1 Yesus ngomong lagi cak ini, “Pasal-pasal ni la Aku omongke samo kamu supayo kamu idak murtad. 2 Dio wong bakal ngósér kamu dari ruma ibada. Mala bakal tibo waktunyo amen tiap wong yang mbunu kamu bakal bepékér amen dio wong lagi bebakti ke Allah. 3 Dio wong bakal ngelakuke pasal-pasal tu ke kamu karno dio wong idak kenal Aba Aku jugo idak kenal Aku. 4 Tapi, pasal-pasal ni la Aku omongke samo kamu supayo pas waktunyo tibo óntók pasal-pasal tu tejadi, kamu bakal ngingetnyo amen Aku la ngenjóktaukenyo samo kamu.”

“Pasal-pasal ni jugo idak Aku omongke samo kamu dari petamo karno Aku masé besamo kamu. 5 Tapi sekarang, Aku bakal pegi ke Dio yang ngótós Aku, trós katek sikok wong bae dari kamu tu betanyo samo Aku cak ini, ‘Ke mano nian Kau nak pegi?’ 6 Tapi, karno la Aku omongi samo kamu pasal-pasal ni, ati kamu la dipenui dengen kesedéan. 7 Tapi, yang Aku omongke ke kamu ni bener nian. Lebé baék óntók kamu kalu Aku pegi, soalnyo kalu Aku idak pegi, Penolong tu idak bakal dateng ke kamu. Sebaléknyo amen Aku pegi, Aku bakal ngótós Dio ke kamu. 8 Pas Dio la dateng, Dio bakal negor dunio pasal duso, kebeneran, jugo pengakéman: 9 petamo, pasal duso, karno memang dio wong idak pecayo samo Aku; 10 keduo, pasal kebeneran, karno Aku bakal pegi ke Aba Aku, trós kamu idak bakal nyingok Aku lagi; 11 ketigo, pasal pengakéman, karno penguaso dunio ni la diakémi.

12 Masé banyak yang nak Aku omongke samo kamu, tapi kamu idak pacak nanggóngnyo sekarang. 13 Tapi, pas Ro Kebeneran dateng^a, Dio bakal mbémbéng kamu ke dalem segalo kebeneran. Soalnyo, Ro Kebeneran idak ngomong dari diri-Nyo dewek, tapi apo bae yang Dio denger, itula yang bakal diomongke-Nyo.^* Dio bakal nyatoke samo kamu pasal-pasal yang bakal tejadi. 14 Dio bakal mulyoke Aku karno Dio bakal nerimo dari Aku, trós Dio bakal nyatokenyo samo kamu. 15 Segalo yang Aba punyo iola punyo Aku jugo. Itula sebabnyo Aku ngomong amen Ro Kebeneran tu nerimo dari Aku, trós Dio bakal nyatokenyo samo kamu.”

16 “Dak lamo lagi kamu idak bakal nyingok Aku, trós idak lamo seabés tu kamu bakal nyingok Aku lagi.”

17 Laju, beberapo móréd Yesus saléng betanyo cak ini, “Apo maksódnyo Dio ngomong samo kito, ‘Dak lamo lagi kamu idak bakal nyingok Aku, trós idak lamo seabés tu kamu bakal nyingok Aku lagi’ jugo ngomong, ‘Karno Aku bakal pegi ke Aba Aku’?” 18 Jadi, dio wong betanyo terós cak ini, “Apola maksód omongan-Nyo,^b ‘Dak lamo lagi’ tu ye? Kito idak tau apo maksód omongan-Nyo tu.”

19 Yesus tau amen móréd-móréd-Nyo ni péngén betanyo samo Dio. Mangkonyo Yesus ngomong samo móréd-móréd-Nyo tu cak ini, “Apo kamu saléng betanyo pasal apo yang Aku omongke tadi, ‘Dak lamo lagi kamu idak bakal nyingok Aku, trós idak lamo seabés tu kamu bakal nyingok Aku lagi’? 20 Aku enjók tau nian samo kamu amen kamu bakal nangis jugo bakal ngeratep, tapi dunio ni bakal beseneng. Kamu bakal beduko, tapi kesedéan^c kamu tu bakal beroba jadi kesenengan. 21 Pas sikok betino nak beranak, dio bakal ngalami kesaroan karno waktunyo la tibo, tapi pas kupek tu la laér, dio idak nginget pendritoannyo tu lagi karno raso senengnyo amen sikok manusio la laér ke dunio. 22 Pecak betino tu, kamu sekarang ngalami kesaroan, tapi Aku bakal nemui kamu lagi trós ati kamu bakal seneng, trós dak katek yang bakal ngambék kesenengan tu dari kamu. 23 Pas ari tu, kamu idak bakal betanyo apo-apo lagi samo Aku. Aku enjók tau nian samo kamu, apo bae yang kamu mintak samo Aba Aku dalem namo Aku, Dio bakal ngenjókkenyo samo kamu.^d 24 Mala sampe mak ini ari kamu belóm perna mintak apo bae dalem namo Aku. Mintakla, trós kamu bakal nerimonyo supayo kesenengan kamu tu penu.”

25 “Pasal-pasal ni la Aku omongke samo kamu makek peumpamoan. Bakal tibo waktunyo Aku idak lagi ngomong samo kamu makek peumpamoan, tapi Aku bakal ngenjóktauke secaro terang-terangan pasal Aba Aku. 26 Pas ari tu tibo, kamu bakal mintak dalem namo Aku, trós Aku idak ngomongkenyo samo kamu amen Aku yang harós mintak samo Aba Aku óntók kamu. 27 Soalnyo, Aba dewek ngaséhi kamu karno kamu la ngaséhi Aku trós la pecayo amen Aku dateng dari Allah.^e 28 Aku dateng dari Aba Aku trós la dateng ke dalem dunio ni.^* Tapi, sekarang Aku bakal ninggalke dunio trós balék lagi ke Aba Aku.”

29 Laju, móréd-móréd-Nyo ngomong cak ini, “Jingokla, sekarang Kau la ngomong terang-terangan nian, trós idak lagi makek peumpamoan. 30 Sekarang kami tau amen Kau tu tau segalonyo. Jadi, dak perlu ado wong yang betanyo samo Kau karno Kau la tau sebelómnyo. Karno tu, kami pecayo amen Kau tu datengnyo dari Allah.”

31 Yesus nyawab dio wong cak ini, “Apo sekarang kamu la pecayo? 32 Jingokla! Waktunyo bakal tibo, mala la tibo waktunyo, amen kamu bakal dikocar-kacérke^f ke tempatnyo maséng-maséng, trós kamu bakal ninggalke Aku dewek'an. Tapi, Aku idak dewek'an karno Aba Aku ado besamo Aku.

33 Pasal-pasal ni la Aku omongke samo kamu, supayo di dalem Aku kamu punyo damai sentoso. Di dalem dunio kamu dapet pendritoan, tapi kuatkela ati kamu! Aku la ngalake dunio.”