27
Aman dalem léndóngan Allahyhwh
1 Dari Daód.
Allahyhwh iola terang aku jugo keselametan aku;
samo siapo aku harós takót?
Allahyhwh iola benteng édóp aku;
samo siapo aku harós gemeter?
2 Pas wong-wong jahat dateng nyerang aku óntók makan dagéng aku,
iola lawan-lawan aku jugo mósó-mósó aku,
dio wong tula yang tebentor trós nyampak.
3 Mugola bekemah sikok pasókan nempóri aku,
ati aku dak lokak takót.
Mugola móncól perang ngelawan aku,
cak itu jugo aku tetep pecayo.
4 Sikok pasal yang aku mintak dari Allahyhwh,
itula yang aku kendak'i:
iola netep di jeró Ruma Agóng Allahyhwh seómór édóp aku,
óntók nyaksike keindahan Allahyhwh,
jugo óntók nyari Dio di jeró Kemah Suci-Nyo.
5 Soalnyo Dio bakal ngeléndóngi aku di tempat tedó-Nyo pas ari saro,
Dio bakal nyingitke aku dalem léndóngan Kemah Suci-Nyo,
trós Dio naékke aku ke pócók batu karang, tempat yang aman.
6 Mangko tu, palak aku teangkat di pócók mósó-mósó yang ngepóng aku.
Trós di Kemah Suci-Nyo,
aku bakal ngenjók kórban sembeléhan dengen besorak-sorak.
Aku bakal nyanyike jugo ngelantónke puji-pujian óntók Allahyhwh.
7 Ya Allahyhwh, dengerla suaro aku pas aku bejerét!
Mura atila samo aku trós jawabla aku!
8 Pasal Kau, ati aku ngomong,
“Carila hadérat-Nyo.”
Hadérat Kau, ya Allahyhwh, bakal aku cari.
9 Janganla nyingitke hadérat Kau dari aku.
Dalem kemarahan Kau, janganla nolak hamba Kau ni.
Kaula penolong aku,
janganla nalakke aku apo ninggalke aku,
ya Tuhan penyelamet aku!
10 Mugola aba samo emak ninggalke aku,
Allahyhwh bakal nyambót aku.
11 Ya Allahyhwh, ajarkela aku jalan Kau,
trós pémpénla aku di jalan yang rato, karno mósó-mósó aku.
12 Janganla nyerake aku ke kendak lawan-lawan aku,
karno saksi-saksi palsu tu la bangkét nentang aku,
iola saksi-saksi yang kejem.a
13 Aku tetep pecayo kalu aku bakal jingok kebaék'an Allahyhwh
di negri wong-wong yang édóp.
14 Ói dólórku, ngarepla samo Allahyhwh!
Kuatkela jugo mantepkela ati kau!
Iyo, ngarepla samo Allahyhwh!