ke Ester.^b Ahérnyo, Ester marak'inyo trós nyentu ójóng tongkat tu.

3 Rajo ngomong ke dio cak ini, “Ado apo, Ratu Ester? Apo pintak'an kau? Mala separo dari kerajaan ni bakal aku enjókke samo kau.”

4 Uji Ester, “Amen baék nórót Rajo, biarla Rajo samo Haman dateng ari ni ke pejamuan yang aku siapke óntók Rajo.”

5 Laju, rajo ngomong cak ini, “Gancangla gawak Haman ke sini supayo kami pacak nóróti pintak'an Ester.” Jadi, rajo samo Haman dateng ke pejamuan yang la disiapke Ester.

6 Na, pas lagi di pejamuan anggór,^c rajo ngomong samo Ester cak ini, “Apo pemohonan kau? Pasti bakal dikabólke óntók kau. Apo pintak'an kau? Mala separo dari kerajaan ni bakal aku enjókke samo kau.”

7 Ester nyawab cak ini, “Inila pemohonan samo pintak'an aku. 8 Amen Rajo bebaék ati samo aku, trós amen baék nórót Rajo óntók ngabólke pemohonan aku jugo menui pintak'an aku ni, biarla Rajo dateng lagi besamo Haman ke pejamuan yang bakal aku siapke óntók kamu beduo. Besok aku bakal jawab petanyoan Rajo.”

9 Pas ari tu, Haman metu dengen besemangat jugo seneng ati. Tapi, pas dio nyingok Mordekai di lawang gerbang istana rajo, trós Mordekai ni idak gemeter ketakótan jugo idak tegak ngormati Haman, na laju dio jadi mara nian samo Mordekai tu.

10 Mugola cak itu, Haman masé nahan diri trós balék ke ruma. Ahérnyo, dio ngongkon kawan-kawannyo jugo Jeres, yang iola bininyo, óntók dateng. 11 Haman becerito ke dio wong pasal kemulyoan kekayoannyo jugo jumla anak lanangnyo. Dio becerito pasal slóró kemulyoan yang dienjók rajo ke dio. Dio jugo becerito pasal kedódók'annyo yang ditinggike ngelebéi pejabat-pejabat samo hamba-hamba rajo yang laén. 12 Trós, Haman nambake, “Mala Ratu Ester dak ngundang siapo-siapo kecuali aku óntók dateng besamo rajo ke pejamuan yang diadokenyo. Apolagi besok aku diundangnyo lagi besamo rajo. 13 Tapi,” ujinyo, “galo-galonyo ni katek artinyo óntók aku selamo aku masé nyingok Mordekai, wong Israel tu, dódók di lawang gerbang istana rajo!”

14 Ahérnyo, Jeres jugo slóró kawan Haman ngomong ke dio cak ini, “Kongkonla wong békén cagak kayu setinggi lebé dari 20 meter.^d Besok paginyo, omongkela samo rajo supayo Mordekai dicócókke di cagak kayu tu. Abés tu, pegila kau dengen seneng ati besamo rajo ke pejamuan tu.” Ósólan tu dianggep baék ole Haman, jadi dikongkonla wong óntók békén cagak kayu tu.