9
Tando keenem: Yesus nyembóke wong yang buto dari laér
1 Na, pas Yesus lagi liwat, Dio nyingok ado sikok lanang yang buto dari laér. 2 Móréd-móréd-Nyo betanyo samo Dio cak ini, “Guru, siapola yang beduso sampe-sampe dio ni laér buto? Lanang ni apo wong tuonyo?”
3 Uji Yesus, “Bukan lanang ni jugo bukan wong tuonyo yang beduso, tapi dio laér buto supayo gawean Allah dinyatoke liwat dio. 4 Selamo ari masé siang, kito harós gaweke gawean Dio yang ngótós Akua karno malem bakal dateng trós dak katek sikok wong bae yang pacak begawe. 5 Selamo Aku ado di dunio ni, Akula terang dunio.”b
6 Na, seabés Yesus ngomong cak itu, Dio ngeluda ke tana, trós mbékén lómpór dengen luda. Abés tu, ngoleske lómpór tu ke mato wong buto tadi. 7 Yesus ngomong ke dio cak ini, “Pegila, basóla mato kau di Kambang Siloam.” (Siloam artinyo ‘yang diótós’.) Jadi, wong tu pegi mbasó matonyo. Pas balék, dio la pacak nyingok.
8 Tetanggo-tetanggonyo jugo wong-wong yang sebelómnyo perna nyingok amen dio ni pengemis mulai ngomong cak ini, “Bukannyo dio ni yang biaso dódók sambél ngemis?” 9 Beberapo wong ngomong cak ini, “Yo, dio nila.”
Tapi, ado yang laén ngomong, “Bukan ói! Dio ni cuman mérép bae pecak wong tu.”
Uji lanang tu, “Akula dio.”
10 Jadi, wong-wong tu ngomong ke dio cak ini, “Cakmano mato kau pacak nyingok?”
11 Uji lanang tu, “Wong yang dipanggél Yesus tu mbékén lómpór, trós ngoleskenyo ke mato aku, abés tu Dio ngomong, ‘Pegila ke Kambang Siloam trós basóla mato kau.’ Jadi, seabés aku pegi trós mbasó mato, aku pacak nyingok.”
12 Uji wong-wong ke lanang tu, “Di mano Dio?”
Ujinyo, “Aku dak tau.”
13 Ahérnyo, dio wong gawak lanang yang tadinyo buto tu ke wong-wong Parisi.
14 Soalnyo, ari di mano pas Yesus mbékén lómpór trós melekke mato wong butoc tu iola ari Sabat.
15 Wong-wong Parisi tu jugo betanyo ke dio cakmano dio pacak nyingok. Uji lanang tu ke wong-wong Parisi, “Dio narokke lómpór ke mato aku, abés tu aku mbasó mato aku, trós sekarang aku pacak nyingok.”
16 Beberapo wong Parisi tu ngomong cak ini, “Wong itu tu dak dateng dari Allah karno Dio idak nóróti peratóran ari Sabat.”
Tapi, ado wong yang laénnyo ngomong, “Apo móngkén wong beduso pacak mbékén tando-tando ajaéb pecak itu?” Abés tu, tejadila peseléséan di antaro dio wong.
17 Jadi, dio wong betanyo lagi samo lanang yang tadinyo buto tu cak ini, “Apo pendapet kau pasal Dio, soalnyo Dio la mbékén mato kau pacak nyingok?”
Ujinyo, “Dio tu nabi.”
18 Tapi, pemémpén-pemémpén Israel masé bae idak pecayo amen wong tu memang buto trós la pacak nyingok. Jadi, dio wong manggél wong tuo lanang yang baru pacak nyingok tu. 19 Laju, betanyola dio wong tu ke wong tuo lanang yang tadinyo buto tu cak ini, “Apo dio nila anak lanang kamu yang kamu omongke buto dari laér tu? Jadi, cakmano nian dio pacak nyingok sekarang?”
