2 Na, besoknyo, pas ari masé pagi nian, Yesus dateng lagi ke Ruma Agóng Allah trós galo-galo wong dateng ke Dio. Yesus dódók óntók ngajar wong-wong tu. 3 Ahli-ahli Kitab Suci samo wong-wong Parisi gawak sikok betino yang ketangkep basa bejina. Dio wong narék betino tu ke tenga-tenga, 4 trós ngomong ke Yesus cak ini, “Guru, betino ni ketangkep basa lagi bejina. 5 Dalem Hókóm Taurat, Musa mréntoke kito óntók mbabeti betino yang pecak itu makek batu.^a Cakmano nórót Kau?” 6 Dio wong ngomong cak itu óntók nyoboi Yesus supayo pacak nódó-Nyo.

Tapi, Yesus mbóngkókke badan-Nyo trós nólés di tana makek jari-Nyo. 7 Karno dio wong masé terós-terósan betanyo samo Yesus, mangkonyo Dio nyungak trós ngomong ke wong-wong tu cak ini, “Siapo bae di antaro kamu yang belóm perna mbékén duso, biarla dio yang duluan mbabeti betino ni makek batu.” 8 Abés tu, Yesus mbóngkókke badan-Nyo lagi trós nólés di tana.

9 Na, pas ndenger apo yang diomongke Yesus tu, dio wong pegi sikok-sikok, mulai dari yang paléng tuo, sampe ahérnyo Yesus ditinggalke dewek'an samo betino yang masé ado di situ. 10 Laju, Yesus nyungak lagi trós ngomong ke dio cak ini, “Ói Buk, di mano wong-wong tu?^b Dak katek yang ngókóm kau, kan?”

11 Uji betino tu, “Dak katek, Tuan.”

Abés tu, Yesus ngomong, “Aku jugo idak ngókóm kau. Pegila. Mulai sekarang, jangan békén duso lagi.”]

12 Yesus ngomong lagi ke dio wong cak ini,^c “Akula terang dunio.^d Wong yang melok Aku dak bakal bejalan dalem kegelepan, tapi bakal punyo terang keédópan.”

13 Jadi, wong-wong Parisi ngomong ke Yesus cak ini, “Kau tu besaksi pasal diri Kau dewek, jadi kesaksian Kau tu dak pacak diterimo!”

14 Yesus nyawab cak ini, “Mugola Aku besaksi pasal diri Aku dewek, kesaksian Aku tu bener karno Aku tau dari mano Aku dateng trós ke mano Aku pegi. Tapi, kamu tu idak tau dari mano Aku dateng jugo ke mano Aku pegi. 15 Kamu ngakémi nórót ókóran manusio. Aku idak ngakémi siapo-siapo. 16 Tapi, amen Aku ngakémi, pengakéman Aku tu bener karno Aku idak ngelakukenyo dewek'an, tapi besamo Aba yang ngótós Aku. 17 Di dalem Hókóm Taurat, yang iola hókóm kamu dewek, la tetólés amen kesaksian duo wong pacak diterimo.^e 18 Akula yang besaksi pasal diri Aku dewek, trós Aba yang ngótós Aku jugo besaksi pasal Aku.”

19 Mangkonyo tu wong-wong Parisi betanyo samo Yesus cak ini, “Di mano aba Kau tu?”

Uji Yesus, “Kamu idak ngenal Aku apolagi Aba Aku. Amen kamu ngenal Aku, seharósnyo kamu ngenal Aba Aku jugo.” 20 Kato-kato ni diomongke Yesus di parak kotak-kotak dóét pesembahan pas Dio lagi ngajar di halaman Ruma Agóng Allah. Tapi, dak katek siapo bae yang nangkep Yesus karno waktu-Nyo belóm tibo.

21 Yesus ngomong lagi ke wong-wong tu cak ini, “Aku bakal pegi, trós kamu bakal nyari Aku, tapi kamu bakal mati dalem duso kamu. Ke mano Aku pegi, kamu dak pacak ndatenginyo.”

