1 Na, seabés Yesus ngomong pasal-pasal tu, Dio nyungak ke langét trós ngomong cak ini, “Aba, la tibo waktunyo. Mulyokela Aku, Anak Kau, supayo Anak Kau ni jugo mulyoke Kau. 2 Soalnyo, Kau la ngenjók Aku kuaso óntók nguasoi segalo yang édóp, supayo Aku ngenjókke édóp yang óntók selamo-lamonyo ke segalo yang la Kau enjókke tu samo Aku. 3 Inila édóp yang óntók selamo-lamonyo tu amen wong-wong kenal Kau, yang iola sikok-sikoknyo Tuhan yang bener, jugo Yesus Almasi, Wong Yang Dilanték yang la Kau ótós. 4 Aku la mulyoke Kau di bumi ni dengen caro nyelesaike gawean yang Kau enjókke samo Aku óntók Aku gaweke. 5 Sekarang, ya Aba, mulyokela Aku di adepan Kau dengen kemulyoan yang Aku punyo di adepan Kau sebelóm dunio diciptoke.”

6 “Aku la ngenalke namo Kau ke wong-wong yang Kau enjókke samo Aku dari dunio ini. Dio wong tu kepunyoan Kau, trós Kau nyerakenyo ke Aku. Dio wong tu jugo la nóróti pirman Kau. 7 Sekarang wong-wong tu tau amen segalo yang la Kau enjókke samo Aku tu dari Kau 8 karno pirman yang la Kau sampeke samo Aku tu, la Aku sampeke samo dio wong jugo. Dio wong yang nerimonyo tau nian amen Aku dateng dari Kau. Dio wong tu jugo pecayo amen Kaula yang ngótós Aku.

9 Aku naékke doa ni óntók dio wong, bukan óntók dunio ni. Iyo, Aku bedoa óntók wong-wong yang la Kau enjókke samo Aku tu, karno wong-wong tu memang punyo Kau. 10 Segalo yang Aku punyo ni, punyo Kau galo. Segalo yang Kau punyo tu, punyo Aku jugo. Jadi, pengékót-pengékót Aku ni punyo Kito besamo, trós liwat wong-wong tu, Aku la dimulyoke. 11 Aku dak bakal ado di dunio ni lagi, tapi dio wong masé tetep ado di dunio ni. Aku dateng ke Kau. Iyo, Aba Yang Maha Suci, jagola dio wong dalem namo Kau, yang la Kau enjókke samo Aku,^* supayo dio wong jadi sikok pecak Kito. 12 Selamo Aku besamo dio wong, Aku nyago dio wong dalem namo Kau yang la Kau enjókke samo Aku. Aku jugo la nyago dio wong. Dari dio wong tu dak katek sikok wong bae yang binaso kecuali dio yang ceto binaso tu^a. Itu tu supayo Kitab Suci ditepati.

13 Sekarang Aku dateng ke Kau, trós sementaro Aku masé di dunio, Aku ngomongke galo-galonyo ni supayo kesenengan Aku ni melok jugo di dalem dio wong sepenunyo. 14 Aku la mbritoke pirman Kau samo wong-wong tu, trós dunio mbenci dio wong karno dio wong tu idak dari dunio ni pecak Aku jugo yang idak dari dunio ni. 15 Aku idak mintak Kau óntók ngambék wong-wong tu dari dunio ni, tapi Aku mintak supayo Kau nyagoi dio wong dari yang jahat.^b 16 Dio wong tu idak dari dunio pecak Aku jugo yang idak dari dunio ni. 17 Kósóskela wong-wong tu óntók Kau dalem kebeneran. Pirman Kau iola kebeneran. 18 Pecak Kau la ngótós Aku ke dunio, pecak itu jugo Aku la ngótós dio wong ke dunio. 19 Aku ngósóske diri Aku^c óntók dio wong supayo dio wong jugo dikósóske dalem kebeneran.”

20 Uji Yesus lagi, “Idak óntók wong-wong ni bae Aku manjatke doa, tapi jugo óntók wong-wong yang pecayo samo Aku liwat omongan dio wong, 21 supayo galo-galo wong tu jadi sikok samo pecak Kau, ya Aba, di dalem Aku trós Aku dalem Kau. Aku bedoa biar dio wong jugo jadi sikok di dalem Kito supayo dunio pecayo amen Kaula yang ngótós Aku. 22 Aku jugo la ngenjókke kemulyoan ke dio wong yang Kau enjókke samo Aku, supayo dio wong jadi sikok samo pecak Kito jadi sikok. 23 Aku di dalem dio wong trós Kau di dalem Aku biar dio wong jadi sikok dengen sempurno. Ini ni supayo dunio tau amen Kaula yang la ngótós Aku trós Kau jugo ngaséhi dio wong, samo pecak Kau ngaséhi Aku.

24 Ya Aba, Aku péngén kalu wong-wong yang la Kau enjókke samo Aku tu jugo ado besamo Aku di mano bae Aku ado. Ini ni supayo dio wong pacak nyingok kemulyoan Aku yang la Kau enjókke samo Aku, soalnyo Kau la ngaséhi Aku sebelóm dunio diciptoke.

25 Aba yang adél, memang dunio idak kenal Kau, tapi Aku kenal Kau trós dio wong ni tau amen Kaula yang la ngótós Aku. 26 Aku la nyatoke Kau^* samo dio wong. Aku bakal ngelakukenyo terós, supayo kasé jugo ado di dalem dio wong pecak yang Kau enjókke samo Aku tu, trós Aku di dalem dio wong.”