18
Yesus ngajarke óntók terós bedoa
1 Yesus nyampeke sikok peumpamoan ke pengékót-pengékót-Nyo óntók ngajar amen dio wong tu harós terós bedoa, trós jangan kecik ati. 2 Uji Yesus, “Di sikok kota ado sikok hakém yang idak takót samo Allah jugo idak ngagók'i siapo bae. 3 Di kota tu jugo ado sikok jando. Jando tu bekali-kali ngadep hakém tu trós ngomong cak ini, ‘Enjókla keadélan óntók aku dari mósó aku.’
4 Óntók waktu yang cókóp lamo dio nolak pintak'an jando tu. Tapi, ahérnyo hakém tu ngomong di jeró atinyo, ‘Aku dak takót samo Allah jugo dak ngagók'i siapo bae, 5 tapi karno jando ni terós-terósan nganggui aku, aku bakal ngenjók keadélan ke dio supayo dio idak nyaroke aku lagi dengen kedatengannyo yang terós-terósan ni.’ ”
6 Laju, uji Tuan kito tu, “Peratikela apo yang diomongke ole hakém yang dak bener tu! 7 Apo Allah bakal ngenjókke keadélan ke wong-wong péléan-Nyo yang bejerét ke Dio siang malem? Iyo nian! Apo Dio bakal ngólór-ngólór waktu óntók nolong dio wong? Idak! 8 Aku enjók tau ke kamu, Dio bakal langsóng ngenjókke keadélan ke dio wong. Tapi, pas Anak Manusio dateng, apo Dio bakal nemuke iman cak ini di bumi?”
Yesus ngajar pasal siapo yang diterimo Allah
Wong yang diterimo Allah iola wong yang ngerendake diri
9 Laju, Yesus nyampeke sikok peumpamoan lagi ke wong-wong yang yakén dirinyo bener trós nganggep renda wong laén. 10 Uji-Nyo, “Ado duo wong pegi ke Ruma Agóng Allah óntók bedoa. Sikoknyo wong Parisi, trós sikoknyo lagi penagé pajak.
11 Wong Parisi tu tegak trós bedoa cak ni di jeró atinyo, ‘Ya Allah, aku ngucap sókór samo Kau soalnyo aku ni idak pecak wong laén. Aku bukan maléng, bukan wong yang dak bener, bukan pejina, jugo bukan pecak tukang pajak tu. 12 Aku bepuaso duo kali seminggu. Aku jugo ngenjók samo Tuhan sepóló persen dari pengasélan aku.’
13 Tapi, tukang pajak tu tegak jaó-jaó trós idak berani nyungak ke langét. Sambél ngebók'i dadonyo yang iola tando penyeselan, dio ngomong cak ini, ‘Ya Allah, ampónila aku, wong yang beduso ni!’
14 Aku enjók tau kamu, tukang pajak tu balék ke rumanyo jadi wong yang dibenerke ole Allah, tapi wong Parisi tu idak. Soalnyo, siapo bae yang ninggike dirinyo, dio bakal direndake. Tapi, siapo bae yang ngerendake dirinyo, dio bakal ditinggike.”
Wong yang diterimo Allah iola wong yang nerimo kerajaan-Nyo pecak budak kecik
15 Abés tu, beberapo wong gawak anak-anaknyo yang masé kecika ke Yesus, dengen maksód supayo Yesus nyentu budak-budak tu. Na, pas móréd-móréd Yesus ni nyingok kejadian tu, dio wong negor wong-wong tu. 16 Tapi, Yesus manggél budak-budak kecik tu óntók dateng ke Dio. Uji-Nyo, “Biarkela budak-budak tu dateng ke Aku. Jangan ngalangi dio wong. Soalnyo, wong-wong cak itula yang punyo Kerajaan Allah. 17 Nian-nian aku enjók tau kau, siapo bae yang idak nerimo Kerajaan Allah pecak budak-budak kecik, dio pasti dak bakal masók ke jerónyo.”
Wong yang diterimo Allah iola wong yang cuman ngandalke Allah bae
18 Ado sikok pemémpén betanyo ke Yesus cak ini, “Ói Guru yang baék, apo yang pantes aku lakuke óntók ngewaréske édóp yang óntók selamo-lamonyo di ahérat?”
