11
Allah tempat peléndóngan wong bener
1 Catetan óntók pemémpén pujian: Saér nyanyian ni dari Daód.
Ói mósóku! Samo Allahyhwh aku beléndóng.
Cakmano nian kau pacak ngomong samo aku cak ini,
“Terbangla gancang ke gónóng kau, pecak bóróng!
2 Jingokla! Wong jahat ngelentórke bósórnyo
trós masang pana di tali bósórnyo
óntók meci dalem kegelepan wong yang lórós atinyo.
3 Amen dasar-dasar masyarakat la diancórke,
apo yang pacak wong bener lakuke?”
4 Allahyhwh ado di jeró Ruma Agóng-Nyo yang suci.
Allahyhwh! Korsi kekuasoan-Nyo ado di surgo!
Mato-Nyo masati;
sorotan mato-Nyo nyoboi anak-anak manusio.
5 Allahyhwh nyoboi wong bener samo wong jahat.
Dio benci wong yang cinto samo kekejeman.
6 Dio bakal ngujani wong jahat dengen baro areng.
Api, belerang, jugo angin panas iola bagéan takdéra dio wong.
7 Allahyhwh tu bener;
Dio cinto kebeneran.
Wong yang lórós atinyo bakal jingok rai-Nyo.