21
1 Yesus nyingok'i wong-wong kayo lagi masók'i pesembahan dio wong ke jeró kotak-kotak dóét pesembahan. 2 Dio jugo nyingok sikok jando méskén masók'i dóét logam kecik duo ikok ke jeró kotak tu. 3 Laju, Yesus ngomong cak ini, “Nian-nian Aku enjók tau kamu, jando méskén ni ngenjók lebé banyak daripado slóró wong kayo tu. 4 Soalnyo, galo-galo wong tu ngenjókke pesembahan dari kelebéannyo, tapi jando tu ngenjókke pesembahan dari kekurangannyo, iola galo-galo yang dio punyo, yang dio perluke óntók édópnyo.”
Yesus nyelaske pasal apo yang bakal tejadi di masa depan
Yesus ngajar amen Ruma Agóng Allah bakal diróbóke
5 Abés tu, beberapo wong ngomongi pasal Ruma Agóng Allah yang didandani makek batu-batu yang bagós jugo makek barang-barang pesembahan laénnyo. Trós, Yesus ngomong cak ini, 6 “Kan kamu jingok galo-galo tu? Kagek bakal tibo waktunyo di mano dak katek sikok batu bae yang tetinggal di pócók batu laénnyo. Galo-galonyo tu bakal diróbóke.”
Yesus ngajar pasal penganiayoan jugo tando yang bakal tejadi sebelóm ari kiamat
7 Laju, pengékót-pengékót Yesus ni betanyo ke Dio, “Ói Guru, kapan pasal tu bakal tejadi? Trós apo tandonyo amen pasal tu denget lagi tejadi?”
8 Uji Yesus, “Ati-atila. Jangan sampe kamu disesatke wong. Soalnyo, banyak wong yang kagek dateng makek namo Aku trós ngomong cak ini, ‘Akula Dio,’ trós ‘Waktu kiamat la parak.’ Jangan melok'i wong-wong tu. 9 Amen kamu ndenger brito-brito pasal peperangan jugo kerébótan, jangan kamu ketakótan. Soalnyo, galo-galo tu harós tejadi dóken, tapi itu dak bearti la nak kiamat.”
10 Trós, uji Yesus lagi, “Bangso bakal bangkét ngelawan bangso laénnyo, trós kerajaan bakal ngelawan kerajaan laénnyo. 11 Selaén itu, bakal tejadi jugo banyak gempa bumi yang besak, kelaperan di mano-mano, waba penyakét, pekaro-pekaro yang nakótke, jugo tando-tando ajaéb yang hebat di langét.
12 Tapi, sebelóm galo-galonyo tu tejadi, kamu bakal ditangkep trós dianiayo. Kamu bakal diserake ke ruma-ruma ibada wong Israel trós dimasókke ke jeró penjaro. Kamu bakal digéréng ke adepan rajo-rajo, jugo penguaso-penguaso karno namo Aku. 13 Itula kesempetan kamu óntók ngenjók kesaksian. 14 Ole karno tu, mantepkela ati kamu óntók idak nyiapke dóken omongan óntók mbela diri, 15 karno Aku dewek yang bakal ngenjókke kamu kepacak'an óntók ngomong jugo ngenjókke hikmah yang dak pacak dilawan apo dibanta ole slóró wong yang mósói kamu.
16 Kamu bakal dihianati ole wong tuo kamu, dólór-dólór kamu, sanak kluargo kamu, jugo kawan-kawan kamu, trós ado di antaro kamu yang bakal dio wong bunu. 17 Kamu bakal dibenci ole slóró wong karno namo Aku. 18 Mugola cak itu, sehelai rambót bae dari palak kamu dak bakal ado yang ilang. 19 Dengen tetep betahan, kamu bakal ndapetke édóp kamu.”
Yesus ngewahyuke amen Yerusalem bakal ancór
20 “Amen kamu nyingok Yerusalem dikepóng ole kemah-kemah tentra, kamu bakal tau amen keancórannyo la parak. 21 Pas waktu tu, wong-wong yang ado di daera Yudea harós ngelarike diri ke pegónóngan. Wong-wong yang ado di jeró kota harós metu dari situ, trós wong-wong yang ado di luar kota dak usa masók lagi. 22 Soalnyo, ari-ari ni iola ari penghókóman óntók nepati slóró pasal yang la tetólés.
23 Celakola betino-betino yang lagi bónténg jugo yang netek'i anak pas ari-ari tu! Soalnyo, kesaroan besak bakal nimpo negri ni, trós kemarahan Allah ado samo pendódóknyo. 24 Bakal ado wong-wong yang dibunu makek pedang, trós bakal ado wong-wong yang digéréng jadi tahanan ke slóró bangso. Kota Yerusalem bakal diinjek-injek ole bangso-bangso yang bukan Israel sampe waktu kejayoan bangso-bangso tu abés.”
Yesus ngajar lagi pasal kedatengan-Nyo yang keduo
25 Uji Yesus lagi, “Bakal tejadi tando-tando di matoari, bulan, jugo bintang-bintang. Di bumi, bangso-bangso bakal ketakótan jugo kebingungan karno laót jugo ombak begolak. 26 Wong-wong bakal pingsan karno ketakótan jugo karno pekiroan pasal apo bae yang bakal nimpo bumi ni. Soalnyo, slóró kuaso di langét bakal digoncangke. 27 Waktu tu, dio wong bakal nyingok Anak Manusio dateng dalem awana dengen kuaso jugo kemulyoan yang besak. 28 Amen pasal-pasal tu mulai tejadi, tegakla trós angkatla palak kamu karno dak lamo lagi kamu bakal dibebaske.”
29 Laju, Yesus nyampeke peumpamoan ni ke dio wong, “Pasatila batang ara jugo batang-batang laénnyo. 30 Amen kamu nyingok batang-batang tu mulai betunas, kan kamu la tau dewek amen mósém kemaró la parak. 31 Cak itu jugo dengen kamu, amen kamu nyingok slóró pasal-pasal tadi tejadi, kamu tau amen Kerajaan Allah la parak.
32 Nian-nian Aku enjók tau kamu, galo-galonyo tu bakal tejadi sebelóm angkatan ni ilang. 33 Langét samo bumi bakal ilang, tapi omongan Aku dak bakal ilang.”
Yesus ngajar lagi amen kito harós tetep bejago-jago
34 Uji Yesus lagi, “Jagola diri kamu! Jangan sampe ati kamu tebebani ole pesta besak-besak'an, ole mabok-mabok'an, jugo ole kekuatéran pasal keédópan seari-ari. Trós, dak disangko-sangko ari tu dateng nimpo kamu pecak perangkep. 35 Soalnyo, ari tu bakal nimpo galo-galo wong yang tinggal di bumi ni. 36 Bejago-jagola jugo bedoala terós, supayo kamu pacak lepas dari galo-galo yang bakal tejadi tu, trós kamu pacak tegak di adepan Anak Manusio.”