19 Uji Yesus, “Ngapo kau nyebót Aku baék? Dak katek sikok bae yang baék kecuali Allah.b 20 Kau tau prénto-prénto Allah: Jangan bejina, jangan mbunu, jangan maléng, jangan ngenjók kesaksian palsu, hormatila aba samo emak kau.”
21 Uji wong tu, “Slóró prénto tu la aku tóróti dari aku kecik.”
22 Pas Yesus ndenger pasal tu, Dio ngomong ke wong tu, “Masé ado sikok yang kurang dari kau. Jualla galo-galo yang kau punyo tu. Abés tu, bagékela asél penjualannyo samo wong méskén, mangko kau bakal punyo harto di surgo. Abés tu datengla, trós melokla Aku.”
23 Na, pas wong tu ndenger omongan-Nyo, wong tu jadi sedé nian karno dio ni wong yang kayo nian.
24 Yesus nyingok wong kayo tu trós ngomong cak ini, “Alangke saronyo wong kayo yang punyo banyak harto óntók masók ke jeró Kerajaan Allah! 25 Lebé muda sikok unto masók ngeliwati lobang jaróm daripado wong kayo masók ke jeró Kerajaan Allah.”
26 Wong-wong yang ndenger pasal tu ngomong cak ini, “Amen cak itu, siapo yang pacak diselametke?”
27 Uji Yesus, “Apo yang dak móngkén óntók manusio, móngkén óntók Allah.”
28 Uji Petrus, “Jingokla, kami la ninggalke galo-galo yang kami punyo trós la melok'i Kau.”
29 Uji Yesus lagi, “Nian-nian aku enjók tau kau, setiap wong yang ninggalke rumanyo, bininyo, dólórnyo, wong tuonyo, apo anak-anaknyo ole karno Kerajaan Allah, 30 dio bakal nerimonyo lagi belipet gando pas di dunio ni, trós pas di dunio yang bakal dateng, dio jugo bakal nerimo keédópan yang óntók selamo-lamonyo.”
Yesus nyelaske lagi amen Dio bakal mati jugo bangkét
31 Yesus manggél 12 móréd-Nyo, trós ngomong ke dio wong cak ini, “Jingokla, kito lagi nuju ke Yerusalem. Slóró yang ditólés ole nabi-nabi pasal Anak Manusio bakal tejadi. 32 Dio bakal diserake ke tangan wong-wong Romawi yang idak ngenal Allah. Dio bakal dihino, dianiayo, jugo diludai. 33 Wong-wong tu bakal nyiksoc Dio trós mbunu-Nyo. Tapi, pas ari ketigo Dio bakal bangkét lagi.”
34 Móréd-móréd-Nyo samo sekali idak ngerti pasal-pasal tu. Arti dari omongan Yesus ni tesingit óntók dio wong. Dio wong dak nangkep apo maksód dari omongan-Nyo tu.
Yesus nyembóke sikok wong buto
35 Pas Yesus ampér sampe di Kota Yeriko, ado sikok wong buto dódók di pénggér jalan sambél ngemis. 36 Pas wong buto tu ndenger wong banyak liwat, dio betanyo apo yang lagi tejadi. 37 Wong-wong ngenjók tau dio, “Yesus wong Najaret lagi liwat.”
38 Laju dio mekék, “Yesus, Anak Daód,d kesianila aku!”
39 Wong-wong yang bejalan di depannyo tu negor dio supayo dio diem. Tapi, dio ni mala mekék lebé besak. Ujinyo, “Ya Anak Daód! Kesianila aku!”
40 Laju, Yesus brenti trós ngongkon supayo wong buto tu digawak ke Dio. Pas wong buto tu la parak, Yesus betanyo ke dio cak ini, 41 “Kau péngén Aku ngelakuke apo óntók kau?”
Ujinyo, “Ya Tuan, biarla aku pacak nyingok!”
42 Uji Yesus ke dio, “Nyingokla! Iman kau la nyembókee kau.”
43 Ahérnyo, pas itu jugo dio pacak nyingok, trós dio melok Yesus sambél mulyoke Allah. Wong banyak yang jingok kejadian tu muji-muji Allah jugo.