1 Pas waktu tu, beribu-ribu wong la bekómpól. Dio wong bedesek-desekan sampe saléng nginjek. Waktu tu, Yesus mulai ngajar, petamo-tamo ke móréd-móréd-Nyo. Uji-Nyo, “Jagola diri kamu dari ragi wong-wong Parisi, yang iola kemunapékan dio wong. 2 Soalnyo, slóró yang tesingit bakal ketauan, trós slóró yang diresioke bakal teungkep. 3 Ole karno tu, apo bae yang kamu omongke di tempat gelep bakal didenger di tempat terang, trós apo yang kamu bésék'i ke kópéng wong bakal dibritoke dari pócók atep ruma.

4 Ói kawan-kawan Aku, Aku enjók tau kamu, dak usa takót samo wong-wong yang pacak mbunu badan tapi abés tu dak pacak ngelakuke apo-apo lagi. 5 Aku bakal nónjókke ke kamu siapo yang pantes kamu takóti. Kamu harós takót samo Dio yang punyo hak óntók nguntalke kamu ke jeró nerako seabés badan kamu tebunu. Iyo, Diola yang harós kamu takóti!

6 Bukannyo bóróng pépét dijual limo ikok serego duo kepéng dóét logam? Tapi, sikok bae dak dilupoke Allah. 7 Sebenernyo, mala jumla rambót di palak kau bae teétóng. Jadi dak usa takót, karno kamu lebé berego daripado banyak bóróng pépét tu.

8 Aku enjók tau kamu, siapo bae yang ngakui amen dio melok Aku di adepan manusio, Anak Manusio jugo bakal ngakui wong tu di adepan malekat-malekat Allah. 9 Tapi, wong yang nyangkal Aku di adepan manusio, Aku bakal nyangkal dio^a di adepan malekat-malekat Allah. 10 Setiap wong yang ngucapke omongan yang ngelawan Anak Manusio bakal diampóni. Tapi, wong yang ngatoi Ro Suci dak bakal diampóni.

11 Amen kamu diseret ke ruma-ruma ibada wong Israel apo dak tu ke adepan pemémpén-pemémpén jugo penguaso-penguaso, dak usa kamu kuatér pasal cakmano kamu mbela diri, jugo apo yang harós kamu jawab. 12 Ro Suci bakal ngajari kamu pas waktu tu jugo, apo yang harós kamu omongke.”

13 Sala sikok dari antaro wong banyak tu ngomong ke Yesus cak ini, “Guru, kongkonla dólór aku tu mbagéke warésan dengen aku.”

14 Tapi uji Yesus, “Ói Lór, siapo yang ngangkat Aku jadi hakém apo pembagé warésan di antaro kamu?” 15 Laju Yesus ngomong ke dio wong, “Inget! Jagola diri kamu dari segalo macem keserakoan, soalnyo édóp wong dak begantóng samo hartonyo yang belebéan.”

16 Abés tu, Yesus ngomongke sikok peumpamoan ke dio wong. Uji-Nyo, “Ado sikok wong kayo. Dio punyo tana yang banyak ngasélke. 17 Di jeró atinyo dio bepékér cak ini, ‘Apo yang harós aku lakuke? Dak katek lagi tempat óntók aku ngómpólke slóró asél tana aku.’

18 Laju dio ngomong, ‘Inila yang bakal aku lakuke. Aku bakal mbongkar slóró lómbóng aku, trós mbangón lagi yang lebé besak. Di situ bakal aku simpen slóró gendóm samo barang-barang aku yang laén. 19 Aku bakal ngomong ke jiwo aku, “Ói jiwo aku, samo kau ado banyak harto, cókóp óntók betaón-taón lamonyo. Santaila, makanla, minumla, trós beseneng-senengla.”’

20 Tapi, uji Allah ke wong tu, ‘Ói wong lolo! Malem ni jugo, nyawo kau bakal ditóntót dari kau. Trós, yang la kau siapke tu bakal jadi punyo siapo?’

21 Cak itula jadinyo wong-wong yang ngómpólke harto di bumi óntók dirinyo dewek tapi idak kayo dalem pasal-pasal yang nyenengke Allah.”

22 Laju uji Yesus ke móréd-móréd-Nyo, “Karno tu Aku ngomong ke kamu, dak usa kuatér pasal édóp kau, apo yang bakal kamu makan. Cak itu jugo pasal badan kamu, apo yang bakal kamu pakek. 23 Soalnyo, édóp lebé penténg dari pajóan, trós badan lebé penténg dari baju. 24 Peratikela bóróng gagak yang dak nebar, dak manen, jugo dak katek lómbóng apo dak tu gudang, tapi dienjók makan samo Allah. Apolagi kamu yang lebé berego dari bóróng-bóróng. 25 Lagi pulok, siapo di antaro kamu yang karno kekuatérannyo pacak manjangke ómórnyo sejam bae. 26 Mangkonyo, amen pasal sekecik itu bae dak pacak kamu lakuke, ngapo kamu kuatér pasal-pasal yang laén?

27 Peratikela cakmano kembang liar tómbó. Dio idak besusa paya jugo idak nenun. Tapi, Aku enjók tau kamu, mala Rajo Suleiman, dengen slóró kekayoannyo, idak perna bedandan pecak sala sikok dari kembang-kembang tu. 28 Jadi, amen rómpót-rómpót di ladang yang ari ni tómbó trós besoknyo dibuang ke dalem wada perapian didandani ole Allah sampe cak itu nian, lebé lagi Dio bakal meratike kamu, ói kamu wong-wong yang kurang pecayo! 29 Jangan ngejer-ngejer apo yang bakal kamu makan samo apo yang bakal kamu minum, trós jangan kuatér. 30 Slórónyo tu dikejer ole bangso yang dak ngenal Allah. Aba kamu tau amen kamu merluke pasal-pasal tu. 31 Tapi, kejerla kerajaan-Nyo,^b mangko galo-galonyo tu bakal ditambake ke kamu.

