31
Wong pecayo jadi aman dalem tangan Allah
1 Catetan óntók pemémpén pujian: Saér nyanyian ni dari Daód.
2 Ya Allahyhwh, samo Kaula aku beléndóng;
jangan perna biarke aku dipermaluke.
Lepaskela aku dalem keadélan Kau!
3 Pasangla kópéng Kau óntók aku!
Gancangla bebaske aku!
Jadila gónóng batu peléndóngan aku,
jugo benteng óntók nyelametke aku!
4 Karno Kaula batu karang jugo benteng aku,
jugo karno namo Kau, pémpénla trós tóntónla aku!
5 Metukela aku dari jaréng
yang diem-diem dipasang óntók aku,
karno Kaula tempat peléndóngan aku.
6 Ke dalem tangan Kaula aku serake diria aku;
Kau la nebós aku, ya Allahyhwh, Tuhan yang stio.
7 Aku benci wong yang nyemba berhalo yang sio-sio;
tapi samo Allahyhwh, aku pecayo.
8 Aku bakal besorak jugo beseneng dalem kasé stio Kau,
karno Kau nyingok kesaroan aku
jugo tau kesesekan jiwo aku.
9 Kau idak nyerake aku ke tangan mósó,
tapi Kau negakke sekel aku di tempat yang lapang.
10 Mura atila samo aku, ya Allahyhwh,
karno aku dalem kesesekan.
Mato aku lesu karno sengsaro,
cak itu jugo jiwo samo badan aku.
11 Soalnyo édóp aku abés dengen kesedéan,
jugo taón-taón aku dengen réntéan.
Kekuatan aku róntó karno kesalahan aku,
jugo tulang-tulang aku jadi keropos.
12 Ole karno slóró mósó aku, aku dihino,
dihino nian ole sesamo aku.
Aku jadi kengerian óntók kawan-kawan aku.
Wong-wong yang nyingok aku di jalan ngelarike diri dari aku.
13 Aku la dilupoke, pecak wong mati.
Aku la jadi pecak guci yang ancór.
14 Soalnyo aku denger bésék'an dari banyak mósó.
Ado kengerian di mano-mano!
Pas dio wong besamo-samo beróndéng ngelawan aku,
dio wong beniat ngambék nyawo aku.
15 Tapi aku pecayo samo Kau, ya Allahyhwh.
Uji aku, “Kaula Tuhan aku!”
16 Takdér aku ado dalem tangan Kau.
Lepaskela aku dari tangan mósó-mósó aku,
dari wong-wong yang ngejer aku!
17 Biarla cahayo rai Kau nyinari hamba Kau ni,
trós selametkela aku karno kasé stio Kau.
18 Ya Allahyhwh, janganla biarke aku dipermaluke,
karno aku bejerét samo Kau.
Biarla wong-wong jahat dipermaluke;
biarla dio wong tórón ke dunio wong mati trós tediem.
19 Biarla bébér yang ngolai dikebet,
yang ngomong dengen sombong ke wong bener,
dengen ngesok jugo ngino.
20 Alangke belimpanyo kebaék'an Kau
yang la Kau siapke óntók wong-wong yang takót samo Kau,
yang la Kau lakuke óntók wong-wong yang beléndóng samo Kau,
di adepan anak-anak manusio!
21 Di jeró léndóngan hadérat Kau, Kau nyingiti dio wong
dari pesekongkolan manusio.
Di tempat tedó, Kau ngeléndóngi dio wong
dari adu mólót.
22 Pujila Allahyhwh!
Karno Dio la nónjókke kasé stio-Nyo yang ajaéb samo aku
pas aku ado di jeró kota yang tekepóng.
23 Aku ngomong dalem ketakótan aku,
“Aku dibuang dari adepan mato Kau.”
Tapi, Kau ndenger suaro pintak'an aku
pas aku bejerét mintak tolong samo Kau.
24 Kaséhila Allahyhwh,
ói kamu wong-wong além-Nyo!
Allahyhwh ngeléndóngi wong-wong yang stio,
tapi mbales wong yang sombong dengen dak tanggóng-tanggóng.
25 Kuatkela trós tegókela ati kau,
ói kamu wong-wong yang bearep samo Allahyhwh!