139
Doa ngagumi Allah, Tuhan Yang Maha Deket
1 Catetan óntók pemémpén pujian: Saér nyanyian ni dari Daód.
Ya Allahyhwh, Kau selédék'i jugo ngenal aku.
2 Kau tau pas aku dódók jugo pas aku tegak,
Kau ngerti pékéran aku dari jaó.
3 Kau prikso pas aku bejalan jugo pas aku bególéng,
Kau ngenal slóró jalan aku.
4 Malahan sebelóm lida aku ngucapke kato-kato,
sebenernyo, Kau la tau slórónyo, ya Allahyhwh.
5 Kau mbentengi aku dari buri sampe depan,
trós dari pócók tangan Kau nódóngi aku.
6 Keliwat hebat pengetauan ni buat aku,
keliwat tinggi, dak sanggóp aku ngeraényo.
7 Ke mano aku pacak pegi njaói ro Kau?
Ke mano aku pacak lari dari adepan Kau?
8 Seandainyo aku naék ke langét, Kau ado di sano;
seandainyo aku tórón kea dunio wong mati, Kau jugo ado di sano.
9 Seandainyo aku terbang dengen sayap matoari pajar,
trós netep di ójóng laótb pas matoari tebenem,
10 jugo di sanola tangan Kau bakal nóntón aku;
tangan kanan Kau bakal megangi aku.
11 Seandainyo aku mintak kegelepan nódóngi aku,
trós cahayo sekeléléng aku jadi malem,
12 mala kegelepan tu idak gelep óntók Kau,
trós malem besinar pecak siang;
nak gelep nak terang samo bae.
13 Sebenernyo Kau yang mbékén ati aku;
Kau nenun aku di jeró kandóngan emak aku.
14 Aku ngucap sókór samo Kau, karno hebat jugo ajaéb kejadian aku;
ajaéb pebuatan Kau,
jiwo aku bener-bener nyadarinyo.
15 Tulang-tulang aku idak tetótóp dari Kau
pas aku dijadike di tempat yang resio,
pas aku disulam di bagéan bumi paléng dalem;
16 mato Kau nyingok pas aku belóm tebentók,
trós dalem kitab Kau, slóró ari aku la tetólés,
galonyo tu ditentuke,
sebelóm ado sikok darinyo yang dimulai.
17 Óntók aku, saro nian pékéran-pékéran Kau, ya Allah!
Besak nian jumlanyo!
18 Amen aku pacak ngétóngnyo, jumlanyo lebé banyak dari pasér.
Aku bangón, trós aku masé besamo Kau.
19 Kironyo Kau bunu wong-wong jahat, ya Allah!
“Ói penumpa-penumpa dara, pegila jaó dari aku!”
20 Dio wong ngatoi Kau dalem pesekongkolan.
Dengen sio-sio mósó-mósó Kau ninggike suaro ngelawan Kau.
21 Madak'i aku idak benci samo wong-wong yang mbenci Kau, ya Allahyhwh,
trós idak ngeraso muak samo wong-wong yang bangkét ngelawan Kau?
22 Aku mbenci dio wong, benci nian!
Dio wong jadi mósó-mósó aku.
23 Selédék'ila aku, ya Allah, jugo kenali ati aku;
ujila aku trós kenali kebingsalan aku.
24 Jingokla, kalu-kalu bae ado jalan aku yang jahat,
trós pémpénla aku di jalan Kau, yang la beabad-abad.