10
Doa óntók wong yang saroa
1 Ya Allahyhwh, ngapo Kau tegak jaó-jaó?
Ngapo Kau nyingitke diri Kau pas kami saro?
2 Dengen sombong wong jahat ngejer wong yang saro.
Biarkela wong jahat ketangkep dalem rencano yang la dio wong mbékén dewek.*
3 Iyo, wong jahat nyombongke napsu atinyo.
Wong rakós ngótók'i trós ngino Allahyhwh.
4 Uji wong jahat dengen rai tecungak, “Dio dak bakal nóntót!”
Pékérannyo cuman, “Dak katek Tuhan!”
5 Jalan-jalannyo berasél terós.
Hókóm-hókóm Kau ado di tempat tinggi, jaó dari pemékéran dio.
Dio nganggep enteng galo-galo mósónyo.
6 Di jeró atinyo dio ngomong, “Aku dak bakal tegoyake!
Aku dak bakal perna keno kesaroan!”
7 Mólótnyo penu dengen kótók, kecalakan, jugo penindesan.
Di bawa lidanyo ado kesaroan jugo kejahatan.
8 Dio dódók nyegat di dósón-dósón.
Di tempat yang tesingit dio mbunu wong yang dak besala.
Matonyo ngintei wong yang sial.
9 Dio nyegat di tempat yang tesingit pecak singo di semak-semak.
Dio nyegat óntók nangkep wong yang saro.
Dio nangkep wong yang saro tu dengen naréknyo ke jeró jaréngnyo.
10 Dio mbóngkók trós ngendep-ngendep,
laju, dengen kekuatannyo, dio nyampakke wong yang sial tu.
11 Uji wong jahat di jeró atinyo,
“Na! Allah la lupo!
Dio la maléngke rai-Nyo,
trós Dio dak bakal nyingoknyo!”
12 Jadi, bangkétla, ya Allahyhwh!
Tórónla tangan Kau, Ya Tuhan!
Janganla ngelupoke wong yang saro.
13 Kok, wong jahat ngino Allah?
Kok, dio ngomong di jeró atinyo, “Allah* dak bakal nóntót!”?
14 Kau memang nyingoknyo!
Iyo, Kau meratike kesaroan jugo kesedéan.
Kau ngambéknyo ke dalem tangan Kau dewek.
Wong yang sial pasra samo Kau.
Kaula penolong anak yatém.
15 Patakela tangan wong yang beduso jugo wong jahat!
Tóntótla dusonyo sampe Kau dak nemukenyo lagi!
16 Allahyhwh iola Rajo óntók seterósnyo jugo selamo-lamonyo;
bangso-bangso yang jahat bakal dimusnake dari tana-Nyo.
17 Kepéngénan ati wong yang saro Kau dengerke, ya Allahyhwh.
Kau bakal nguatke ati dio wong.
Kau bakal nyiapke kópéng Kau
18 óntók mbela anak yatém jugo wong yang tetindes,
sampe dak katek lagi wong yang nakótke di bumi.