6
Mordekai dihormati Rajo Ahasweros
1 Na, pas malem tu rajo dak pacak tédók. Mangko dari tu, dio mréntoke supayo kitab catetan sejara kerajaan digawak trós dibacoke di adepannyo. 2 Di situ ado tetólés amen Mordekai perna ngelaporke Bigtan jugo Teres, yang iola keduo kasém rajo penjago lawang gerbang istana kerajaan yang ngerencanoke óntók ngabési Rajo Ahasweros.
3 Jadi, rajo betanyo cak ini, “Kehormatan jugo kemulyoan apo yang la dienjókke samo Mordekai karno pasal ni?”
Uji pelayan-pelayan rajo tu, “Belóm ado samo sekali yang dienjókke samo dio.”
4 Rajo betanyo lagi, “Siapo yang ado di halaman tu?” Na, dak taunyo, Haman ni baru bae masók ke halaman luar istana óntók ngomong samo rajo, supayo Mordekai dicócókke di cagak kayu yang la disiapke Haman óntók dio.
5 Uji pelayan-pelayan rajo, “Itu tu Haman. Dio lagi tegak di halaman.”
Uji rajo, “Kongkonla dio masók.”
6 Jadi Haman masók. Na, betanyola rajo ke dio cak ini, “Amen rajo nak ngormati sikok wong, apo yang harós rajo lakuke óntók ngormati wong tu?”
Haman ngomong di jeró atinyo, “Siapo lagi yang nak dienjók kehormatan ole rajo amen bukan aku?”
7 Uji Haman ke rajo, “Óntók wong yang nak Rajo hormati tu, 8 biarla dimetuke juba kerajaan yang perna dipakek Rajo, jugo kudo yang biaso ditunggangi Rajo, trós palak kudo tu dipakekke mahkota kerajaan. 9 Biarla juba samo kudo tu diserake ke tangan sala sikok pejabat kerajaan, yang iola wong ningrat kerajaan. Abés tu, biarla juba tu dipakekke samo wong yang nak Rajo hormati tu, trós biarla dio diarak di pócók kudo di lapangan kota sambél dipekékke di depannyo, ‘Cak inila caro rajo mperlakuke wong yang nak dio hormati!’”
10 Na, uji rajo ke Haman, “Gancangla ambék juba samo kudo pecak yang la kau omongke tu, buatla pecak itu ke Mordekai, wong Israel tu, yang dódók di lawang gerbang istana kerajaan. Jangan ado sikok kato bae yang kurang dari galo-galo yang la kau omongke tu.”
11 Jadi, Haman ngambék juba samo kudo tu, trós dipakekkenyo ke Mordekai. Ahérnyo, Haman ngarak Mordekai di pócók kudo di lapangan kota sambél mekék di depannyo, “Cak inila caro rajo mperlakuke wong yang nak dihormatinyo!”a
12 Abés tu, Mordekai balék ke lawang gerbang istana kerajaan, tapi Haman begancang balék ke rumanyo dengen sedé ati jugo dengen nótópi palaknyo.b 13 Haman nyeritoke samo Jeres, yang iola bininyo, jugo samo slóró kawannyo pasal galo-galo yang dio alami.
Na, ahérnyo, bininyo samo kawan-kawannyo yang bijak tu ngomong ke dio cak ini, “Sekarang kau la mulai kala di adepan Mordekai. Karno dio tu wong Israel,c mangkonyo kau idak bakal sanggóp ngelawan dio. Sebaléknyo, kau pasti kala nian di adepannyo.” 14 Na, pas dio wong masé ngomong samo Haman, datengla kasém rajo trós begancang nganter Haman ke pejamuan yang la disiapke Ester.