22 Jadi, pemémpén-pemémpén Israel tu saléng ngomong cak ini, “Apo Dio nak bunu diri? Soalnyo, Dio ngomong, ‘Ke mano Aku pegi, kamu dak pacak ndatenginyo.’”

23 Uji Yesus ke dio wong, “Kamu tu asalnyo dari bawa, Aku dari pócók. Kamu tu asalnyo dari dunio ni, Aku idak dari dunio ni. 24 Mangkonyo, Aku ngomong samo kamu amen kamu bakal mati dalem duso-duso kamu. Iyo, kalu kamu idak pecayo amen Akula Dio yang kamu tunggu-tunggu tu,^f kamu bakal mati dalem duso-duso kamu.”

25 Jadi, dio wong ngomong ke Yesus, “Kau tu siapo?”

Uji Yesus ke dio wong, “Pecak yang la Aku omongke dari petamo. 26 Masé banyak yang nak Aku omongke jugo hakémi pasal kamu. Tapi, Aba yang ngótós Aku tu bener trós pasal-pasal yang Aku denger dari Aba, itula yang Aku omongke samo dunio.”

27 Dio wong ni dak ngerti amen apo yang Yesus omongke samo dio wong tu iola pasal Aba-Nyo. 28 Laju, Yesus ngomong ke dio wong cak ini, “Pas kamu la ninggike Anak Manusio,^g baru kamu tau amen Akula Dio. Kamu jugo bakal tau amen dak katek apo bae yang Aku lakuke tu dari kendak Aku dewek. Pecak yang diajarke Aba samo Aku, pecak itu jugo ajaran-ajaran tu Aku omongke samo kamu. 29 Dio yang ngótós Aku ado besamo Aku. Dio idak ninggalke Aku dewek'an karno Aku terós-terósan ngelakuke pasal-pasal yang nyenengke Dio.”

30 Sementaro Yesus ngomong pecak itu, banyak wong pecayo samo Dio.

31 Laju, Yesus ngomong ke wong-wong Israel yang la pecayo samo Dio tu cak ini, “Amen kamu tetep nórót omongan Aku, kamu móréd Aku nian. 32 Kamu bakal tau kebeneran pasal Allah, trós kebeneran tu bakal mbebaske kamu.”

33 Uji dio wong ke Yesus, “Kami ni ketórónan Ibrahém^h. Kami dak perna dijadike budak ole siapo bae! Ngapo Kau pacak ngomong, ‘Kamu bakal dibebaske’?”

34 Uji Yesus ke dio wong, “Aku enjók tau kamu nian, tiap wong yang ngelakuke duso, dio tu jadi budak duso. 35 Bukan budak belian yang bakal tinggal dalem kluargo tuannyo óntók selamonyo, tapi anak dari tuan tu yang bakal tinggal dalem kluargo óntók selamonyo. 36 Jadi, amen Anak mbebaske kamu, kamu bakal nian-nian bebas. 37 Aku tau amen kamu tu ketórónan Ibrahém, tapi kamu nak nyobo mbunu Aku karno omongan Aku katek tempat di jeró ati kamu. 38 Yang Aku omongi ni iola apo yang la Aku jingok dari Aba, trós kamu jugo ngelakuke apo yang kamu denger dari aba kamu.”

39 Dio wong nyawab cak ini, “Aba kami iola Ibrahém!”

Uji Yesus, “Amen kamu tu memang anak-anaknyo Ibrahém, pastila kamu ngelakuke apo yang dilakuke Ibrahém. 40 Tapi, sekarang kamu nak nyobo mbunu Aku, padahal Aku la ngomong kebeneran samo kamu, kebeneran yang Aku denger dari Allah dewek. Ibrahém idak bebuat pecak itu. 41 Kamu ngelakuke gawean yang dilakuke aba kamu dewek.”

