1 Laju, rajo samo Haman dateng ke pejamuan Ratu Ester. 2 Pas ari keduo, di pejamuan anggór^a tu, rajo ngomong lagi ke Ester cak ini, “Apo pemohonan kau, Ratu Ester? Pasti bakal dikabólke óntók kau. Apo pintak'an kau? Mala separo dari kerajaan ni bakal aku enjókke samo kau.”

3 Ester nyawab cak ini, “Amen Rajo bebaék ati óntók ngabólke pemohonan aku, aku mintak nian, selametkela nyawo aku, jugo selametkela bangso aku. 4 Soalnyo, aku samo bangso aku ni la dijual^b óntók diancórke, dibunu, jugo dibinasoke. Seandainyo kami cuman dijual óntók dijadike budak lanang jugo budak betino, aku bakal diem bae, karno Rajo idak seharósnyo diganggu dengen pasal kecik cak ini.”^c

5 Na, laju, ngomongla Rajo Ahasweros ke Ratu Ester cak ini, “Siapo nian wong tu? Di mano wong yang berani nak bebuat cak itu?”

6 “Penganiayo jugo mósó kami tu,” uji Ester, “iola Haman yang jahat ni!”

Ketakótan nianla Haman di adepan rajo samo ratu. 7 Laju, bangkétla rajo dengen panas atinyo ninggalke pejamuan anggór tu, trós pegi ke taman istana. Tapi, Haman masé tetep tinggal óntók mintak ke Ratu Ester supayo nyawonyo diampóni, karno Haman tau amen rajo la mótóske óntók ngókóm dio.

8 Pas rajo balék dari taman istana ke tempat pejamuan anggór tu, Haman lagi besójód di bangku bekasór tempat Ester bególéng. Uji rajo, “Apo dio jugo nak mperkosa ratu di adepan aku, di jeró istana aku pulok?”

Seabés omongan tu metu dari mólót rajo, wong-wong nyelóbóngi rai Haman. 9 Harbona, yang iola sala sikok kasém rajo, ngomong cak ini, “Lagi pulok ado cagak kayu yang la dibékén Haman óntók mbunu Mordekai, wong yang la nyelametke Rajo dengen laporannyo tu.^d Cagak yang la tegak di ruma Haman tu tingginyo lebé dari 20 meter!”^e

Uji rajo, “Cócókkela Haman di cagak tu!”^f 10 Ahérnyo, Haman dicócókke di cagak kayu yang la disiapkenyo óntók Mordekai. Barula kemarahan rajo redo.