1 Na, ado sikok lanang yang lagi sakét, namonyo Lajarus. Dio ni dari Betania, dósónnyo Mariam jugo Marta dólórnyo.^a 2 Mariam nila yang kageknyo minyak'i sekel Tuan kito dengen minyak wangi trós ngelap sekel-Nyo tu sampe keréng makek rambótnyo.^b Dio ni dólórnyo Lajarus yang sakét tu.

3 Jadi, dólór-dólór betino Lajarus ni ngérém pesen ke Yesus cak ni, “Tuan, wong yang Kau kaséhi tu lagi sakét.”

4 Pas Yesus denger pasal tu, Dio ngomong cak ini, “Penyakét tu dak bakal nyebabke kematian. Tapi, penyakét tu óntók nyatoke kemulyoan Allah supayo Anak-Nyo Allah dimulyoke liwat penyakét tu.” 5 Yesus ngaséhi Marta samo dólór betinonyo, jugo Lajarus. 6 Jadi, pas Yesus ndenger amen Lajarus tu lagi sakét, Yesus tinggal duo ari lagi di tempat di mano Dio berado tu. 7 Abés tu, Yesus ngomong samo móréd-móréd-Nyo cak ini, “Payó kito balék lagi ke Yudea.”

8 Móréd-móréd-Nyo ngomong ke Yesus cak ini, “Guru, belóm lamo ni wong-wong Israel di Propinsi Yudea nak mbabeti Kau,^c tapi Kau masé nak balék lagi ke sano?”

9 Uji Yesus, “Bukannyo siang ari tu ado 12 jam? Amen wong bejalan pas siang ari, dio dak bakal tesandóng karno dio nyingok terang dunio. 10 Tapi, amen wong bejalan pas malem ari, dio bakal tesandóng karno terang tu katek dalem dio.”^d

11 Seabés Yesus ngomong cak itu, Dio ngomong ke móréd-móréd-Nyo cak ini, “Kawan kito, Lajarus lagi tédók, tapi Aku nak pegi óntók mbangónkenyo.”

12 Laju, móréd-móréd-Nyo ngomong ke Yesus cak ini, “Tuan, kalu dio tédók, dio bakal sembó.” 13 Sebenernyo yang Yesus omongi tu pasal kematiannyo Lajarus, tapi móréd-móréd-Nyo ni nyangko amen Yesus ngomong pasal tédók dalem arti istirahat.

14 Ahérnyo, Yesus ngomong dengen jelas ke dio wong cak ini, “Lajarus la mati. 15 Tapi, karno kamu, Aku seneng amen Aku idak ado di sano waktu tu, supayo kamu pacak pecayo. Payó kito pegi nemui dio.”

16 Laju, Tomas yang dipanggél Didimus^@ ngomong ke móréd-móréd yang laén cak ini, “Payó kito pegi jugo, supayo kito mati besamo Yesus di sano.”

17 Pas Yesus sampe, Dio jadi tau amen Lajarus la empat ari di jeró kóbór. 18 Dósón Betania ni parak dengen Kota Yerusalem, kiro-kiro 3 kilometer.^* 19 Banyak wong Israel yang tinggal di Propinsi Yudea la dateng óntók ngébór Marta jugo Mariam pasal dólór dio wong. 20 Na, pas Marta ndenger amen Yesus dateng, dio metu nak nemui Yesus, tapi Mariam masé bae dódók di jeró ruma.

21 Laju, Marta ngomong samo Yesus cak ini, “Tuan, kalu Kau ado di sini, dólór aku dak bakal mati. 22 Tapi, sekarang aku jugo tau amen apo bae yang Kau mintak samo Allah, Allah bakal ngenjókkenyo samo Kau.”

23 Uji Yesus ke dio cak ini, “Dólór kau bakal bangkét lagi.”

24 Uji Marta ke Yesus cak ini, “Aku tau dio bakal bangkét lagi pas kebangkétan di ari terahér.”

25 Uji Yesus, “Akula kebangkétan jugo keédópan. Wong yang pecayo samo Aku bakal édóp mugola dio la mati, 26 trós wong yang édóp jugo pecayo samo Aku dak bakal mati selamo-lamonyo. Apo kau pecayo pasal ni?”

27 Marta ngomong samo Yesus cak ini, “Iyo, Tuan, aku pecayo nian amen Kau tu Almasi, Anak-Nyo Allah yang dateng ke dunio.”

28 Seabés Marta ngomong cak itu, dio pegi manggél Mariam, dólór betinonyo, dengen bebésék cak ini, “Guru ado di sini. Dio manggél kau.”

29 Pas Mariam ndenger pasal tu, dio begancang tegak trós pegi nemui Yesus. 30 Waktu tu Yesus belóm sampe masók ke dósón, tapi masé di tempat di mano Marta dateng nemui Dio. 31 Laju, wong-wong Israel tu, yang lagi besamo Mariam di jeró rumanyo yang jugo lagi ngébór dio, nyingok amen Mariam ni tegak trós begancang metu. Jadi, wong-wong tu melok'i Mariam karno bepékér amen dio ni pegi ke kóbóran óntók nangis di sano.

