1 Jadi, Pilatus ngongkon prajórét-prajórét gawak Yesus trós nyambók'i-Nyo. 2 Prajórét-prajórét nganyam mahkota dari ranténg-ranténg beduri, dipakekke di kepalak Yesus. Dio wong tu jugo makekke juba ungu ke Yesus. 3 Dio wong mulai marak'i Yesus trós ngomong, “Salam, ói Rajo wong Israel!”. Laju, dio wong nabok'i rai Yesus.

4 Pilatus metu lagi trós ngomong samo wong-wong Israel tu cak ini, “Jingokla, aku gawak Dio metu ke adepan kamu supayo kamu tau amen aku idak nemuke kesalahan apo bae di Dio.” 5 Laju, Yesus metu makek mahkota duri jugo juba ungu. Abés tu, Pilatus ngomong ke wong-wong tu cak ini, “Jingokla Wong ini!”

6 Na, pas ketuo-ketuo imam jugo penjago-penjago Ruma Agóng Allah nyingok Yesus, dio wong mekék, ujinyo, “Salébke Dio! Salébke Dio!”

Pilatus ngomong ke dio wong cak ini, “Ambékla Dio, kamu dewek bae yang nyalébke-Nyo, soalnyo aku idak nemuke kesalahan apo bae di Dio.”

7 Uji wong-wong Israel tu ke Pilatus, “Kami punyo hókóm trós nórót hókóm tu Dio harós mati karno Dio nganggep diri-Nyo Anak-Nyo Allah.”

8 Na, pas Pilatus ndenger omongan tu, dio namba takót. 9 Laju, dio masók lagi ke istana gubernór trós ngomong ke Yesus cak ini, “Dari mano asal Kau?” Tapi, Yesus idak ngenjók jawaban ke Pilatus. 10 Mangkonyo, Pilatus ngomong ke Yesus cak ini, “Ngapo nian Kau idak galak nyawab petanyoan aku? Apo Kau idak tau amen aku ni punyo kuaso óntók mbebaske Kau trós aku jugo punyo kuaso óntók nyalébke Kau?”

11 Jawab Yesus, “Kau tu dak katek kuaso apo-apo ke Aku amen kuaso tu idak dienjókke samo kau dari pócók. Karno tu, wong^a yang nyerake Aku ke kau tu dusonyo lebé besak.”

12 Seabés tu, Pilatus beusaha óntók mbebaske Yesus, tapi wong-wong Israel tu mekék-mekék cak ini, “Amen Kau ngelepaske Wong ini, Kau bukan kawannyo Kaisar! Soalnyo, tiap wong yang nganggep dirinyo rajo, artinyo dio ngelawan Kaisar.”

13 Seabés Pilatus ndenger omongan tu, dio ngongkon supayo Yesus digawak metu, trós Pilatus dódók di korsi pengadélan, di tempat yang benamo Lantai Batu, yang dalem baso Ibraninyo disebót Gabata. 14 Ari tu iola ari pesiapan Paska, kiro-kiro jam 12 siang. Uji Pilatus ke wong-wong Israel cak ini, “Na, jingokla rajo kamu!”

15 Laju, mekékla wong-wong Israel tu cak ini, “Bunu Dio! Bunu Dio! Salébke Dio!”

Pilatus ngomong ke dio wong tu cak ini, “Madak'i aku nyalébke rajo kamu?”

Uji ketuo-ketuo imam tu cak ini, “Kami dak punyo rajo selaén Kaisar!”

16 Jadi, ahérnyo Pilatus nyerake Yesus ke dio wong óntók disalébke.

Laju, wong-wong tu ngarak Yesus. 17 Sambél mékól saléb-Nyo dewek, Yesus pegi ke tempat yang disebót Tempat Tengkorak, yang dalem baso Ibraninyo disebót Golgota. 18 Di situla wong-wong tu nyalébke Yesus. Besamo Yesus ado jugo duo wong laénnyo yang disalébke besebela-sebelahan, sedengke Yesus di tenga-tenga. 19 Na, Pilatus jugo ngongkon supayo dipasang tólésan di pócók kayu saléb tu yang bunyinyo, “Yesus, Wong Najaret, Rajo wong Israel.” 20 Banyak wong Israel yang mbaco tólésan tu, karno tempat Yesus disalébke tu parak dengen kota trós tólésan tu ditólés dalem baso Ibrani, Latén, jugo Yunani. 21 Laju, ketuo-ketuo imam wong Israel ngomong ke Pilatus cak ini, “Jangan nólés ‘Rajo wong Israel’, tapi tólésla, ‘Wong ini ngomong, “Akula Rajo wong Israel.”’”