20 Nyimbatla wong tuonyo cak ini, “Kami tau dio ni anak lanang kami. Memang nian dio ni buto dari laér. 21 Tapi, cakmano sekarang dio pacak nyingok, kami idak tau. Siapo yang melekke matonyo, kami jugo idak tau. Tanyo dio dewek bae, dio la besak. Dio pacak nyelaske pasal dirinyo dewek.” 22 Wong tuonyo tu ngomong pecak itu karno dio wong takót samo pemémpén-pemémpén Israel. Soalnyo, wong-wong tu la sepakat amen ado wong yang ngakui Yesus tu Almasi, Wong Yang Dilanték, dio bakal dikócélke dari ruma ibada. 23 Mangkonyo, wong tuonyo tu ado ngomong cak ini, “Dio la besak. Tanyo dio dewek bae.”
24 Ahérnyo, pemémpén-pemémpén Israel manggél wong yang tadinyo buto tu óntók keduo kalinyo, trós ngomong ke dio cak ini, “Enjókla kemulyoan óntók Allah dengen ngomongke yang sebenernyo! Kami tau amen wong tu wong beduso.”
25 Uji lanang tu, “Dio tu wong beduso apo idak, aku dak tau. Yang aku tau, dulunyo aku buto, sekarang aku pacak nyingok.”
26 Jadi, pemémpén-pemémpén Israel ngomong ke dio cak ini, “Apo yang dilakuke-Nyo samo kau? Cakmano caronyo Dio melekke mato kau?”
27 Lanang tu nyimbati dio wong cak ini, “Kan la aku enjók tau, tapi kamu idak ndenger. Ngapo kamu nak ndengernyo lagi? Apo kamu nak jadi móréd-Nyo jugo?”
28 Dio wong ngino lanang tu trós ngomong cak ini, “Kau tu móréd Wong tu, tapi kami ni móréd-mórédnyo Musa. 29 Kami tau amen Allah la ngomong samo Musa. Tapi, amen Wong ni kami idak tau dari mano Dio beasal.”
30 Laju, nyimbatla lanang tu ke dio wong cak ini, “Ane nian amen kamu idak tau dari mano Dio beasal, padahal Dio la melekke mato aku. 31 Kito tau amen Allah idak ndengerke wong-wong beduso. Tapi, amen ado wong yang takót samo Allah trós ngelakuke kendak-Nyo, Allah bakal ndengerke wong yang cak itu. 32 Dari jaman bingen sampe mak ini ari, idak perna tedenger ado wong yang pacak melekke mato wong yang buto dari laér. 33 Amen Wong ni idak dateng dari Allah, Dio dak pacak ngelakuke apo-apo.”
34 Laju, nyimbatla pemémpén-pemémpén Israel ke lanang tu cak ini, “Kau ni dari laér la penu dengen duso, kau nak ngajari kami pulok?” Ahérnyo, dio wong ngósérd lanang tu metu.
Yesus nyelaske pasal buto rohani
35 Na, pas Yesus ndenger amen pemémpén-pemémpén Israel la ngósér lanang tu metu, Yesus nemui dio, trós ngomong cak ini, “Apo kau pecayo samo Anak Manusio?”
36 Lanang tu nyawab cak ini, “Siapo Dio tu, Tuan, supayo aku pecayo samo Dio?”
37 Uji Yesus ke dio, “Kau la nyingok Dio trós Dio tula yang lagi ngomong samo kau.”
38 Uji lanang tu, “Aku pecayo, Tuan.” Trós dio sójód nyemba Yesus.
39 Uji Yesus,* “Aku dateng ke dalem dunio óntók ngakémi supayo wong yang buto pacak nyingok,e trós wong yang pacak nyingok jadi buto.”
40 Beberapo wong Parisi yang lagi besamo Yesus ndenger omongan tu, trós ngomong ke Yesus cak ini, “Memangnyo kami ni buto?”
41 Uji Yesus ke dio wong, “Amen kamu buto, kamu dak beduso, tapi sekarang karno kamu ngomong amen kamu pacak nyingok, jadi duso kamu tu tetep ado.”