Uji dio wong ke Yesus, “Kami ni anak sah!^@ Kami cuman punyo sikok Aba yang iola Allah.”

42 Uji Yesus ke dio wong, “Amen Allah tu iola Aba kamu, kamu bakal ngaséhi Aku, karno Aku dateng dari Allah trós Aku la ado di sini. Aku dateng bukan karno kendak Aku dewek, tapi Diola yang ngótós Aku. 43 Ngapo kamu masé dak ngerti samo apo yang Aku omongke ni? Kamu tu dak ngerti karno kamu dak pacak ndenger omongan Aku. 44 Kamu beasal dari aba kamu yang iola Éblés, trós kamu nak ngelakuke apo yang dikendak'i aba kamu tu. Éblés tu pembunu manusio dari awalnyo, trós idak édóp dalem kebeneran karno katek kebeneran dalem dirinyo. Pas dio ngotak'i, dio ngomong sesuai dengen sipatnyo karno dio tu memang tukang ngotak'i jugo aba dari segalo kebohongan. 45 Tapi, karno Aku ngenjóktauke kebeneran, kamu idak pecayo samo Aku. 46 Siapo di antaro kamu yang pacak mbuktike kalu Aku beduso? Amen Aku ngenjók tau kebeneran, ngapo kamu idak pecayo samo Aku? 47 Wong yang beasal dari Allah, dio ndengerke kato-kato Allah. Tapi, kamu idak ndengerkenyo karno kamu idak beasal dari Allah.”

48 Wong-wong Israel tu nyawab ke Yesus cak ini, “Bener kan apo yang kami omongke tu amen Kau ni wong Samaria yang kemasók'an setan?”

49 Uji Yesus, “Aku idak kemasók'an setan, mala Aku ngormati Aba Aku, tapi kamu idak ngormati Aku. 50 Aku idak nyari kemulyoan óntók diri Aku dewek. Tapi, Allah nyari kemulyoan óntók Aku, trós Diola hakémnyo.ⁱ 51 Aku enjók tau kamu nian, amen wong nóróti omongan Aku, dio dak bakal perna ngalami kematian óntók selamo-lamonyo.”

52 Jadi, wong-wong Israel ngomong samo Yesus cak ini, “Sekarang kami tau amen Kau ni memang kemasók'an setan. Ibrahém jugo nabi-nabi la mati, tapi Kau ngomong, ‘Amen wong nóróti omongan Aku, dio dak bakal perna ngerasoke kematian óntók selamo-lamonyo.’ 53 Apo Kau tu lebé besak dari aba kami Ibrahém yang la mati? Nabi-nabi jugo la mati. Jadi, nórót Kau, siapo nian Kau ni?”

54 Uji Yesus ke dio wong, “Amen Aku mulyoke diri Aku dewek, kemulyoan Aku tu katek artinyo. Aba Aku yang kamu akui, ‘Dio tu Tuhan kami,’ Dio tula yang mulyoke Aku. 55 Kamu idak ngenal Dio, tapi Aku ngenal Dio. Sekironyo Aku ngomong amen Aku idak ngenal Dio, bearti Aku bakal jadi tukang ngotak'i pecak kamu. Tapi, sebenernyo Aku ngenal Dio, trós Aku nóróti omongan-Nyo. 56 Aba kamu Ibrahém seneng nian nyingok ari Aku.^j Dio la nyingoknyo trós dio seneng.”

57 Laju, wong-wong Israel ngomong samo Yesus cak ini, “Kau bae belóm 50 taón, memangnyo Kau la perna nyingok Ibrahém?”

58 Uji Yesus ke dio wong, “Aku enjók tau kamu nian, sebelóm Ibrahém laér, Aku la ado.” 59 Ahérnyo, dio wong ngambék batu óntók mbabeti Yesus, tapi Yesus singitan trós ninggalke halaman Ruma Agóng Allah tu.