22 Jawab Pilatus, “Apo yang la aku tólés tu, pokoknyo tetep cak itula.”

23 Seabés prajórét-prajórét tu nyalébke Yesus, dio wong ngambék baju-Nyo. Baju-Nyo tu dikoyakke jadi empat bagéan, maséng-maséng prajórét tu dapet sikok. Prajórét-prajórét tu jugo ngambék baju dalem-Nyo. Baju tu dak katek jaétannyo karno ditenón dari pócók sampe ke bawa.

24 Jadi, wong-wong tu saléng ngomong cak ini, “Jangan kito koyakke, tapi payó kito koncang undi bae óntók nentuke siapo yang ndapetkenyo.” Dengen cak itu, tepatla apo yang tetólés dalem Kitab Suci,

25 Di parak saléb Yesus, tegak emak-Nyo, dólór betino emak-Nyo, Mariam bini Klopas, jugo Mariam Magdalena. 26 Pas Yesus nyingok emak-Nyo jugo móréd yang dikaséhi-Nyo di sampéng emak-Nyo, Yesus ngomong ke emak-Nyo cak ini, “Mak, jingokla sekarang dio ni jadi anak kau.” 27 Abés tu, Yesus ngomong samo móréd-Nyo cak ini, “Jingokla sekarang emak Aku jadi emak kau.” Pas waktu tu, móréd-Nyo ni nerimo emak Yesus tinggal di jeró rumanyo.

28 Seabés tu, Yesus tau amen segalonyo la selesai. Supayo apo yang tetólés dalem Kitab Suci ditepati, Yesus ngomong cak ini, “Aku aós!”^c 29 Di situ ado sikok gentong yang penu dengen banyu anggór asem.^d Jadi, wong-wong tu nyócókke kembang karang,^e yang la dicelópke dalem banyu anggór asem ke ranténg hisop,^f laju dio wong ngólórkenyo ke mólót Yesus. 30 Na, pas Yesus la minum banyu anggór asem tu, ahérnyo Dio ngomong cak ini, “La selesai.” Abés tu, Yesus nóndókke kepalak-Nyo trós nyerake nyawo-Nyo.

31 Na, karno ari tu iola Ari Pesiapan Sabat trós besoknyo tu iola ari Sabat yang besak. Mangkonyo pemémpén-pemémpén Israel mintak samo Pilatus supayo sekel wong-wong tu dipatake^g trós mayat-mayatnyo ditórónke supayo mayat-mayat tu idak tetep tegantóng di kayu saléb pas ari Sabat. 32 Laju, datengla prajórét-prajórét trós matake sekel wong yang petamo jugo sekel wong laénnyo yang disalébke besamo Yesus. 33 Tapi, pas dateng ke Yesus, dio wong nyingok amen Yesus la mati, jadi dio wong idak matake sekel-Nyo, 34 tapi sala sikok dari antaro prajórét-prajórét tu nyócók lambóng Yesus dengen tombak, trós langsóng metu dara samo banyu.

35 Mala wong yang nyingok^h pasal tu dewekla yang besaksi, trós kesaksiannyo tu bener. Dio tau amen apo yang diomongkenyo tu bener, supayo kamu jugo pecayo. 36 Pasal-pasal tu tejadi supayo ditepatila apo yang la tetólés dalem Kitab Suci, “Dak katek sikok bae tulang-Nyo yang pata.”ⁱ 37 Di Kitab Suci ado jugo tólésan laénnyo cak ini, “Wong-wong tu bakal nyingok Dio yang la dio wong cócók.”^j

38 Abés tu, Yósóp dari Arimatea mintak samo Pilatus supayo diéjénke óntók nórónke mayat Yesus. Dio ni pengékót Yesus, tapi secaro diem-diem karno takót samo pemémpén-pemémpén Israel. Pilatus ngabólke pintak'annyo tu. Laju, datengla dio nórónke mayat Yesus. 39 Na, Nikodemus yang dulu perna dateng ke Yesus pas malem ari jugo dateng.^l Dio gawak campóran minyak damar wangi dengen minyak gaharu,^k kiro-kiro 30 kilo beratnyo. 40 Dio wong ngambék mayat Yesus, trós ngapani-Nyo dengen kaén lenan samo rempa-rempa nórót adat wong Israel pas ngóbórke mayat. 41 Di tempat Yesus disalébke, ado sikok taman, di jeró taman tu ado sikok kóbóran anyar yang belóm perna dipakek óntók ngóbórke wong. 42 Karno ari tu iola Ari Pesiapan Sabat wong Israel trós kóbóran tu jugo parak, laju dio wong narok mayat Yesus di situ.