32 Dak usa takót, ói kamu kómpólan domba kecik, karno Aba kamu seneng ngenjókke kerajaan tu samo kamu. 33 Jualla apo yang ado samo kamu, trós sedekakela tu ke wong-wong méskén. Békénla óntók kamu kelepe yang dak bakal rusak, iola harto di surgo yang dak bakal abés. Di situ maléng idak marak'i, trós rayap idak ngerusaknyo. 34 Karno di mano harto kamu ado, ati kamu jugo bakal di situ.”

35 Uji Yesus lagi, “Biarla pinggang kamu tetep teiket, trós pelito kamu tetep édóp.^c 36 Biarla kamu pecak wong-wong yang lagi nunggu tuannyo balék dari pesta kawénan, supayo amen dio dateng trós ngetok lawang, dio wong pacak langsóng mbukakke lawang óntók tuannyo tu. 37 Seneng atila kacóng-kacóng yang didapeti lagi bejago-jago pas tuannyo dateng. Nian-nian aku enjók tau kamu, tuannyo tu bakal besiap-siap trós mboleke kacóng-kacóngnyo tu dódók, trós tuannyo tu bakal ngelayani dio wong. 38 Seneng atila kacóng-kacóng yang didapeti lagi bejago-jago pas tuannyo dateng, mugola dio dateng pas tenga dalu apo dak tu pas sóbó. 39 Ingetla, amen tuan ruma pacak tau kapan maléng bakal dateng, dio pasti bakal bejago-jago trós dak bakal mbiarke rumanyo tu tebongkar. 40 Jadi, kamu jugo harós besiap-siap terós, karno Anak Manusio Yang Dari Surgo bakal dateng pas waktu yang dak kamu sangko.”

41 Uji Petrus, “Tuan, apo peumpamoan tu ditujuke ke kami bae, apo ke slóró wong laén jugo?”

42 Uji Tuan kito, “Siapola hamba yang stio jugo behikmah tu, yang ditónjók ole tuannyo óntók mbagéke pajóan ke babu-babunyo yang laén pas waktunyo? 43 Seneng atila hamba yang didapeti tuannyo lagi gaweke tugasnyo pas waktu tuannyo tu dateng. 44 Nian-nian aku enjók tau kamu, dio bakal pecayoke slóró harto kepunyoannyo ke hambanyo tu. 45 Tapi, amen hamba tu ngomong di jeró atinyo, ‘Tuan aku tu dak dateng-dateng,’ trós hamba tu mulai ngebók'i babu lanang betino laénnyo, trós makan jugo minum-minum sampe mabok, 46 mangko tuannyo tu bakal dateng tibo-tibo di ari yang dak disangko-sangko jugo pas jam yang hambanyo tu dak tau. Laju, tuannyo tu bakal mbinasoke dio trós jadike dio senaséb dengen wong-wong yang dak pecayo.

47 Hamba yang tau kendak tuannyo, tapi dak nyiapke diri trós idak ngelakuke kendak tuannyo tu bakal dihókóm berat. 48 Hamba yang dak tau kendak tuannyo, trós ngelakuke pasal-pasal yang pantes dihókóm, bakal dihókóm enteng. Setiap wong yang la dienjók banyak, dari dio bakal ditóntót banyak. Trós wong yang la dipecayoke banyak, dari dio bakal ditóntót lebé banyak lagi.”

49 Uji Yesus lagi, “Aku dateng óntók nguntalke api^d ke dunio, trós Aku ngarep nian amen api tu la édóp! 50 Tapi, ado pendritoan^e yang harós Aku jalani kagek, trós Aku ngeraso teteken sampe pasal tu ditepati. 51 Apo kamu nyangko amen Aku dateng ke dunio óntók gawak damai? Aku enjók tau kamu, idak! Melaénke pelawanan. 52 Soalnyo, mulai sekarang, bakal ado limo wong dalem sikok kluargo yang saléng ngelawan karno Aku: tigo ngelawan duo, trós duo ngelawan tigo. 53 Dio wong ni bakal saléng ngelawan: aba ngelawan anaknyo yang lanang, trós anak lanang bakal ngelawan abanyo. Emak ngelawan anaknyo yang betino, trós anak betino ngelawan emaknyo. Emak mertuo ngelawan mantu betinonyo, trós mantu betinonyo ngelawan emak mertuonyo.”

54 Uji Yesus ke wong banyak tu, “Amen kamu nyingok awan móncól dari barat, kamu pasti langsóng ngomong, ‘Ujan bakal tórón,’ trós itu memang tejadi nian. 55 Trós pas angin betiup dari selatan, kamu pasti ngomong, ‘Ari ni bakal panas bedengkang,’ trós itu jugo memang tejadi nian. 56 Ói kamu wong munapék! Kamu tau ngartike tando-tando bumi samo langét, tapi ngapo kamu dak tau ngartike tando-tando jaman ni?

57 Ngapo kamu dewek dak pacak mélé apo yang bener? 58 Soalnyo, amen kau samo mósó kau pegi ngadep penguaso, cobola óntók nyelesaike masala kau dengen dio pas lagi di pejalanan. Amen idak, mósó kau bakal nyeret kau ke hakém, trós hakém bakal nyerake kau ke pengawal trós dio bakal masókke kau ke jeró penjaro. 59 Aku enjók tau kau, kau dak bakal metu dari penjaro sampe kau ngelunasi slóró utang kau.”