11
1 Seabés Yesus selesai nyampeke pesen samo ke-12 móréd-Nyo tu, Dio pegi dari sano óntók ngajar jugo becerama di kota-kota laénnyo.
Pebuatan yang Yesus lakuke
Ótósan-ótósan Yahya Pembaptés
2 Di jeró penjaro, Yahya ndenger apo yang dilakuke Yesus. Laju, dio ngótós beberapo pengékótnyo óntók betanyo samo Yesus cak ini, 3 “Apo Kau nila Wong yang bakal datenga tu, apo kami masé harós nunggu wong laén?”
4 Jawab Yesus ke wong-wong tu cak ini, “Pegila trós enjók taukela samo Yahya segalo yang la kamu denger jugo yang la kamu jingok, 5 wong buto pacak nyingok, wong lómpó pacak bejalan, wong sakét kusta disucike, wong pekak pacak ndenger, wong mati diédópke lagi, trós Énjél dibritoke samo wong-wong méskén.b 6 Seneng atila wong yang idak tesénggóng karno Aku.”c
7 Seabés ótósan-ótósan Yahya tu pegi, Yesus mulai becerito pasal Yahya ke wong banyak, uji-Nyo, “Óntók apo kamu pegi ke padang górón? Óntók nyingok rómpót begoyang karno ditiup angin?d 8 Trós, óntók apo kamu pegi? Nak nyingok wong makek baju bagós? Jingokla! Wong yang makek baju bagós tu adonyo di istana rajo. 9 Jadi, óntók apo kamu pegi ke sano? Óntók nyingok nabi? Iyo, Aku omongke samo kamu, Yahya tu lebé besak daripado nabi. 10 Soalnyo, di Kitab Suci la tetólés pasal Yahya cak ini,
“‘Jingokla, Aku ngérém ótósan Aku ndului Kau,
diola yang bakal nyiapke jalan óntók Kau.’e
11 Aku ngomong nian samo kamu , di antaro wong-wong yang dilaérke ole betino, belóm perna ado yang lebé besak dari Yahya Pembaptés.f Tapi sebaléknyo, yang paléng kecik di Kerajaan Surgo mala lebé besak daripado dio.g 12 Sejak kedatengan Yahya Pembaptés sampe mak ini ari, Kerajaan Surgo terós-terósan ditentang ole wong-wong yang nak nguasoinyoh.i 13 Soalnyo, sebelóm Yahya mulai becerama, kitab Taurat jugo kitab nabi-nabi la ngewahyuke pasal Kerajaan Surgo tu. 14 Amen kamu galak nerimonyo, sebenernyo Yahya ni iola Elia, nabi yang bakal dateng tu.j 15 Siapo yang punyo kópéng, dengerkela!
16 “Dengen apola nak Aku samoke wong-wong jaman mak ini ari? Wong-wong jaman mak ini ari seumpamo budak-budak kecik yang dódók di pasar trós mekék ke kawan-kawannyo cak ini,
17 ‘Kami niup sóléng óntók kamu,
tapi kamu idak nari.
Kami nyanyike lagu duko,
tapi kamu idak besedé ati.’
18 “Karno Yahya dateng tapi idak makan minum,k laju dio dikatoi wong cak ini, ‘Dio tu kesórópan.’ 19 Tapi pas Anak Manusio dateng trós makan minum, masé bae dikatoi wong, ‘Jingokla! Dio tu rakós jugo pemabók, trós dio bekawan samo penagé pajak jugo wong beduso.’ Tapi mugola dio wong ngomong cak itu, asél pebuatan sikok wong pacak mbuktike apo dio bener-bener bijaksana apo idak.”
Yesus negor beberapo kota
20 Abés tu Yesus mulai negor kota-kota yang idak betobat, padahal di tempat-tempat tu Dio banyak ngelakuke mujijat, uji-Nyo, 21 “Celakola kau, ói Kota Khorajim! Celakola kau, ói Kota Betsaida! Karno seandainyo mujijat yang tejadi di tempat kamu tu jugo tejadi di Tirus jugo Sidon,m mangko la lamo pendódók kota tu betobat dengen makek kaén kabóng trós dódók di pócók abu.l 22 Tapi, Aku omongke samo kamu, pas ari kiamat, hókóman óntók Kota Tirus jugo Sidonn bakal lebé enteng daripado hókóman yang kamu tanggóng. 23 Cak itu jugo kau, ói Kapernaum! Apo kau pékér kau bakal diangkat sampe ke langét? Idak! Kau tu bakal ditórónke sampe ke dunio wong mati. Soalnyo, amen mujijat yang tejadi di tempat kau tu jugo tejadi di Kota Sodomo, pasti kota tu bakal tetep ado sampe mak ini ari.p 24 Tapi Aku omongke samo kamu, pas ari kiamat hókóman óntók Sodom bakal lebé enteng daripado yang kau tanggóng.”q
Ajak'an Yesus
25 Pas waktu tu Yesus ngomong cak ini, “Aku mulyoke Kau, ya Aba, Tuan penguaso langét jugo bumi, karno galo-galonyo ni Kau singitke dari wong-wong yang pinter jugo bijak, tapi Kau nónjókkenyo ke wong-wong kecik. 26 Soalnyo, itula yang nyenengke ati Kau, ya Aba.
27 “Galo-galonyo la dienjók ke Aku ole Aba Aku. Dak katek sikok wong bae yang tau siapo Aku kecuali Aba Aku. Trós yang tau siapo Aba, cuman Aku, samo wong-wong yang galak Aku kenalke samo Dio tu.r
28 “Payó datengla ke Aku, galo-galo kamu yang capek jugo yang mékól beban berat. Aku bakal ngenjók kelegoan óntók kamu. 29 Terimola kayu pékóls yang Aku enjók trós belajarla dari Aku. Soalnyo, Aku ni atinyo lembót jugo renda ati. Trós, jiwo kau bakal dapet kelegoan.t 30 Soalnyo, kayu pékól yang Aku enjókke tu lemak digawak trós beban yang dari Aku tu jugo enteng.”