17
Doa mintak diagók'i Allah
1 Doa Daód.
Ya Allahyhwh, dengerkela pekaro yang bener.
Peratikela jerétan aku!
Pasangla kópéng óntók doa aku,
yang metu dari bébér yang dak ngolai.
2 Dari hadérat Kaula sekironyo dateng pengakéman,
trós mato Kau sekironyo jingok apo yang adél.
3 Kau selédék'i ati aku;
Kau merikso aku pas malem ari;
Kau nguji aku;
tapi Kau idak nemuke apo-apo.
Aku la mótóske
supayo mólót aku idak kelewatan.
4 Pasal pebuatan manusio:
Aku ni la jago diri aku dari jalan-jalan kekejeman
sesuai dengen prénto yang Kau sampeke.
5 Sekel aku tetep di jalór Kau,
langka aku dak tegoyake.
6 Aku ni mekék samo Kau
karno Kau bakal nyawab aku, ya Allah.
Pasangla kópéng óntók aku,
dengerkela omongan aku.
7 Nyatokela kasé stio Kau yang ajaéb tu!
Kaula penyelamet wong-wong yang beléndóng di tangan kanan Kau
dari mósó-mósó dio wong.
8 Jagola aku pecak biji mato Kau,
trós singitila aku di bawa dekepan sayap Kau
9 dari wong-wong jahat yang nak mbinasoke aku,
iola mósó-mósó aku yang ngepóng aku.
10 Dio wong ngeraske ati sampe katek raso kesiana;
mólót dio wong ngomong dengen sombong.
11 Sekarang dio wong ngepóng langka aku.
Dio wong ngéntép óntók ngempaske aku ke tana.
12 Dio wong pecak singo yang péngén nyabék-nyabék,
pecak singo mudo yang dódók di tempat singitannyo.
13 Ya Allahyhwh, bangkétla!
Adangla dio wong trós kalakela dio wong!
Lepaskela jiwo aku dari wong jahat dengen pedang Kau,
14 dari manusio dengen tangan Kau, ya Allahyhwh,
iola wong-wong dunio, yang bagéannyo cuman ado dalem édóp ini.
Kau penui perót dio wong dengen apo yang Kau simpen,
anak-anak dio wong kenyang
trós dio wong ninggalke sisonyo óntók kupek-kupeknyo.b
15 Tapi aku, dalem kebeneran aku bakal jingok rai Kau,
trós pas aku bangón, aku bakal seneng jingok rupo Kau.c