15
Yesus ngajar pasal Allah seneng nerimo wong beduso yang betobat
Peumpamoan pasal wong yang berego di mato Allah
1 Banyak penagé pajak samo wong beduso dateng ke Yesus óntók ndengerke ajaran-Nyo. 2 Wong-wong Parisi samo ahli-ahli Kitab Suci ni berótók'an. Dio wong ngomong cak ini, “Yesus ni nerimo wong-wong beduso, trós makan samo dio wong.”
3 Laju, Yesus nyampeke sikok peumpamoan ke dio wong. Uji-Nyo, 4 “Seandainyo ado di antaro kamu yang punyo seratós domba, trós sikok di antaronyo ilang, apo wong tu dak bakal ninggalke 99 domba laénnyo di padang rómpót, trós begancang nyari sikok yang ilang tadi sampe dio nemukenyo? 5 Pas domba tu la ditemuke, dio bakal seneng nian trós ngangkat domba tu ke pócók bahunyo. 6 Pas la sampe di ruma, dio bakal manggél kawan-kawannyo jugo tetanggo-tetanggonyo trós ngomong cak ini, ‘Beseneng-senengla samo aku, soalnyo aku la nemuke domba aku yang ilang tu!’ 7 Cak itu jugo surgo bakal lebé seneng amen ado sikok wong beduso yang betobat dibandéngke amen ado 99 wong bener yang dak perlu petobatan.
8 Apo dak tu, betino mano yang punyo sepóló dóét perak,a pas dóét peraknyo tu ilang sikok, idak ngédópke pelito trós nyapu rumanyo, jugo nyari dóét perak tu dengen ati-ati sampe ditemukenyo? 9 Pas dóét tu ditemuke, dio bakal manggél kawan-kawannyo jugo tetanggo-tetanggonyo trós ngomong cak ini, ‘Beseneng-senengla samo aku, soalnyo aku la nemuke dóét aku yang ilang.’ 10 Aku enjók tau kamu, cak itu jugo ado kesenengan di adepan malekat-malekat Allah karno sikok wong beduso yang betobat.”
Peumpamoan pasal Allah seneng nerimo wong yang betobat
11 Uji Yesus lagi, “Ado sikok wong yang punyo duo anak lanang. 12 Anaknyo yang bungsu ni ngomong ke abanyo cak ini, ‘Aba, enjókkela samo aku harto bagéan aku.’ Jadi, abanyo ni mbagéke hartonyo samo keduo anaknyo tu.
13 Beberapo ari abés tu, anaknyo yang bungsu ni ngómpólke slóró kepunyoannyo trós pegi ke negri yang jaó. Di sano dio ngambórke hartonyo dengen édóp bepoya-poya. 14 Pas dóétnyo la abés, tejadi bencano kelaperan besak di slóró negri tu, sampe-sampe dio mulai melarat. 15 Jadi, dio pegi begawe dengen sala sikok wong di negri tu. Wong tu ngongkon dio masók ke ladangnyo óntók ngenjók pajóan ke babi-babinyo. 16 Dio péngén nian ngisi perótnyo dengen ampas kacang yang dimakan babi-babi tu, tapi dak katek sikok wong bae yang ngenjókkenyo ke dio.
17 Pas dio nyadari keadaannyo, dio ngomong cak ini, ‘Wong-wong upahan aba aku bae punyo pajóan yang belébé, sementaro aku di sini ni mati kelaperan! 18 Aku bakal berangkat trós balék ke aba aku. Aku jugo bakal ngomong ke dio cak ini, “Aba, aku la mbékén duso di adepan surgo jugo Aba. 19 Aku dak pantes lagi disebót anak kau. Terimola aku jadi sala sikok wong upahan kau.”’ 20 Ahérnyo, dio berangkat trós balék ke abanyo.
Pas dio masé jaó, abanyo ni la nyingok dio, laju tegerakla ati abanyo ni karno belas kesian. Dio belari nemui anaknyo tu, dipelóknyo, trós diciumnyo.
21 Anaknyo ni ngomong ke abanyo cak ini, ‘Aba, aku la mbékén duso di adepan surgo jugo Aba, aku dak pantes lagi disebót anak kau.’
22 Tapi, abanyo ngomong ke kacóng-kacóngnyo, ‘Gancangla! Ambékke baju yang paléng bagós, trós pakekkela ke dio. Pasangke céncén ke jarinyo jugo selop di sekelnyo. 23 Ambékla anak sapi yang gemuk trós sembeléla anak sapi tu. Payó kito makan jugo beseneng-seneng, 24 soalnyo anak aku dulu mati, tapi la édóp lagi. Dio dulu ilang, tapi la ditemuke.’ Laju, dio wong mulai beseneng-seneng.
25 Sementaro tu, anaknyo yang petamo ni lagi ado di kebon. Pas dio balék trós la di parak rumanyo, dio ni denger suaro musik jugo wong nari-nari. 26 Laju, dio manggél sikok kacóngnyo trós betanyo pasal apo yang lagi tejadi. 27 Uji kacóngnyo tu, ‘Adék Tuan la balék. Aba Tuan la nyembelé anak sapi yang gemuk, soalnyo adék Tuan balék ke ruma dengen selamet.’
28 Anaknyo yang petamo ni jadi mara nian trós dak galak masók ruma. Jadi, abanyo ni metu trós mbójók dio. 29 Tapi, uji anak ni ke abanyo, ‘Jingokla! Betaón-taón lamonyo aku ngelayani kau, trós dak perna aku ngelanggar prénto kau. Mugola pecak itu, kau dak perna ngenjók aku sikok anak kambéng bae supayo aku pacak beseneng-seneng dengen kawan-kawan aku. 30 Tapi sekarang, pas anak kau yang la ngabési harto kau dengen lónte-lónte tu balék, kau mala nyembelé anak sapi yang gemuk óntók dio!’