32 Pas Mariam sampe ke tempat di mano Yesus ado trós nyingok Yesus, besójódla dio di sekel-Nyo trós ngomong ke Yesus cak ini, “Tuan, kalu Kau ado di sini waktu tu, ceto dólór aku dak mati.”

33 Na, pas Yesus nyingok Mariam nangis trós wong-wong Israel yang dateng besamo Mariam melok nangis jugo, tegerakla ati Yesus trós Dio teharu. 34 Dio ngomong cak ini, “Di mano kamu tarok mayatnyo?”

Uji dio wong ke Yesus, “Payó Tuan, melokla trós jingokla dewek.”

35 Nangisla Yesus. 36 Jadi, wong-wong Israel tu ngomong cak ini, “Jingokla, alangke sayangnyo Dio samo Lajarus!”

37 Tapi, beberapo dari dio wong ngomong cak ini, “Bukannyo Dio ni yang la melekke mato wong buto tu, seharósnyo Dio jugo pacak mbékén supayo Lajarus ni idak mati kan?”^e

38 Sekali lagi Yesus teharu, trós pegi ke kóbóran tu. Kóbóran tu iola goa yang lawang masóknyo ditótóp dengen batu besak. 39 Uji Yesus, “Séngkérke batu tu!”

Marta, dólór betino dari yang la mati tu, ngomong ke Yesus cak ini, “Tuan, dio la mbusuk, soalnyo dio la dikóbór 4 ari.”

40 Uji Yesus ke dio, “Bukannyo la Aku omongi samo kau amen kau bakal nyingok kemulyoan Allah kalu kau pecayo?”

41 Jadi, dio wong geserke batu tu. Abés tu, Yesus nyungak trós ngomong cak ini, “Aba, Aku besókór karno Kau la ndenger Aku. 42 Aku dewek la tau amen Kau tu terós-terósan ndengerke Aku. Tapi, Aku ngomongke pasal ni karno wong banyak yang tegak di sekitar sini, supayo dio wong pecayo amen Kaula yang ngótós Aku.”

43 Seabés ngomong cak itu, Yesus mekék dengen suaro besak cak ini, “Lajarus, metula!” 44 Laju, Lajarus yang la mati tu metu. Sekel samo tangannyo masé teiket dengen kaén kapan trós rainyo masé tetótóp sapu tangan.

Uji Yesus ke dio wong, “Lepaske dio dari kaén-kaén tu trós biarke dio pegi.”

45 Laju, wong-wong Israel yang dateng ngébór Mariam tu nyingok apo yang la dilakuke Yesus. Banyak dari wong-wong tu jadi pecayo samo Yesus. 46 Tapi, ado beberapo dari antaro dio wong pegi ke wong-wong Parisi trós ngenjóktauke pasal apo yang la Yesus lakuke. 47 Laju, ketuo-ketuo imam jugo wong-wong Parisi ngómpólke wong Mahkama Agama laénnyo trós ngomong cak ini, “Apo yang nak kito lakuke? Wong ni la ngelakuke banyak tando-tando ajaéb. 48 Amen kito mbiarke Dio ngelakuke cak itu terós, galo-galo wong bakal pecayo samo Dio. Laju, wong-wong Roma bakal dateng^f trós bakal ngancórke Ruma Agóng Allah^g kito jugo bangso kito.”

49 Na, sala sikok dari dio wong yang benamo Kayapas, yang iola imam besak pas taón tu, ngomong ke dio wong cak ini, “Kamu tu idak tau apo-apo! 50 Kamu tu jugo idak ngerti kalu lebé baék óntók kamu amen sikok wong mati óntók wong banyak daripado galo-galo bangso kito ni binaso.”

51 Omongan Kayapas tu idak dari dirinyo dewek, tapi karno dio tu imam besak taón tu, dio ngewahyuke pesen dari Allah amen Yesus bakal mati óntók bangso tu. 52 Trós bukan cuman óntók bangso itu bae, tapi jugo supayo anak-anak Allah yang tepisa-pisa^h dikómpólke-Nyo jadi sikok. 53 Jadi, mulai ari tu, wong-wong tu berembók óntók mbunu Yesus.

54 Karno itula, Yesus idak lagi bepegian secaro terang-terangan di antaro wong-wong Israelyang tinggal di Propinsi Yudea, tapi pegi dari sano ke daera yang parak dengen padang górón, ke sikok kota yang disebót Epraém. Di sano Dio tinggal dengen móréd-móréd-Nyo.

55 Pas waktu tu, ari rayo Paska wong Israel la parak. Banyak wong dari dósón pegi ke Yerusalem sebelóm ari rayo Paska tu óntók ngelakuke upacara penyucian diri. 56 Jadi, wong-wong tu nyari Yesus. Sambél tegak di halaman Ruma Agóng Allah, wong-wong tu saléng ngomong cak ini, “Nórót kamu cakmano? Dio ceto dak bakal dateng ke perayoan ni kan?” 57 Sementaro tu, ketuo-ketuo imam jugo wong-wong Parisi la ngenjók prénto supayo amen ado wong yang tau di mano Yesus, wong tu harós ngelaporkenyo supayo dio wong pacak nangkep Dio.